عداد الحرب: اليوم العشرون

مازالت الحرب على غزة مستمرة

دخلنا في اليوم الواحد والعشرين

ياااااااااه

الرقم بيجري بسرعة

كل الارقام بتجري بسرعة

1150 شهيد و5000 تقريبا جرحى

ومش عايزة اقتصر مأساة الحرب الى ارقام فقط..

وصلتني بعض التعليقات على التدوينة الماضية .. حقيقة انها احزنتني بشدة

وهارد على كل تعليق فيهم بشكل منفرد ان شاء الله


بس .. انتو مش حاسين بمعنى انك تكون تحت القصف 24 ساعة 21 يوم متواصلين

حد فيكم جرّب احساس صاروخ إف-16 ولا صاروخ أباتشي؟

مجرد صاروخ واحد؟؟

حد فيكم جرب المعيشة من غير كهربا لعدة ايام متواصلة؟؟

طب حد فيكم جرب الاتنين مع بعض ؟ طول المدة هادي؟

انا ما جربتش

لأنو وقت ما كنت في غزة من حوالي سنة ..
صح كان فيه قطع للكهربا لفترات طويلة .. مصحوبا بقصف في بعض الاحيان .. بس هو بيكون يادوب .. صاروخ واحد ولا اتنين بالكتير ..
وصح كان فيه ايام سودا الي يكون فيها اجتياح لمنطقة من المناطق .. لكن كان بيكون محدود .. عمرهم اليهود ما وصلو للاماكن الي وصلوها او بيجربو يوصلوها .. زي تل الهوا مثلا
صح كان فيه ايام بيسقط فيه شهدا كتير وجرحى .. لكن مع الاسف .. لما تقارن 20 ولا 30 شهيد مش زي لما يكونو 1100
صح عشت بالحصار .. وانا نفسي كنت محاصرة لعدة شهور قبل ما اعرف اسافر .. لكن ما عشت الحصار مع الحرب!!

فيه فيديو لقيته امبارح .. صراحة انا شخصيا ارتعبت منه .. لأنو ولا مرة عشت اشي مشابه .. بالرغم من معايشتي للانتفاضة الي قامت من 7 سنوات .. بس هادي حرب حرب بمعنى الكلمة
الفيديو اتصور اول يوم في الحرب .. وقت طلوع التلاميذ من المدارس .. اسمعو الصراخ الجماعي

ولا مرة كان الهجوم جماعي كدة مرة وحدة

ولذلك انا احيانا ما بقدر استوعب الي بيصير ..
فا يعني انا مقدرة شعور واحد منكم لما يكون ببساطة مش عارف شعور الناس وهما تحت القصف

هادا كمان فيديو .. الي مصور مصري مش عارفة ايش الي موديه على غزة
و بتقدروا تسمعو صوت سقوط صاروخ إف-16 -طبعا على الحقيقة اصعب واقوى بكتير-

شعور القصف هو شعور لا يمكن حد يوصفه .. الا لو عاشه
وانا متأكدة انو الآن مضاعف اضعاف مضاعفة..

==========================

حابة احكي عن موضوع اتصالات الدعم لغزة ..

بعرف انها حملة كبيرة وفي ناس كتير مهتمين فيها
لكن للأسف فيه عدة اشكاليات عن الموضوع
لأنو للأسف الشديد اصبح من شبه المؤكد ان الخطوط الاتصالات مخترقة .. وان اسرائيل استغلت الحملة .. واصبحت بتتصل في الناس كأنهم عرب .. اولها بيقولو كيف حالكم واحنا معكم وكدة .. وبعدين بيصيرو يسألوهم اسئلة وبيكون واضح انها اسئلة لجمع المعلومات
وصارت مع اهلي

الهي يهدهم يارب ... يعني حتى الدعم المعنوي حرمونا منه

فا بدي احكي انو يا جماعة لو حد فيكم عايز يتصل لدعم غزة .. فا رجاءً رجاءً:

- لا تكلموا بوقت متأخر ! مكالمات نص الليل والساعة 2 و3 الفجر هادي مخيفة ! اتصلوا بوقت مناسب يعني العصر ... بوقت المغرب .. مش بعد هيك

- لا تسألوا اي سؤال للناس الي بيردو عليكم .. ولا حتى اسماءهم ولا حتى تسألوهم كيف الوضع عندكم .. احكولهم انو انتو متضامنين معاهم وبتدعولهم وبس

