فلسطين التي اسميها وطني





فلسطين ,, التي أسميها وطني


هي اكبر من مجرد البلد

واكبر من مجرد المدينة

واكبر من مجرد البيت


فلسطين عاملة زي الاسطورة

زي الارض الموعودة

زي الحلم

زي بنت حلوة بجدايل

لابسة توب فلاحي

سجينة لكنها بتتنفس حرية

اسيرة لكن بإيدها المفتاح






هل يا ترى حبنا فلسطين

هو نابع من كونها اسيرة؟


هل يا ترى حبنا لفلسطين

هو حاجة شربناها مع حليب امهاتنا

هو حاجة ورثناها بالجينات

هو حاجة كبرت فينا مع كل ليلة عشناها بلا كهربا

او بلا هدوء

او بلا حرية

؟؟


------------

حب فلسطين هو شئ

ما حد بيعلمنا اياه بالمدارس

ما حد بيعطينا عنه محاضرات ولا حد بيحرضنا عليه

حبنا لفلسطين .. وكرهنا لمن سلبها هو اشي

بيكبر جوانا من غير ما حد يحكيلنا عليه

وهادي شغلة ما في فلسطيني واحد بيقدر يلغيها من قلبه

مهما حاول

ومهما جرب يبعد


-------------

فلسطين ياللي بسميكي وطني ..

الله بيعلم اديش بحبك

لكن سامحيني ..

زمان .. كنت احبك اكتر

------------


فلسطين التي اسميها وطني فلسطين التي اسميها وطني تمت مراجعته من قبل علا من غزة في مايو 15, 2008 تقييم: 5

هناك 23 تعليقًا:

  1. بالفعل يا علا فلسطين
    ما حدا عملنا نحبها
    حبيناها بالفطرة
    والدليل انو الكل بحبها
    سواء فلسطيني ولا مش فلسطيني :)
    حبيت فلسطين لدرجة اني ضليت سرحان 4 ساعات افكر شو ممكن اكتب لفلسطين!!

    ردحذف
  2. فلسطين عاملة زي الاسطورة

    زي الارض الموعودة

    زي الحلم

    بالظبط كده...فلسطين زي حلم جميل
    قريب مننا اوي مع انه بعيد...

    انتي قلتي حاجه جميله اوي...فلسطين بتتنفس حريه...وهتفضل تتنفس حريه لانها حره

    مش عارفه اعلق اقول ايه
    بس يارب السنه الجايه في الوقت ده يكون الوضع غير...
    ربنا مايحرمك من حبك لفلسطين...

    ردحذف
  3. علا
    تفتكري لو حد حاول يعلمنا نحب فلسطين يقدر؟
    أظن صعب ومش ممكن
    لأن فلسطين شيء أكبر من الفهم
    حبها لغز وسر غامض
    سبب حبنا لها
    هو لأنها فلسطين وبس
    ومش محتاجين سبب تاني عشان نحبها

    ردحذف
  4. لو مكانك كان قلت فلسطين هي بلدي مش وطني
    بحس انو كلمة بلد اقرب
    وكلمة وطن كبيرة ممكن تسع الارض كلها
    عشان هيك سهل انك توصف البلد
    وصعب جدا انو نقدر نوصف كلمة وطن

    صح كلامك حب البلد ما بيتلقن ولا بيتعلم
    وهالشي مش قاصر بس على فلسطين
    عشان هيك لما كنت اشوف اي عمل درامي
    بيصور الفلسطينية على انهم جالسين بيحكو عن الصمود والارض وشوية شعارات عن حق العودة ورفض التفريط
    بشوفو عمل كوميدي ساذج ما بيفرق عن مسلسل عائلة الحاج متولي
    هالشغلات مخبية في الروح واحياناً كتير بنتفاجىء انها موجودة فينا
    لما تحين اللحظة انها تظهر

    بعتقد يا علا انك مش لاجئة
    وهادا ما بينقص من فلسطينيتك
    ولا بيزيد في فلسطينية اللاجيء

    بس الي بيمزو انو في عندو حلم عايش الو وهو انو يرجع لقريتو الاصلية
    وبعد ما يرجع راح يفرح بالاول
    بس بعدين راح يحبط لانو بطل في شي حلم كبير يعيش عشانو

