بعد 200 يوم في بروكسل

صارلي 200 يوم في بروكسل

لما اقعد اتزكر ... بجد مش عارفة هما مروا بسرعة ولا ببطء

اوقات بحس انو صارلي زمان هنا

واوقات بحس كأني اجيت امبارح

اول يوم اجيت .. كان بعد يومين سفر .. كنت في حالة مزرية .. اصعب تجربة مرت في حياتي هههههه

انا مش عايزة افتح السيرة ..

المهم اول يوم اجيت بجد كان احساسي كأني بحلم
مكنتش مستوعبة انا وين
ولا فاهمة اي حاجة

اليوم .. ولما اتزكر حالي من 200 يوم .. بحس انو حاجات كتير فيا اتغيرت
بتغير المكان والاشخاص والظروف

0-0-0-0-0-0-0-0-0

اول اشي طبعا فرق 180 درجة عن ما تكون فرد في اسرة
مش مسئول الا عن اشياء بسيطة
وعن ما تصير مسئول عن كل شي :D

اكلك شربك فلوسك غسيلك طبيخك نظافة بيتك (او غرفتك ) ودراستك .. محدش بيقولك قوم ادرس
لازم كلو يكون نابع من نفسك :D

طبعا انا واحدة من الناس بعترف انو كان عندي قدر كبيييير من الاتكالية على بابا وماما

وكانت نقلة كبيرة طبعا انو اصير مسئولة عن كل شي بحياتي

عشان هيك يا جماعة ... الي عند اهله يحمد ربنا على النعمة الي هو فيها

=========

كمان لما اقارن بين شخصيتي حاليا وقبل سنة مثلا بلاقي في اختلافات

في كتير شغلات مش مستوعبة انو هادي انا الي كنت بتصرف هيك !

في شغلات طبعا مش راضية اني عملتها
وفي شغلات بقول ياريتني عملتها

يعني مثلا صاحباتي كنت كتير مقصرة معهم .. وبقول ياريت كنت بتصل اكتر او بسأل اكتر او بعمل زيارات اكتر

زائد انو بقول ياريت كنت بقعد مع اهلي اكتر

او مثلا ياريت كنت بقعد على البحر وبسيب الكمبيوتر شوية

حد يسيب منظر بحر زي هيك

ويقعد ادام الكمبيوتر

!!!

=========

ايش كمان اتغير ؟؟؟؟


ممممممم


طبعا اكتشفت انو فعلا الغربة صعبة

بس بتهون مع الايام

يعني لما اقارن كيف اول ما اجيت مكنتش بعرف حد ... خااالص

وكيف هلأ والحمد لله محاطة بناس بجد انا محظوظة بمعرفتهم

سواء من زملاء الدراسة او الاصحاب او زملاء السكن ..

وعرفت بجد ان لو كان فيه فروق بين غزواي وضفاوي .. او فلسطيني ومصري ,, فهي فروق سطحية

حتى الفرق بينا كعرب واوروبيين ممكن التغاضي عنها لما نتعامل مع بعض كبني ادمين

---------

زائد كيف اول ما اجيت مكنتش بعرف ولا كلمة فرنسي
(غير جومابل ومرسي وجوسوي مالادو وكدة يعني )

والآن الحمد لله نجحت في المستوى الاول وسجلت بالتاني

يعني .. فيه تقدم شوية

ولو ما طلعتش بالشهادة اطلع باللغة

القصد انو شعوري بالغربة بيقل مع الوقت


هي بس حتة انو مشتاقة لأهلي جدا جدا


=========

اصعب او اسوأ ما تغير هو اني صرت مزاجية جدا

مع العلم اني اصلا مزاجية

بس هنا صرت مزاجية بزيادة شوية


يمكن والظاهر والله اعلم عشان الشمس بتفضل طالعة للساعة عشرة بالليل ,, يمكن بتأثر على النفسية شوية وبتسبب اكتشئاب احيانا

