معكاش فكــّة يخو ؟؟



والله يا جماعة انو غزة هادي بلد مسلّي

يعني طول الوقت كدة فيها احداث وقصص غير شكل .. ولا يمكن تلاقيها بمكان تاني

(زورونا تجدوا ما يسركم)

رح احكيلكم القصة الي صارت معي .. وانتو عليكو التحليل والتفسير زي ما بدكم

هادا من يومين تلاتة كدة .. دخلت على محل عشان اشتري شوية حاجات (عادي يعني) ..

المهم بدي احاسب الراجل .. قال بدو كزا .. رحت مطلعاله ورقة 100 شيكل .. ودار الحوار التالي:

الراجل: معكيش فكة؟

انا: للأسف معيش ! هما هالـ 100 شيكل

الراجل: طيب .. وانا كمان معنديش !
خلص يا عمي خليهم علينا .. وبأي وقت تاني بتيجي تدفعي

انا : لا يا عمي بنفعش .. سواني اروح افك من المحل الي جنبك وبرجع

طلعت من المحل .. دخلت جنبه مكتبة صغيرة كدة وقرطاسية..

انا : يا عمو ممكن لو سمحت تفك لي 100 شيكل؟

الراجل: بفلك ياهم بورقتين 50

انا : طب اذا ممكن وحدة من الـ50 تعطيني اياها عشرات .. هيني شايفة فيه عندك بالدرج

الراجل: لا يا عمي بفرطش فيهم هادول العشرات .. بعرفش ابيع بعدين

انا: طيب .. ماشي .. باخد الخمسينتين .. شكرا كتير

طلعت بعديها بكلم حالي .. يختي وين راحت الفكة ؟ يلا هيني فكيت خمسينات
دخلت محل تاني تبع خضار وفاكهة .. محل كبير من المحلات المركزية بالبلد يعني .. قلت اكيد هادا عنده!

انا: بالله يخو لو سمحت .. ممكن تفكلي الـ 50 شيكل هادول عشرات؟

الراجل: والله يختي ما معي ! يعني بنحب نساعد الناس احنا ! والله لو فيه معي كان اعطيتك بس والله ما فش

انا: طيب طيب خلص مش مشكلة .. يسلمو كتير على كل حال

الراجل كان على وشك يطلع مصحف ويحلفلي عليه ... شكلي مش اول حدا يطلب منه هيك طلب!

الموووهم .. رحت داخلة كماااان محل .. هادا تبع بوانيت ببيع مكياجات وشالات وشنط
معقول هادا كمان ... ؟

انا: السلااام عليكم

الست: وعليكم السلام ورحمة الله

انا: يختي بالله بس لو فيها غلبة .. تفكيلي هالـ 50 شيكل

الست: يعني لو لقيتي فكة ياريت تخليني افك منك

انا: هو فيه مشكلة فكة بالبلد ولا ايش؟

الست: مهو فش بيع اصلا عشان يكون فيه فكة

انا: بيعين الله ! طيب شكرا إلك

طلعت بجر اذيال الخيبة .. الست كان شكلها مش طايقة حالها .. ورجعت على المحل الاولاني ..

انا: الظاهر فعلا فيه مشكلة بالفكة :S

الراجل: منا حكيتلك من االاول خليها لبعدين

انا: طيب اكتب عندك ورقة ولا حاجة اسمي ...

الراجل: لا يا عمي خلص .. مبين عليكي بنت ناس واكيد مش رح تضحكي علينا .. الله يسهل عليكي

انا: .... طيب كتر خيرك .. ان شالله اول ما يصير معايا فكة برجعلك


طلعت من المحل بضرب كف بكف .. وكتبت ستيتس بسأل .. هي البلد فيهاش فكة فعلا ولا انا الي بضل اوقع مع ناس معهمش ؟؟

قلت يمكن مني الغلط ولا كنت منحوسة يومها باين :p

المهم الردود الي اجت بتقول انو لأ فعلا فيه مشكلة ! لدرجة وحدة صاحبتي ردت انه حتى عند محل الصرافة الراجل بسألها اذا معها 12 شيكل ولا 13 شيكل فكة !!

حتى في البنك لما بتروح تقبض راتبك .. نفس السيناريو .. فش معك فكة عشان اعطيك ماسك؟

( اكم مرة صرت كاتبة كلمة فكة !)

فعلا هادا اشي مش عارفة افسره ولا لاقياله سبب ! اشمعنى يعني؟ حدا ناوي يحتكر الفــَكايــِك ولا ايش؟

يعني فيه فترة مرت كان النص شيكل مقطوع من البلد .. بس هالايام كل الفئات مختفية !!