    وما تلومي نفسك كتير لانو حبك زمان لفلسطين كان اكبر
    هاي طبيعة البشر
    المبذول مملول
    وهادا بيثبت انو احنا الفلسطينية
    بشر
    مش اساطير

    سعيد بفلسطينيتك

    ردحذف
  5. الوطن ما وطن فى القلب حبه... يعنى فلسطين ... حضن ماما... مدونين مصر ... كل اللى انت بترجعيله لما تشتاقى ... بصراحه انا وطنى بقى بلبع
    محل كباب و كفته فى اسكندريه

    ردحذف
  6. كلماتك جميله
    والكلام ده باين انه طالع من احسساسك
    بالقضيه
    طول مافى ناس زيك
    مؤمنين بقضيتهم
    مؤمنين بفكرتهم
    نفسهم يرجعوا لاوطانهم
    عاشقين لبلدهم
    عمر ما فلسطين هضيع

    ردحذف
  7. فلسطين مش اى وطن دي الوصمة اللى هيقابل يها كل العرب صلاح الدين يوم القيامة وهما مقهورين من الخجل انهم ضيعوها بعد ما رجعهالنا سالمة يوما ما

    ردحذف
  8. أي أحد يمتلك شيئا قليلا
    من الذوق والإحساس
    يسمي فلسطين
    فلسطين أيضا وطني
    ..

    ردحذف
  9. كل بلاد العرب اوطاني
    لكن اميل اكثر لما انتزع مني و لا يهدا بالي حتي تعود ارضي السليبة وان لم يكن في حياتي ازرع الفكرة في اولادي
    مصري يحب فلسطين

    ردحذف
  10. مقالتك رائعة .. شكراً علا.

    فعلاً فلسطين صارت كياننا .. وحبنا لها هو من حبنا لذاتنا .. إذا بدك تفسير لكلمة "وطن" فكلنا وطن وتراتبنا وطن وأرضنا وطن وتاريخنا وطن.

    ردحذف
  11. 3asef
    يلا المهم انك كتبت في الآخر
    :D
    فلسطين بدها هيك

    =========
    oma
    شكرا يا اوما
    ربنا يحقق دعوتك ويفرجها علينا آمين

    ========
    بهاء
    والله صح كلامك
    هي فلسطين وعشان هيك بنحبها

    ========
    المنفي
    ما بعرف اذا فعليا في فرق بين البلد والوطن
    انا بحس اكتر بكلمة وطن مش عارفة ليش
    انو البلد هي المطرح الي مكتوب بالهوية تبعتك بس الوطن ممكن تنتمي اله حتى لو انولد وعشت بمكان تاني
    اشي زي هيك
    اه كلامك صح تماما .. احنا ناس عادية بنحب فلسطين من غير شعارات
    لا والله انا نص نص
    .. فاهمة قصدك ..

    انا نفسي عاد الناس الي مش فلسطينية تفهم انو احنا مش اساطير ..
    وبنفس الوقت بحس انو المش فلسطيني .. المصري مثلا ممكن يكون بيحب فلسطين بردو لكن بطريقة تانية خالص عنا احنا

    انه نقاش كبير .. يؤجل الى وقت لاحق :D

    ========
    bahz baih
    هههههههههه
    وده تعريف جديد للوطن
    يارب كل واحد يبقى يرجع للوطن بتاعه بقى :p

    ========
    اوعى تفكر
    اهلا بيك في اول زيارة للمدونة
    اتمنى انو يكون مش مجرد كلام ..
    ويكون في فعلا ناس كتير مازالت مؤمنة بالقضية ونفسهم يرجعوا
    لأنو احيانا بحس اننا قربنا نيأس

    =======
    خالتي بمبة
    صح كلامك
    كل العرب بما فيهم احنا ولاد البلد كمان

    شكرا على زيارتك وتعليقك :)

    =======
    other things
    ووطني يسع كل الناس
    ...
    :)

    =======
    tarek momen
    ان شالله يكون في حياتك
    وانا واحدة من الفلسطينيين الي بيحبوا مصر بجد زي ما بحب فلسطين
    وبردو عايزاها تكون احسن بلد في الدنيا ..

