فلسطين التي اسميها وطني

عايزة احكيلكم حكاية صغيرة


بيوم من ذات الايام

كنت قاعدة بدرس بالمكتبة مع صاحبتي مريم

كنا بنحكي بالعربي وباين انو صوتنا كان عالي شوية

قربت منا .. وعرفتنا على حالها

اسمها تينا .. نمساوية

بنت لطيفة كتير وبتحس وشها من النوع المريح


ومن بين كل الاماكن بالمكتبة .. يومها كانت قاعدة قريب وسمعتنا بنحكي عربي

صدفة غريبة

تينا بتعمل بحث عن الأفلام الفلسطينية

ومن غير ما تعرف اني فلسطينية

اجت وسألت سؤال ..

What exactly does the word "watan" mean?

Do u call it on your house ?

or on your country?

please .. define the word "Watan"


قليلة المرات الي فكرت فيها في سؤال زي هيك

ما معنى كلمة وطن


------------

فلسطين ,, الي بسميها وطني


هي اكبر من مجرد البلد

واكبر من مجرد المدينة

واكبر من مجرد البيت


فلسطين عاملة زي الاسطورة

زي الارض الموعودة

زي الحلم

زي بنت حلوة بجدايل

لابسة توب فلاحي

سجينة لكنها بتتنفس حرية

اسيرة لكن بإيدها المفتاح

هل يا ترى حبنا فلسطين

هو نابع من كونها اسيرة؟


هل يا ترى حبنا لفلسطين

هو حاجة شربناها مع حليب امهاتنا

هو حاجة ورثناها بالجينات

هو حاجة كبرت فينا مع كل ليلة عشناها بلا كهربا

او بلا هدوء

او بلا حرية

؟؟


------------

كنت بحكي لتينا .. انه حب فلسطين هو شئ

ما حد بيعلمنا اياه بالمدارس

ما حد بيعطينا عنه محاضرات ولا حد بيحرضنا عليه

حبنا لفلسطين .. وكرهنا لمن سلبها هو اشي

بيكبر جوانا من غير ما حد يحكيلنا عليه

وهادي شغلة ما في فلسطيني واحد بيقدر يلغيها من قلبه

مهما حاول

ومهما جرب يبعد


-------------

فلسطين ياللي بسميكي وطني ..

الله بيعلم اديش بحبك

لكن سامحيني ..

زمان .. كنت احبك اكتر

------------

علا في امستردام

شهر مايو بدا يا جماعة

من يومين كنت في رحلة الى هولندا بمناسبة عيد العمال

زرت مدينة الزهور المسماة كيكنهوف .. وبعدين رحت في رحلة قصيرة جدا الى امستردام

حابة اضيف شوية صور كنوع من تغيير النمط وكسر القاعدة .. بأن تكون مدونة من غزة مكان للنكد وبس :D

====
بس قبل الصور .. زي ما قلت شهر خمسة بدأ .. والسؤال هو شهر خمسة ايش فيه يا ولااااد ؟

اه بعرف فيه شغلات حلوة جاية بالطريق وخاصة بكرة :D

بس لأ مناسبة فلسطينية يعني .. اشي بيخص شعبنا او شعوبنا الفلسطينية (بالجمع) ...

سامعة حد ورا بيقول اجابة صح

اه هي ذكرى النكبة في 15 مايو .. وفي حد مبادر اسمه زعتر طلعت في باله مشكورا .. فكرة ان ندون لفلسطين في هذا اليوم

انا رح اشارك ان شاء الله

وادعو اي حد ممكن يتحمس للفكرة =ومش شرط بس الفلسطينيين = انو يشارك وممكن تشوفه الشروط والجايدلاينز للمشاركة من عند زعتر

========
بالنسبة للرحلة الى هولندا ,, وما ادراك ما هولندا

هي بما انو الرحلة كانت لمدة يوم واحد .. مقسمة على مدينتين :مدينة الزهور وامستردام .. فهي مش مدة كافية ابدا لأخذ اي انطباع او فكرة عن البلد

بس الي ملاحظ جدا في طريقنا لهناك .. انو ماشاء الله البلد مليانة مزارع وابقار وخيول ومساحات خضراء

فا ريف اوروبا للي عايز يعرف .. شكله زي هيك

في ارنب قاعد بجري على اليمين :)

طبعا ممكن تدوسو على الصورة عشان الحجم المكبر .. عنجد الصور كتير حلوين على سطح المكتب

=========
المهم بعد حوالي تلات ساعات بالباص من بروكسل وصلنا لكيكنهوف .. او مدينة الزهور

وهي حسب ما قيل اكبر حديقة للزهور في العالم

وهي حسب وصف الواصفين ... كمثل جنة عدن في الأرض :)

سموا باسم الله

بعد هيك كنا مروحين من هناك وإذ بأمطار والدنيا كبست شتا بشكل مش طبيعي وتحول الطقس 180 درجة

المهم بعد هيك رحنا على امستردام والطريق الها اخدت حوالي ساعة

بس للأسف كاميرتي ساعتها كانت ودّعت وبطاريتها ماتت
فا ما قدرت اصور صور منيحة ..
في انتظار الدعم والمدد :p


بس الانطباع الي طلعت فيه انو هناك فرق في المستوى والشكل والمضمون
ومع انه بتزكر انو المدينة كانت حلوة لما راحها همّام ..
لكن انا عن نفسي ما عجبتنيش
بروكسل احلى

بس حبيت احكي انو في امستردام كان فيه محجبات عادي جدا
ومطاعم حلال عادي جدا
والكوفية الفلسطينية بتتباع في محلات السيفونير عادي جدا
وفيها عرب عاادي جدا

لدرجة انو كنت بتكلم مع حد كان معايا واحنا بنشتري سيفونير وبتكلم عن ان برلين احلى وكدة
(اه صح نسيت احكي بالمدونة عن رحلة برلين)

المهم فا لقينا راجل كان ماشي قدامنا قام لافف وقايل : اه فعلا برلين اهدى واحلى .. وبالعربي
وكمل مشي عادي جدا :D


الي عايزة اقوله ان الناس متعايشة مع بعضها بنتهى البساطة وما حسيتش انو في حد كان بيطلّع علينا بطريقة وحشة

لكن بروكسل احلى

واديني رجعت وعليا كوم مشاريع وربنا يستر

ولو سمحتو قولولي اذا البوست عجبكم عشان ابقى احكي عن رحلة برلين بأثر رجعي


ولقاءنا يوم ذكرى النكبة للتدوين عن فلسطين


مراسلتكم من بلجيكا

علا من غزة