يا اما عشان ضغط الامتحانات والمشاريع شوية بتخلي الواحد مش على طبيعته احيانا


بتمنى انه يكون تغير مؤقت


==========


وفي النهاية

-بس عشان اختم هالبوست الي صارلي بكتب فيه من اول النهار -

عايزة اقول ان كل يوم عدا عليا كان بالنسبة الي مغامرة حلوة .. وكل يوم بتعلم جديد وبكتشف جديد في نفسي وفي الحياة

وكل 200 يوم وانتو بخير

لون في حياتي

كنت بحاول اركز واقرأ في بيبر عن Communicating Sequential Processes

وكنت مركزة فعلا .. ويعني طلعت البيبر مش معقدة كتير زي ما كنت فاكرة



طبعا انتو عارفين
كل الافكار الغريبة بتيجي في دماغ الواحد لما يحاول يركز :D


لاحظت فجأة .. انو عندي حاجات كتير زرقا :D
ودرجة معينة كمان من الازرق لقيتها موجودة في حاجات كتير حواليا


بتهيألي ولا مرة حكيت ان الازرق هو لوني المفضل

ولذلك .. عايزة اعرفكم على الحاجات الزرقا الي في حياتي

==================

البيبر الي كنت بقرأ فيها ,, والدوسيه تبعها ,, والقلم الرصاص

==================

والمقلمة هادي شافت معايا ايام ... بتزكر انو شريتها مع صاحباتي .. احنا التلاتة شرينا نفس هادي المقلمة
كنا في سنة تالتة .. يعني المقلمة هادي عمرها .. ممم .. خمس سنين تقريبا

اما الميدلية .. هادي الها قصة بردو

الميدلية الي عليها اسمي اشترالي اياها بابا من مصر .. يمكن كنت في صف خامس ابتدائي
بردو شافت معايا ايام وليالي .. ونجحت انو احافظ عليها طول هالمدة :)

والخاتم .. ولا هو مش مبين انو خاتم؟ .. هادا اهدتني اياه صاحبتي فطوم لما كنا في صف اولى ثانوي .. يعني سنة 98 مثلا
كان موضة ايامها .. الخاتم الي في قلبه مية وكرات .. ماحدش منكم كان عنده زيه ؟؟

==================

من يومين رحت اشتري شوية قرطاسية .. فا كملت على الطقم الازرق الي كان عندي اساسا
اشتريت المحاية الزرقا وخرامة الورق الزرقا وقلم جاف ازرق

الباقيين جبتهم معايا من غزة .. وبردو تعتبر اشياء صارلها عندي من زمااان :)

==================

بردو يومها اشتريت هادي الشمسية
ما كنتش قاصدة انو اجيبها زرقا بردو .. لكن هي اكتر وحدة عجبتني باللي كانو موجودين

==================

المج تبعي

اليوم انتبهت انو فيه نفس درجة الازرق اياها
كنت بشرب فيه شاي وانا بقرأ البيبر

من اوائل الاشياء الي اشتريتها في بروكسل

==================

هادي المصلية جبتها معايا من غزة

بردو نفس الازرق

==================

مفاتيحي
الميدلية اشتريتها من برلين
زي ما انتو شايفين عليها حرف ال O
يومها بردو من غير قصد مني .. كانت الميدلية الوحيدة الي عليها حرفي .. فا اضطريت انو اجيبها :p

==================

النضارة
صحيح ما بستعملهاش كتير .. او ما بستعملهاش بالمرة .. لكنها بردو من الاشياء الي جبتها معايا وعمرها اكتر من تلات سنين .. او اكتر




تقريبا هادول هما ...

الغريب انو الازرق مختفي من لبسي !!! معنديش ولا حاجة فيها هادا الازرق



طلع هو هو نفس الازرق الي مشتاقاله في بحر غزة

هههههههههه

سبحان الله !!


انا هاروح اكمل قراءة .....