    =======
    زعتر
    شكر الك زعتر يعني يهنيك فعلا بنجاح التجربة -بدي اعتبرها نجحت D: -
    وكلمة وطن يمكن عمرو ما بنلاقيلها تفسير او معنى محدد
    هما كل الاشياء الي حكيتها واكتر بكتير

    تحياتي

    ========

    ردحذف
  12. يمكن كل واحد عايش بالخارج حبها هيك
    لكن مو متلنا احنا أهل غزة الي كل يوم بنرويها كانها وردة لكن بنرويها من دمنا واهاتنا والكل عم بيشوفنا وبيضحك
    وهاد الي بيفرق في حبنا الها
    لانو بنحبها وبنقدم كل شي فداها على عكس الي بيحبها هيك لانها بلدو او لانها محتلة أو لانها قضية عادلة .
    شكرا كتير الك
    تقبلي مروري
    اخوك محمد من غزة المحاصرة .
    mohmed.4ever@hotmail.vom

    ردحذف
  13. اخى الغالية

    اعادك الله اليها وورثها لكم

    (اللهم أهلكها على أمريكا واليهود كما أهلكتها على عاد وثمود)

    تحيااتى ليكى

    بس لية كنتى بتحبيها زماان اكتر هل لانك بعدتى عنها؟؟؟

    انتظر زيارتك الكريمة لمدونتى

    ردحذف
  14. أختي علا لا تسمحي لحبك أن تتلاشى او حتى أن ينقفص
    هي فلسطين احببناها ونحبها وسنحبها ما حيينا... لن ينزعوا حبها من قلوبنا ولن يتوقف هذا الحب عن الاتساع رغم كل محاولات التشويه الخارجة عن ارداتنا والخاضعة لتدخلات خارجية لا تريد ان تبقى فلسطين ولا ان يبقى ذكرها عطراً كما هو دوما.
    ربما اتفق معك ان ما مررنا به من ظروف واقتتال وفرقة في الفترة الاخيرة مقيت وكريه ومنفر لكنه ليس من فلسطين بشيء ولا يمكن ان يصبغ اسم فلسطين الجميل.

    لا تسمحي لحبك أن يقل لا تسمحي لمن ارادوا هذا ان يحققوا أهدافهم، رغم كل محاولات الطمس والتشويه ستبقى فلسطين جميلة.

    بعيدا عن الاجابات "الوطنية" هل تفضلين ان تعيشي في فلسطين أم بلجيكا؟

    وهل تتغير اجاباتك في حال تواجد اسرتك معك في نفس المكان؟

    اعذري مروري الثقيل على مدونتك الرقيقة

    ردحذف
  15. الله يحفظلنا فلسطين من الأعداء

    بصراحه علا كل الحكي عجبني جداً ولو إني أصلاً كنت فاتحه بالغلط بس بدور على صور بس تفاجأت لمن بتحكي "زمان كنت بحبك أكتر" !!

    أنا عكسك بصراحه أعتقد انه احنا الاتنين بنفس العمر أو يمكن أنا أكبر منك يمكن ب4 الى 5 سنين (طبعاً هادا تخمين على حسب الكلام اللي انت كتباه في كل المدونه) المهم أنا قصتي مع فلسطين كانت مجرد أهل مش أكتر ووحده بتحب بلدها زي أي شخص تاني بس لمن خلصت توجيهي قررت أنزل فلسطين أدرس جامعه هناك (بما اني عايشه بره في دولة عربيه)ولمن نزلت ولقيت الناس غير عن ما بتوقع طبعاً في الكويس وفي السيء بس لاقيتهم كلهم بتفقوا بشغلة وحده حب الوطن لأنهم حاسين بمسؤوليه انهم لازم يدافع عن حاجه ملكهم حاجه منهم جزءمن قلبهم إذا ما كان كله، طبعاً أنا كنت بفكر طيب ليش وكيف يعني همه مضيعين وقتهم وحياتهم عشان هالبلد اللي اليهود بدهم اياها بس بعد ما قعدت معهم واتناقشت معهم انه ليش ما يطلعوا من فلسطين لاقيت أجوبتهم سكتتني وما قدرت أرد وكان ردهم علي بكلمة وحده بس (بنحبها) طبعاً هاي الكلمة مش كلمة عابره بتنحكى وبننسى لمين حكيناها بعدين كلمه صغيره بس تحمل معاني كتيرة خصوصاً انها موجوده في القلب في أغلى ما يحمل اي انسان..