تفتكروا ايش القصة ؟ اكيد فيه إن ّ في الموضوع


معكاش فكــّة يخو ؟؟ معكاش فكــّة يخو ؟؟ تمت مراجعته من قبل علا من غزة في يوليو 14, 2010 تقييم: 5

هناك 28 تعليقًا:

  1. هي مشكلة الفكة وصلت لفلسطين
    دي عندنا في مصر كماااان
    خالص تحياتي
    موجة

    ردحذف
  2. ان شاء الله فلسطين يبقى لها عملتها المستقلة عن قريب

    ردحذف
  3. علا فعلاً هاي كارثة وأزمة بكل المقاييس النفسية والمادية والاقتصادية وذكرتيني بقصة حدثت معي قبل فترة
    كنت بدي أروح ع الجامعه وكان عندي محاضرة ع الساعة 8 وكنت حاسة حالي عاملة إنجاز وطني وتاريخي اني صاحية بدري مشان اروح ألحق محاضرة الساعة 8
    كالعادة وقبل ما أطلع من البيت بفتش بالمحفظة مشان أتأكد شو في معي مصاري مشان ما اوقع بحرج
    المهم فتحت لقيت معي 10 شيكل ماسك و100 شيكل ماسك
    قلت يعني ان شاء الله تكون بسيطة ويكون السواق معه فكة من مبارح
    وقفت ع اقرب مكان جمب البيت مشان أركب منه
    اول سيارة اجت حكتله مفترق الصناعة حكالي لاء وراح
    التانية مشيت والتالتة زبطت معي وركبت
    كان قاعد قدام جمب السواق شاب وجمبي بنتين
    قلت بعقلي معه 3 يعني اكيد دافعين كل واحد اقل اشي شيكل ويمكن يكون معه 5 شيكل من الاصل وشيكل نسي يعطيه لابنه مصروف يعني هي 9 شيكل باقي العشرة اللي حعطي ياها
    المهم طلعت العشرة شيكل وبكل ثقة الدنيا حكتله تفضل
    السواق اطلع فيا نظرة غريبة عجيبة وصار يبهدل ويعلي صوته ويحكيلي انا فاهم هاي الحركات
    انا انصدمت بقول بعقلي حركات ايش يعني !!
    حكالي قوليلي بدكيش تدفعي مش تعطيني عشرة شيكل من وين بدي أجيبلك فكة وصار يحكي كلامي يمين وشمال وكل شوية يزيد علي صوته
    وفجأة شفت الشاب اللي قاعد قدام بطلع من جيبه شيكل مشان يدفع عني
    انا هنا لو كان في عندي عقل راح عقلي
    هدا اللي ناقص الناس تدفع عني
    قمت بكل شجاعة حكيت للسواق بعد صمت طويل لو سمحت وقف عنددددددك
    ونزلت بنص الشارع وطبعا ما اخدت العشرة شيكل
    وفجأة وانا بمشي لقيت اشي بنحدف عليا
    طلع السواق راميلي العشرة شيكل بوشي
    انا كملت مشي وما اخدتها لانه صعب الاقيها ومابدي اضيع وقت وانا بدور عليها
    بس وين النكته
    انه السواق عملي قصة وحدوته مشان اعطيته 10 شيكل فمابالكم لو ركبت مع سواق تاني اعطيه ال100 شيكل اللي معي
    طبعا كل هاي الاحداث بتصير معي وانا قاعدة بقول ياريتني ماصحيت بدري وبتنقص محاضرة الساعة 8 اللي شكلي مارح احضرها بعد كل هالبهدلة
    المهم ضليت امشي بالشارع ومش لاقية ولا محل فاتح لانه الدنيا كانت بدري كتير
    بالاخير اتصلت ع ماما اللي كانت وصلت ع شغلها وخصلت وخليتها ترجع توصلني ع جامعتي
    ومن يومها حرّمت أطلع سيارات عن الشارع بصراحة لانها بهدلة وقلة قيمة
    واسفة لو طولت عليكم .. بس علا ذكرتيني باللي صار معي وياما في قصص صارت ع موضوع الفكة :)