- رجاء .. لو اتصلتو بحدا وماردش عليكم او قفل السماعة بوشكم ما تزعلوش .. وما تتهموهم بقلة الذوق ..لأنو للأسف صار فيه حالة شك كبيرة عند الناس ولازم تعذروهم

- طيب هل معنى كدة اني بنصحكم بعدم الاتصال؟ لأ طبعا .. اتصلوا وعبرو عن مشاعركم .. لكن كونوا حذرين بالكلام وما تطلبوا من الناس انها تحكي بالتفصيل عن الوضع

في كمان شريفو-أحزان شجر البطاطا حكا عن الموضوع

=====================

تاني نقطة حابة احكي عنها .. الجدل حول فتح معبر رفح .. واسطورة ان المعبر لو اتفتح الفلسطينيين حايحتلو سينا

وفي هادا الموضوع بحب أأكد على حاجتين ..

اولا ان الي بيحصل في غزة هادا حالة حرب

زي العراق زي لبنان .. كويس؟

وايام حرب العراق الي حصل انو جميع الدول التي تشترك مع العراق في الحدود (ايران, سوريا الاردن .. مش عارفة بالنسبة للكويت) .. فتحت لللاجئين العراقيين المعابر
لبنان ايام حرب لبنان .. معظم سكان جنوب لبنان تم ايواءهم في سوريا
وهنا بدي اسأل سؤال .. هل لما بعض لبعراقيين لجئوا الى الاردن .. هل فضيت العراق من العراقيين ؟؟ وهل في حالة انتهاء الحرب لن يعودوا الي العراق؟؟ اجابة السؤالين هي لأ ..
هادي اولا

ثانيا .. حصلت قبل هيك والغزازوة المحاصرين اقتحموا معبر رفح والجدار الحدودي .. كأحد نتائج الضغط والحصار .. اشتروا حاجاتهم ورجعوا تاني .. وبقول اشتروا .. بفلوسهم يعني
سؤالي هنا .. الغزازوة الي رجعو .. ماكانوش عارفين انهم راجعين على سجن غزة مرة تانية؟ طبعا كانوا عارفين .. لكن رجعوا

الي عايزة احكيه .. ان مع احترامي الشديد لمصر والمصريين .. سينا مش احسن من غزة في حالة الهدوء .. ومش هي منتهى املنا كغزازوة ان احنا نروح نعيش فيها ونحتلها
بس في حالة الحرب .. الناس المدنية عايزة ملجأ تحتمي فيه ! لحين انتهاء الحرب ثم يعودوا

لكن بعيد وبكرر انو لا يمكن ابدا اغلط في حق مصر ولا المصريين .. لأني عشت في مصر وعندي اصحاب وذكريات في مصر .. ومش عايزة اكون ناكرة للجميل .. ومش بطالب اي حد بأي حاجة .. لكنه مجرد توضيح موقف ليس إلا ..

================

بالنسبة للمساعدات والتبرعات ..

انا متأسفة جدا اذا كان كلامي عن هادي النقطة جرح او دايق اي حد فيكم البوست الي فات .. لأنو هادا كان شعوري وسامحوني لو كانت بتعز عليا نفسي شوية

عموما عرفت ان تبرعات الدم بتوصل فعلا للمستشفيات ..

وبالنسبة للتبرعات الاخرى (المواد الغذائية مثلا) هيها اسرائيل اليوم قصفت مخازن الاونروا (احدى هيئات الامم المتحدة) وللأسف انحرقت كميات كبيرة من الدقيق والقمح والمواد التموينية الاخرى
فا يعني .. عوضكم على الله في مساعدات الاكل

اما التبرعات المادية فليس عندي ادنيى فكرة ان كانت تصل .. ولو كانت على شكل تحويلات في البنوك فغزة اصلا ما فيهاش سيولة ان حد يسحب من فلوسه ورصيده الشخصي اساسا .. العملات الورقية مش متوفرة في البنوك ومن فترة كبيرة ..

.
.
.

مش عارفة بجد كيف انهي هادي التدوينة..
بجد عايزة هادي تكون اخر تدوينة بكتبها في الحرب ..
لكن شكلي لازم ابدأ اتعود على كدة

.
.
.

