طيب .. لابد ان اعترف انو صار صعب جدا اني اكتب تدوينة عن اشي واحد .. ايش رأيكم بكوكتيل ؟ ازكى وصحي اكتر على فكرة
- المنظر من شباكي مغطى ببياض الثلج
- المنظر من شباكي مغطى ببياض الثلج
فتحت الشباك عشان اخد صوورة .. لفحتني نسمة متجمدة .. اخدت كم لقطة وقفلت الشباك بسرعة
حركة في منتهى الغباء :) نسيت ان الغرفة فيها تدفئة وبرة الدنيا تلج
- اتضح ان الشمس الها تأثير كبير في نفسية العرب
يعني في شهر ستة وسبعة لما كانت الشمس بتغرب الساعة 10 ,, كان فيه امتعاض جسدي من كثرة الضوء
وفي هادي الفترة الشمس بتغرب الساعة 5 إلا كزا دقيقة .. ولكن الظلام والعتمة فعليا مستمرة طول اليوم
امتعاضي الجسدي والنفسي في هادي الفترة اكبر
- ممكن في خلال اليوم الواحد اني امر بخمسين حالة مختلفة نفسيا .. وهادي مش مبالغة
ممكن في نفس اللحظة اكون مبسوطة وفجأة الاقيني بعيط او العكس .. او مثلا اكون نشيطة جدا وبعدين ما تمر دقيقتين الاقي نفسي بدي اروح انام
- زمان اول ما اجيت .. كان اقل مشوار او فسحة تخليني مبسوطة لشهر قدام
في هادي الفترة تأثير الاشياء المفرحة قليلة المدى جداااا .. لا تتعدى صباح اليوم التالي
- سما بروكسل مافيها نجوم
لكن بنبسط لما بشوف القمر .. على الاقل فيه اشي بيجمعني مع الناس الي بحبهم
- اشتريت تذكرة لحفلة نانسي عجرم أخر الشهر ,, الكل استغلاها بس انا قلت لحالي .. هو انا اكم مرة بالعمر رح يصحلي فرصة اشوف هالمخلوقة على الطبيعة
- اليوم بخطاب الرئيس ابومازن .. اتذكرت اني فعلا مقتنعة بهادا الرجل كرئيس .. بس هل يا ترى كلامه هو اللي حلو وبس ؟؟
ملحوظة : والله اتغلبت من وين اجيب رابط الخطاب .. كل موقع كاتب عنوان مستفز اكتر من التاني
- كل الاخبار الي بتيجي من غزة بتأكد انو الشعب هناك خلص فاض فيه الكيل
على رأي واحدة صاحبتي امبارح .. وحدة صاحبتي تانية من نابلس بتسألها عن الوضع في غزة
فا صاحبتي الاولانية جاوبت : هو اصلا فش وضع بغزة عشان اوصفلك اياه
- السؤال المهم .. امتى ربنا بدو يحن علينا ؟؟ معقول خلص وصلنا لمرحلة انو الضفة وغزة صارو زي كوريا الشمالية وكوريا الجنوبية ؟؟
- مممم ما بعرف كان في بالي شغلات كتير احكيها .. اللهم صلي عالنبي
- عنجد اكبر عزاب بالدنيا هو عزاب الانتظار
خاصة لو كان انتظار اشي قد أو قد لا يحدث
- بهادي الفترة عنجد صرت بستغرب من حالي .. مش هادي علا انا بعرفها صرلي 23 وعشرين سنة
نقصوا كم سنة الي الواحد بيكون فيها بيبي بفهمش اشي
بس لأ انا صرت مش عارفاني
- الحمد لله الي عشت اليوم الي البس فيه الكوفية الفلسطينية عادي جدا .. من غير ما حد يعتبرني تبع الناس هادولاك مش الناس هادولا
- صحيح انا بكره الناس هادولا والناس هادولاك عالسبحة .. بس بعرفش ليش اليوم صحيت من نومي وانا بحكي .. والله يمكن الحل انو الناس هادولا ياخدو الشقتين ويريحونا عااد
- مش ضروري كل اشي بكتبه يكون مفهوم الكو ..
- الحمد لله انو الفيس بوك ما كان لسه موجود وانا بدرس ايام التوجيهي ولا الجامعة .. الله ستر
- الشئ بالشئ يذكر .. حاولت اني اقود حملة لمساندة مطلبي بإضافة علم فلسطين للعبة المذكورة اعلاه .. والحمد لله ناس كتير ايدت .. وناس كتير قالت اه وناس قالو لأ .. وبعدين كل لوحة النقاش التغت واستبدلوها بمنتدى جديد ابيض يا ورد !
- امتى اخر مرة وصلت لشعور انك تايه في الزمن .. ومش قادر تميز حالك وين في العالم الكبير
- في عمر الزمن .. ماذا يساوي شهرين ولا تلات شهور ولا اربع شهور ؟؟ لا شئ يذكر !! طب ما تقولي لحالك هادا الكلام يا استاذة انتي
- على فكرة هادا البوست ممكن جدا يكون اشي مش حلو بالمرة .. بس مش لازم كل اشي يكون برفكت في الحياة
- استفتاء عام يا معشر المدونين .. الاحسن يضل اسم المدونة زي ما هو ؟ ولا اغيرها ؟ ولا اعمل مدونة تاني باسم تاني وخلص ؟ ولا مش فارقة اساسا ؟
- مين متفق معايا ان متعة قراءة التدوينات في الريدر اقل بكتير من لما كنا بنتنقل في المدونات بواسطة اللينكات والزيارات العشوائية ؟
- نفسي اعرف مين الي اخترع الحدود في الدنيا
اشي بيكسر القلب ان الحدود اختفت ما بين بُلدان مختلفة في كل شي .. ومازالت موجودة بين "منطقتين" في بلد واحد "افتراضيا"
- هو الاهم انو الواحد يعمل الصح ؟ ولا انو يكون سعيد ؟
- صارلي زمان ما جاوبت على تاجات .. محدش عندو تاج عايز يتجاوب ؟؟
- هو انا ليش ما كتبت ايام ما مات محمود درويش؟ ولا ايام ما فاز اوباما ؟ ولا ايام ما زاد الحصار في غزة لمرحلة الاستغاثة ؟ ولا مثلا ليش ما اكتب عن الانفاق الي صاروا يهربوا فيها كل شي ؟ من الابرة للـ .. أسد !!
- شكلي طولت .. يعني يا بكون عندي حالة جفااف يا إما بكتب جريدة
شكرا كتير لكل واحد وصل بالقراءة لحد هنا