    ردحذف
  4. هههههههه موقف طبيعي يا علا :) بيحصل دايما ،، نور اعذريني بس ما عرفتي تردي الرد الصح على السواق!! انا من قراءة الموقف ولعت كيف اللي صار معاه!!!
    المهم >>>
    اول اشي الكل بيحكي وبيعيط انو اسرائيل ما بتدخل الفلوس عالبلد عشان هيك ازمة الفكة، هادا طبعا سبب خلينا نحكي ماشي يا عالم صادقين
    بس برضو فيه مرض عند بعض عالم انو اول ما يقرب رمضان كل واحد بيبدا يخبي بالكنز اللي اسمو الفكة اللي بيعمل المشكلة هادي مع العلم السنة ازمة الفكة بادية بدري،، يعني بالله عليكم لو خليتو الدائرة ماشية بشكل طبيعي شو المشكلة بالامر ؟؟!!!
    ما هيا لووووب وبالاخر بتقفل بس هما بيخلقوا الازمة لنفسهم وبعدين تيجي في راس العالم الطيبة اللي بتجري على كل المحلات تدور على فكة وبالاخر عالفاضي تستلسم للامر الواقع ;)
    يعني اوك فيه ازمة والها سبب بس برضو في اسباب منا احنا بنخلق فيها الازمة
    هادا طبعا تحليلي الاستراتيجي لهالمعضلة :)
    تحياتي علا

    ردحذف
  5. صباح الخير اخت علا
    شكرا كتير الك لطرحك مواضيع ومشكلات بتواجه الجميع
    مشكلة الفكة هاى موجودة ع الكل بس انا برأيي انه في ناس بتستغل وضع الاخرين
    على سيبيل المثال :-
    لما تتوجهي لاحد المحلات عشان الفكة ممكن ما يفك الك بس لو حكتيلو بدي اشتري اغراض مثلا على طول بيسير في فكة
    سبحان الله يعني غريبة طريقة العالم بالتفكير
    يعني هادا الراجل ما فكر انه ممكن تكونى بحاجة لهاداالمبلغ بدون ما ينقص منه شيكل واحد ؟

    الشي التاني اللى فعلاموجود وبنشوفوه اغلبنا
    البنوك دايما ما عندها فكة متل ما انتى زكرتي ومحلات الصرافة نفس الشي بدو فكة عشان يعطينا ماسك

    بالنسبة الي صار معي قصة صغيرة
    جارنا عنده سوبرماكرت وفي اكتر من محل بالمنطقة بس بشتري من عنده لانه ابدى من غير بكل شيكل
    المهم بقله بس لو تعطيني 3 شيكل اوصل النصر مشوار صغير لانه معي 100 شيكل وما راح يفكها السواق ويعملي حدوته وانت لو معك فكة فكلي ياها
    فبيقلي لا ما معي فكة
    ما بينفع تاخد شيكل واحد ؟
    استغربت منه وحكتله انا محتاج ل 3 شيكل
    بيقلي روح ركب وروح مشي وخلص لايش يعني تركب روحة ورجعة ههههههههههههههه بالله عليكي لو مكاني شو بتعملي ؟
    المهم ما بدي اطول عليكم ,,, دبرت حالي ورحت مشواري
    وتعلمت درس جديد كالعادة متل كل يوم
    تحياتي الك عــلا وموصول ايضا للجميع

    ردحذف
  6. موجة
    ههههههه يالهوي وانتو عندكو ازمة في الفكة بمناسبة ايش ان شاء الله ؟؟؟


    شارم
    امنية صعبة شوية كتير !.. بس ان شالله


    نور
    صرت كل ما بركب سيارة بتزكر قصتك !! فعلا اذا كل هادا وانتي عاطياه 10 شيكل .. كيف لو اعطيتيه 100 !! يا الهي انا لو محلك كان اكيد انفجرت عياط في نص الشارع :S عنجد سواق قليل الزوق


    ابراهيم
    فعلا الي بتحكيه فيه ناس كتير بتحكيه على قصة انو الناس بتخبي الفكة عشان التعييد .. بس يعني هيك بيكونوو باديين الازمة تلات شهور قبل الموعد !!! حرب استباقية يعني هههههه
    الي مستعرباه انو اصلا محدش حكا عن سبب الازمة .. ةلا حتى بيجيو سيرة اليهود ! فا عشان هيك قلت اسألكم


    هشام
    قصة انو المحل لو بدك تشتري منه بيفكلك .. يمكن بس هادا الموقف الي صار معايا .. الراجل اصلا كان مستغني عن حقه ومعندوش مشكلة انو اروح ادفعله بيوم تاني .. وهو مش ضامني اصلا يمكن اروح وما ارجعش ! ومع ذلك سابني اطلع بالاغراض عشان مفش فكة
    كمان تعون الصرافة .. انحكالي انو ممكن الراجل يستغني عن مربحه ويمشّي الزبون من غير ما ياخد الـ 12 او الـ 13 شيكل
    والموقف تبعك ... معنديش تعليق غير انو ... تغير المحلات الي بتتعامل معها ههههه راجل زوق زوق الصراحة

    ردحذف
  7. ذكرتيني بأزمة النص شيكل لما كان السواق يعطيكي بسكوتة بدل الفكة اللي كان لازم يرجعلك اياها. مرة حكيت لسواق يبقى المرة الجاية انا بعطيك شيكل وبسكوتة بدل الشيكل ونص !!