عداد الحرب: اليوم الرابع عشر

طيب .. وهي الحرب الاسرائيلية على قطاع غزة وصلت لليوم الرابع عشر

وكانوا بيحكو قبل شوية على الجزيرة .. انو مشاركة البني آدم المفروس (ألا وهو انا) في اي شكل من اشكال التظاهر او الكتابة او ما شابه بيساعد على التنفيس

انا عايزة انفّس يا ناس !!

يعني اهلي الي هما تحت القصف وجوة الحرب نفسيتهم احسن مني
وكل مرة بكلمهم بيقولولي خلص اتعودنا
وما تقلقيش علينا .. واللي كاتبه ربنا رح يصير
المهم انتي ركزي في دراستك وامتحانات (الي هي بعد اسبوع من اليوم) وسيبك من الاخبار

بس مش قادرة بجد حاولت ومش قادرة

وفيه كلام كتير واقف في زوري .. ولازم يطلع

ارقام الشهداء والجرحى

رح تضل تزيد وتكتر .. والمخيف هو ما وراء هذه الارقام
محدش بيعد البيوت الي اتدمرت
محدش بيعد اكم عيلة ماتت بالكامل
محدش بيعد اكم شخص اصبح وحيد في هذه الدنيا بعد ما فقد كل افراد اسرته
محدش بيعد اكم واحد كان قبل الحرب معارض لحماس وهلئيت صار بدو يصير استشهادي
ولو بدنا نعمل زي اسرائيل الي بتعد الناس الي اصيبو بحالات فزع وهلع يا حرام
معناته محدش بيعد مليون ونصف واحد كلمة الفزع قليلة على وصف حالتهم
محدش بيعد اكم واحد فقد قدرته على الحياة بشكل طبيعي
ياختي حتى الموت حرمونا نموته بالطريقة المحترمة والطبيعية

اسرائيل

اغبيا !! يعني بس افهم هما ايش بدهم؟ بدهم يقضو على حماس
طيب ما الشعب هو الي جاب حماس وافرز حماس
حماس مش كائنات فضائية اجت من المريخ
والشعب الفلسطيني في غزة صار بعد الحرب حاجة من اتنين
يا إما حمساوي من الاصل
يا إما مع حماس لأنو البديل هو الاستسلام
وبدال ما نكون طفشانين من حماس والي عملته حماس
صرنا بنساند حماس وبندافع عنها وبندعيلها ..
الشعب الفلسطيني كله صار حماس
يبقى الحل انهم يقضو على الشعب كله
هما مش عندهم مفاعل نووي؟ طب ما يرمو قنبلة نووية ويموتونا كلنا مرة وحدة ونخلص

الشعوب العربية

انا عارفة .. فيه ناس كتير حاسين بالعجز وبالظلم .. ويمكن يكون هادا اصعب من التواجد داخل الحرب
بس انا مش حاسة انه الشعوب العربية بتقدر تعمل اشي وما عملته
بس نفسي يبطلو الشعارات الفارغة ومهاجمة الحكام العرب
ما هما حكامكو انتو ! ليش راضيين عليهم !
ولا هما الشماعة الي موجودة عشان تعلقو عليها فشلكم كشعوب؟؟
صح اتبرعتو وساندتو وطلعتو مظاهرات وحاولتو باللي تقدرو عليه
بس التراحم والمساندة مش مطلوبة بس بوقت الحروب
احنا كلنا محتاجين بعض بكل وقت وبكل الاحوال
بيكفيكم تفرق وتشيع وتعامل سئ بيننا وبين بعض

الانظمة العربية

منهم لله
كل واحد قاعد بقصره ولا على باله وبيجهز ابنه للخلافة
وبيشجب ويندد من مكانه .. هادا ان طلعله صوت
وان كتّرت .. قاعد بيجري وبيبوس الايدين بس عشان الوصول لهدنة ومؤقتة كمان !!
يعني عندي تصور انو حتى لو اسرائيل هجمت على بلدناهم انهم رح يضلو على نفس الحالة
وهايطالبو شعوبهم بضبط النفس والعقلانية
ويلجأو لمجلس الامن عشان يوقف العدوان !!