تاج الاكتشافات

وصلني تاج من اخي بهاء صاحب اوراق الورد

ولأصدقائي الي مش كتير بيعرفوا مصطلحات المدونين .. التاج هو عبارة عن مجموعة اسئلة بتوصل من مدون للتاني والمفروض يجاوب عليها ويرجع يبعتها لمجموعة مدونين تانيين وهكذا

ممكن تشوفو التاجات الي جاوبتها قبل هيك هنا

المهم التاج اليوم بيطلب مني احكي 10 اشياء عن حالي او عن شخصيتي

بتعرفو انو اصعب اشي الواحد يحكي عن حاله

وبما انه انا في بلد ديمقراطي .. فا رح احوّر التاج شوية واحكي عن 10 اشياء اكتشفتها مؤخرا ,, وحابة احكي عنها

... صلوا ع النبي ....

يمكن طول عمري بعتبر ان الشعب المصري هو اكتر شعب عربي حاسس بالهم الفلسطيني .. وهادي حقيقة بعرفها وبلمسها في المدونات المصرية .. وفي الناس المصريين الي عرفتهم

لكن النقطة اللي استوعبتها مع تعرفي على عدد كبير من الطلاب المصريين هنا .. ان هما مش عارفين تفاصيل كتير احنا كفلسطينيين معتبرين انها معروفة !

يعني هما مش عارفين حاجات .. واحنا مش عارفين انهم مش عارفينها

يعني مثلا من اهم الاشياء الي كنت معتبراها معروفة عند المصريين .. هي مشكلة الفصل بين الضفة وغزة

وهادي فرصة للحكي عن الموضوع بمنتهى البساطة

قطاع غزة والضفة الغربية - مع توضيح مسار الجدار الفاصل

الخريطة هادي تقريبا من اوضح الخرائط عن الوضع الفلسطيني حاليا

الضفة الغربية وقطاع غزة ,, هما في الحقيقة كيانين منفصلين تماما عن بعضهما البعض

اهل غزة منفذهم الوحيد هو مصر

اهل الضفة منفذهم الوحيد هو الاردن

وتقريبا ممنوع انهم يبادلو .. زي ان حد من غزة يسافر عن طريق الاردن .. نادرا لما بتحصل ..

ومن الحاجات الي لازم تعرفوها ان هناك صعوبة كبيرة ان حد عايش في كيان منهم يقدر يروح بسهولة على الكيان التاني

لأن المعبر الي بيربط الجانبين مع بعض هو معبر اسرائيلي .. مهو حاليا مغلق تماما امام سفر الافراد .. ومغلق جزئيا لمرور البضايع

يعني تخيل لو انت عايش في القاهرة ,, ومش قادر .. ممنوع عليك تقدر توصل اسكندرية .. وكل مدينة فيهم متحاوطة بسور ..


وبردو من الملاحظات الي دايقتني شوية .. لما كنت بحكي قصة سفري عن طريق مصر .. اتسألت طب ليه ما سافرتيش من غزة؟ انتو مش عندكو مطار ؟؟

مصيبة لو في ناس كتير فعلا فاكرين ان احنا عندنا مطار وطريق مفتوحة زي باقي البشر !

بجد يا جماعة من غير زعل .. انا عايزة اي حد عنده سؤال زي هيك يسألني .. احسن ما يسأل حد غريب ويقوله جواب غلط

واحسن من انو ما يسألش خالص ويفضل مش عارف حاجة

===========

الاكتشاف التاني صارلي مدة كبيرة عايزة اناقشو معاكم .. خاصة بعد ما كتبت البوست السابق

اكتشفت ان ناس كتير من غير الفلسطينيين فاهمين الشعب الفلسطيني غلط!

عدد كبير من الناس (يعني مش كبير كتير) علّق على اخر جملة كنت كتبتها في اخر البوست
انو زمان كنت بحب فلسطين اكتر

والحقيقة انا عايزة اوضح ان المقارنة في كلامي كانت ما بين احساسي بفلسطين وانا طفلة .. واحساسي بفلسطين بعد ما عشت فيها كل السنين الي فاتت .. مش بقارن باحساسي قبل وبعد سفري لبروكسل يعني

وفي شخص بالتحديد وجه لي انتقاد كبير انو كيف اكتب كدة عن بلدي

وكيف انو فلسطين لا يجوز ابدا ان يقل حبي لها

انا عايزة اقول لهذا الاخ بعد التحية والشكر طبعا

ان اهل فلسطين وخاااصة الغزازوة .. ليسو مصنوعين من حديد !