    ردحذف
  8. ههههه، يعني آسف.. هوّا الموضوع أزمة كبيرة فعلاً، بس أنا ما قدرت أمسك حالي من الضحك، ع البوست وعلى رد نور برضو .. بتذكّر أيام النص شيكل برضو، اللي اكتشفنا في النهاية انّ شركة الكهربا بتستخدمه بعمل فيوزات معيّنة.

    ع قولتك.. غزّة هاي حكايات ولا عمرها بتخلص
    بس بتجنن يا علا، مش هيك؟

    ردحذف
  9. اماني
    ههههههههه لا هادي المرحلة ما عشتهاش للاسف :p
    طيب عمرك جربتيه هادا الاقتراح ؟؟ عايزة اعرف اذا نفع معك او ايش كان رد فعله السواق المحظوظ هههههه


    متشرد
    لا يا عمي اضحك زي ما بدك ههههه الضحك من غير ضريبة .. عاد انا نفسي اعرف اذا كان قصة النص شيكل هادي فيه الها دخل بالازمة تعت الفكة اليومين هادول .. يمكن حدا يكتشف بالاخر انو ال2 شيكل بعملوهم خواتم مثلا او الخمسة شيكل بعملو فيها ممممم بطاريات :D

    انا عارفة انو غزة بتجنن عالاخر .. غزة تتحدى الملل :p

    ردحذف
  10. لا طبعا ما طبقتها عملي بس كان نفسي والله بس السواقين كمان مغلوبين على أمرهم زينا يعني من وين يجيبوا اذا ما في في كل البلد من وين يجيبوا يعني ؟
    السواق المحظوظ يومها ضحك وقالي شو اعمل ما في نص في كل البلد ما انتي عارفة..
    وعلى فكرة مش بس بسكوتة كان ممكن يعطيكي قلم جاف أو باكيت محارم صغير !!!!

    ردحذف
  11. شر البلية ما يضحك
    يعينكم الله
    تحياتى

    ردحذف
  12. مساء/صباح الخير للجميع حسب توقيت مشاهدتكم لردي ،

    مواضيع مدونتك في غاية الروعة وخاصة إنها بتحاكي الواقع ، أو بالأحرى هي الواقع بذاته ،

    على سيرة الفكة ، أنا بشتغل بأغلب الوقت بدل أبي في الدكان ، هاي قصة الفكة والله كبيرة هههههههه

    مرة بتلائي محل فش فيه فكة وخاصة عندي ههههههههههه

    ومرة بتلائي في فكة والمشتري مش عاجبة إنو بدي أرجعلو الفكة كلها حديد قال بسحل البنطلون من التقل هههههههههههههههههههه بدو ورق أخف

    والله على قد ما هو الموضوع محزن مضحك لدرجة كبيرة

    أطيب التحايا إلك أخت علا على التدوين الرائع

    ردحذف
  13. بسم الله الرحمن الرحيم


    اول مرة اعلق لكن ليست اول مرة ازور المدونة

    بالنسبة للفكة فعادة بيكون الطلب عليها اكثر من العرض , لكن بما ان كثيرين اكدوا على نفس المشكلة بغزة فهذا يمكن له سببه وهو الحصار المصرفى على القطاع ,وفى نفس الوقت الفكة اكثر عرضة للأستهلاك من الوحدات النقدية الاكبر , فبتقل تدريجيا .
    لكن على كدة وفى ظل النقص الحاد فى الفكة الشيكل يسواله كام دلوقت؟

    ردحذف
  14. أماني
    لا عنجد فاتتني انا هادي المرحلة .. يلا منيح انو عاودت الاجرة رخصت لأنو مشكلة النص لسه موجودة اصلا واستفحلت زي ما هو واضح لباقي الفئات


    رجل من غمار الموالي
    ههههههه هادي هي غزة :D
    تحياتي


    حلمي
    اول اشي بشكرك على اطراء مواضيع المدونة :)
    اه مزبوط كلامك .. ايام الخير بنتدلل على الفكة وبنصير بدنا الماسك :p
    عموما .. الموضوع الو علاقة بمبدأ "خالف تعرف" الي ماشية فيه هادي البلد :D