حتى احنا كفلسطينيين حكامنا مش احسن ولا حاجة
انا مستنية بفارغ الصبر انو هادي الحرب تخلص عشان اشوف رح يرجعو لعقلهم ولا لأ
اظن بيكفيكو هيك مناكفات وتبادل اتهامات وكل واحد يجيب الحق على التاني
احنا مش مستحملين منكم اي خلاف واحد بعد ما الحرب تنتهي
بيكفي هيك

مجلس الامن

ال ايش اخر نكتة سمعتها من واحد امير عربي .. بيدين فيه موقف مجلس الامن العاجز عن وقف العدوان
نعم ياخويا ؟؟ وانت الي مش عاجز يعني ؟؟
يعني حتى لو في الاحلام طلع مشروع قرار بيقول اسرائيل بلد متجبر وظالم .. فيه اختراع اسمه فيتو
(اشك انو فيه بلد غير امريكا بتستخدم هادا الاختراع)
ولو لو امريكا لمرة وحدة استحت على دمها وما استخدمت الفيتو .. وطلع القرار
مين قال انو اسرائيل رح تسمع الكلام وتتأسف وتقول سوري يا جماعة .. اخر مرة اعمل هيك

قصة التبرعات والمساعدات

انا حزينة جدا انو هادي الحرب وما قبلها الحصار .. حوّلت الفلسطينيين لشعب من المحتاجين
بتضايق لما وحدة من الاخوات المدونات تسألني اذا كانت المساعدات بتوصل فعلا لاهل غزة
بعرف السؤال هدفه برئ
بس بيوصلني بصيغة شبيهة لـ: طيب واهلك في غزة بتوصلهم فلوس الشحاتة الي بندفعها لكم؟
نفسيا السؤال مؤذي
وبعدين ما هي غزة متحاصرة بقالها ما يقارب السنة
كان لازم تحصل حرب عشان تستوعبو انو الناس محتاجة مساعدات؟؟

ما بعد الحرب

انتو مش مستوعبين كمية الدمار الموجودة في غزة
البلد صارت محتاجة بنا من اول وجديد
حرفيا ما ضلش اشي بالبلد
لا مباني ولا مقرات ولا جامعات ولا جوامع ولا ناس
واصلا اصلا كان الوضع تعبان
بجد في بعض اللحظات بتساءل حتى اذا كانت دراستي او حياتي كلها ذات معنى
خلص استوعبت انو فش فايدة
احنا بلد متعوس انكتب علينا الهم مهما عملنا
بنحاول وبنعافر وبنقول وبنعيد وبنزيد
وبالآخر حياة الواحد فينا بتسواش بصلة
مش يأس لا سمح الله
بس تساؤل فلسفي كدة عن مغزى وجودنا في دنيا بشعة لهادي الدرجة
حتى الي بيموت ما بيضل شقفة وحدة .. لأ بيصير اشلاء
وبدو كمان مناشدة عشان يلاقي قبر يلمه


من الآخر .. الوضع فش ازفت من هيك
وشكلو مكتوب علينا نعيش ونموت واحنا على هادا الوضع
منيح انو ديننا بيحكي انو فيه جنة ونار في الآخرة
على القليلة بعد ما نموت يمكن وجايز ومحتمل نشوف شوية نعيم من الي انحرمنا منه في الدنيا
هادا على فرض انو احنا رح نستحق الجنة

واخر قولي ان

اشهد ان لا اله الا الله

واشهد ان محمدا رسول الله

Gaza, The untold story

When I first created my blog, I meant to write in Arabic ..


but in some situations - like those days - i feel that there needs to be something written in English to talk about my beloved city Gaza ..


Today I found a blog written by a palestinian guy who is actually living under the daily fire of the Israeli army


so his witness may be more powerful than mine ..

Gaza Strip, the untold story

من هي فلسطين

اشتركت مع زميلي المدون الفلسطيني بهاء في إنشاء مدونة جديدة بعنوان

من هي فلسطين

المدونة الجديدة غرضها الاجابة عن اسئلة عامة عن الوضع الحالي في فلسطين

هانكتب ببساطة عن حقائق عديدة يجهلها الناس بشكل عام

وعن امور قد تبدو معروفة لكل مواطن فلسطيني
لكنها غير واضحة او غير مفهومة لأي انشان من بلد تاني

المدونة موجهة بالأساس لأخواننا المدونين في العالم العربي

وهانكون مستعدين للإجابة عن اي تساؤلات ولو عن امور بديهية بالنسبة لنا

انتو متعودين مني على اسلوب معين في الكتابة

وححاول قدر الامكان اني استمر بنفس الاسلوب

لأن غرضي ببساطة من هادي المدونة هو التعريف عن فلسطين ..

بعيدا عن الاخبار .. وكتب التاريخ

مدونة من هي فلسطين


تحياتي