احنا بشر ولنا قدرة معينة على التحمل مثل جميع الشعوب

احنا مش اساطير ولا ابطال خارقة

من حقنا ان نتألم وان نعبر عن المنا

من حقنا ان نيأس احيانا ونعبر عن يأسنا

من حقنا ان نقول .. انه قد فاض بنا ,, وربما لم يعد لدينا القدرة على التحمل

---

يعني ليه بعد ازمة لبنان الاخيرة .. الكل كان يحكي ان الشعب اللبناني شعب ما بيستحق كل الي بيجراله .. وانه شعب يحب الحياة ولا يليق عليهم الحزن ولا الموت
وكان اللبنانيين يعبرون صراحة انهم كشعب تعبوا !
اشمعنى احنا الي لازم نفضل نتعذب وكمان مش مسموح لنا ان نصرخ ونقول تعبنا !

=============

البوست صار دمه تقيل جدا على فكرة

الاكتشاف التالي عنجد رح يستغرب منه ناس كتير ..

وهو انه في هذا البلد

المغرب صار بيأدن الساعة 10 مساء

والعشا بيأدن الساعة 12 نص الليل :)

والفجر الساعة 3 وعشرة

يعني الليل مدته تلات ساعات وشوية تخيلوا !

والاغرب من كدة وكدة ... ان المحلات والمولات التجارية بتقفل الساعة ستة مساء

مش زي بلادنا خااالص للأسف

وكلو كوم والجو الي مش راضي يرسى على بر عشرين كوم

الجو كان حلو ومشمس ودافي من اسبوع تقريبا ... لكن رجع البرد والمطر من تاني

وانا فعلا اشتقت لجو غزة وهوا البحر :(

===========

الكوفية الفلسطينية التقليدية .. اصبحت موجودة في اوروبا زي الموضة ..وصار في منها عدة اشكال والوان .. وشفت كتير تصاميم مستوحاة من شكل الكوفية

بجد بكون في منتهى السعادة لما اشوف حد لابسها .. بالرغم من ان هما في الغالب ما بيكونو عارفين هي رمز لمين ولا عارفين معناها .. واحيانا بيحكولك انه شكلها عاجبهم بغض النظر عن اصلها و مصدرها

المضحك المبكي في الموضوع .. انه في بلادنا صارت الكوفية رمز لحزب معين .. وصار الي بيلبسها في بلادنا معناه انه منتمي لهادا الحزب .. واغلب الناس مش عارفين انه الكوفية تاريخها بيرجع لوقت ما كان فيه اصلا اختراع اسمه احزاب ...

صفحة الكوفية في ويكيبيديا

===========

كنت في جولة في بروكسل .. في منطقة تعتبر من اكتر اماكن الجذب السياحي في المدينة ..

مبنى قريب من القصر الملكي

وادامه تمثال

اللوحة الي محطوطة تحت التمثال لفتت نظري لسبب ما .. قربت شوية ولقيت اللوحة مكتوب عليها Palestine

ترجمة الي مكتوب
"جودفروا دو بويون .. ملك القدس الأول .. ولد في برابانت .. مات في فلسطين عام 1100 ..والتمثال انشئ في عهد الملك ليوبلودي عام 1848"


طبعا ما كنتش فاهمة حاجة .. غير ان اللوحة فيها كلمة فلسطين والقدس مع بعض وان المدينة هادي تابعة للبلد هادي
ماخدين بالكو معايا؟

ولما روحت كنت عايزة افهم ايش علاقة هادا الملك بالقدس ببلجيكا

واكتشفت يا جماعة ان سيادته كان اول ملك يحكم القدس بعد ما وقعت في ايد الصليبيين .. وان حضرته كان بلجيكي

صدفة غريبة مش هيك ؟

صفحة هذا الملك في ويكيبيديا

==========

اظن بيكفي هيك لأنو اكيد زهقتو مني واصلا ممكن جدا يكون محدش وصل يقرا لعند هنا

يلا كل تاج وانتو طيبين

سلامات