    محمود المصري
    اه طبعا هو الموضوع اله علاقة بالحصار .. بس كمان الناس بتزيدها شوية وكلو بالاخر بيتعلق على شماعة الاحتلال
    بالنسبة لسعر الشيكل .. عادي ما اظنش انو ارتفع او انخفض بسبب مشكلة الفكة ! هو عموما الشيكل يساوي جنيه ونص مصري .. (الدولار يعمل 3.7 شيكل) حسب موقع التحويلات http://www.xe.com/

    ردحذف
  15. السلام عليكمـ

    " في غـزة كل شئ متوقع "

    ردحذف
  16. مش لحالك والله يا علا بتعاني ،، أنا ع العموم صرت احوّش فكة للزنقات ،، يمكن أنا اللي مخلصاهم من البلد
    بجد حاجة تقرف

    ردحذف
  17. السلام عليكم .. يسرنا في وكالة عمَّ الإخبارية أن نقوم بنشر تدويناتك في زاوية مدونات في موقعنا على الرابط www.amma.ps آملين منكم الحصول على عدم ممانعة في أقرب وقت ممكنْ .. وهذا البريد الإلكتروني للمجموعة القائمة عليه alaq-group@hotmail.com .

    ردحذف
  18. اللي بدوو فكـة يجيني ~

    ردحذف
  19. علااا
    صباح الخير ورمضانك كريم
    مبسوطة تعرفي ليش
    لانو موضوع التدوينة الاخير عندك وعندي تشابهو
    مايعني انو الامر فيه إنَ و صارت أزمة فكةةةةةةةةةة
    أما بالنسبة للفكة فوالهل مامعى فكةةةةة

    ردحذف
  20. رمضان مبارك يا علا
    مع تحياتي
    SONNET
    http://shayunbiqalbi.blogspot.com/

    ردحذف
  21. بحر الابداع
    فعلا .. وفي قول اخر .. غزة تتحدى الملل :)


    شمس الافق
    ايواااااا بتحوشي فكة !!
    يبقى انتي الي عاملة ازمة بالبلد ههههههههه


    وكالة عم الاخبارية
    اشكر لكم اهتمامكم .. لا مانع عندي طالما تم ذكر المصدر ورابط المدونة
    موفقين


    فراس
    Profile Not Available
    :D
    طب وين نروح طيب؟


    رندة :)
    هلا هلا والله
    شفتي كيف .. يعني هيك اتأكدت المعلومة ! شكلو غير نستنى لغاية ما العيد يعيّد وكل سنة وانتو سالمين .. بس شكلو الازمة انفكت شوية من اكم يوم ؟!


    sonnet
    رمضانك مبارك وكل عام وانت بخير :)
    شرفتني زيارتك

    ردحذف
  22. إنفكت عيني انفكت
    اعطيت السواق اليوم ورقة بعشرين رجعلي منها 19 شيكل
    لولولولولي

    ردحذف
  23. Soooooooo Silly

    ردحذف
  24. هههههههههههه والله مت من الضحك ..بس ما شاء الله اناس عندكم بيثقوا بعض كثيررر

    ردحذف
  25. ههههههههههههههههههه رهيبة يا لولووو :D
    علا هو انا عادي اقلك لولو صح :).. انا بحاول احكي معك يعني زي المؤدبيين وهيك عشانك زي اختي الكبيرة .. بس حاسة حالي بايخة ..فأنا قررت احكي معك عادي وانو زي رنا وهيك معلش يا لولو :D

    ردحذف
  26. عفكرة والله قصة الفكة هادي مش بس بغزة يا علا .. كمان هان بمصر ..اجت فترة الكل انجن ..تقولي كل واحد من البقالين خايف عالكنز "الفكة" تبعو :)

    ردحذف
  27. ههههه
    والسواقين اللي ما معهم فكة 2 شيكل ؟!!!

    ردحذف
  28. انا يا علا من يوم ما بدت قصة الفكة من اسبوع ونص وانا ايش بعمل كل ما بشتري اشي بطلع ورقة ام 100 شيكل او 50 شيكل وبخليه يعطيني الباقي فكة ،، وعلى هيك ،، لما صرت مجمع شوية فكة الي ،، برضو الواحد ما بيعرف شو الايام مخبيه اله ،، وطبعاً على شاكلتي كتييييير ،، ومن هيك اجت مشكلة الفكة اللي في البلد ،، يعني كل الناس اللي ماشين في الشارع معاهم فلوس ورق وما معهم فلوس حديد ،، علشان ما يخرخشوا ويطلعوا صوت مزعج يأثر أو يغطي على صوت المولدات اللي وجعت راسنا ،،، هادي غزة وما ادراك ما غزة ......... تحياتي

    ردحذف