    وبذلك انا قلبت هاي الكلمة بمخي ولقيت فلسطين بتستاهل اكتر من ما كنت أكن لها في قلبي وعقلي ومن يومها والله ما بيمر يوم إلا وأحكي عن فلسطين وصرت أدور مواضيع عنها واقرأ تاريخها.

    بس للأسف بسبب الأوضاع هناك ما قدرت أكمل جامعه فرجعت هنا ولكن على الرغم من هيك تعلقت فيها أكتر وكل يوم بيزيد حبي الها.


    وفي النهايه أتمنى تشوفي أهلك عن قريب لأني حسيت بهادا الشعور اللي انت فيها قبل هيك ، وأتمنى لم التوفيق في الدراسه، وأتمنى المرة الجاية لمن ادخل على المدونة تبعتك ألاقيك كاتبه موضوع انك حبيت فلسطين أكتر.


    تحياتي واعذريني على الاطاله:)

    ردحذف
  16. بتعرفي
    فلسطين هي صوت مارسيل لما يحكيلك : أعدي لي الأرض كي أستريح..فإني أحبك حتى التعب .
    صعب تعرفي الوطن لمن يكون فلسطين صعب تحكي للناس بلدي كروم عنب وحبة رمان وليمونة وبحر
    مين بيقدر يفهم شو يعني ريحة الطابون شو بيعنيلنا الصابون النابلسي وليش بنحب المسخن والكنافة
    كيف بيفهمو شو معناه يكون عندك قنينة زيت زيتون من هناك من "البلاد"
    فلسطين درويش وهو بيصيح سجل انا عربي فلسطين تميم وهو بيحكي مع سته ام عطا فلسطين كل الكلمات اللي انكتبت كل الخيام اللي انرمت عوش هالارض كل الصغار اللي طلعو محرومين من كل شي عند غيرهم بس ما حسو بمعنى الحرمان الا لمن اطلعز عخريطة العالم وما لقو اسم بلادهم
    ما عمري زرتها وما بعرف اذا الله بفتحها علي يوم بجنسية تسمحلي فوت ارضي لكن فلسطين مو "الوطن" ولا ال"بلاد" فلسطين عندي "الارض" بالذات شجرة الزيتون اللي بطل عليها شباكي ، النخلة اللي بدها تظلل قبري لاكون اقرب من السما

    ردحذف
  17. حبيبتي كلامك كثير مؤثر عيني دمعت
    صحيح ما ابنعرف معنى هاي الكلمة ومادام في حكام عرب مثل الموجودين مش حنعرفها ولا اولادنا حيعرفوها انشاله لما يجي واحد مثل صلاح الدين حيعلمنا معني هاي الكلمة
    يارب
    بالتوفيق حبيبتي اول مره بقرأ مدونتك لكني حأستمر في قراءتها

    ردحذف
  18. محمد من غزة
    محبتنا لبلدنا مش المفروض انها تتأثر بوجودنا فيه من عدمه ... بالعكس يمكن تلاقي الي عايش بره بلده متمسك اكتر بهادا الحب ... احيانا كتر المعاناة بيولد نوع من انواع التمرد على حب الوطن بسبب المعاناة اليومية
    تحياتي الك


    دعاء مواجهات
    اهلا عزيزتي
    لأ محبتي لفلسطين قلت بسبب اولادها .. وكل المشاكل الموجودة على الساحة من انقسام وتشتت في الصف الفلسطيني ..
    والعكس .. بسفري اشعر بقيمة الوطن في كل لحظة
    بتشكر مرورك وتعليقك :)


    سالم
    احييك على مدافعتك القوية عن محبتنا لفلسطين .. اكيد ما يحدث لا يسيء لاسم فلسطين الاسطوري او التعبيري والانشائي .. لكنه يسئ وبشده لصورة ابناء هذا الوطن في عيون الاخرين .. فان كنا نحن انفسنا غير قادرين على خدمة قضيتنا بل ونختلف على وسائل الدفاع عنها .. فمن باب اولى ان يتركنا العالم الى غير رجعة .. علنا نستفيق من غفوتنا وسباتنا العميق

    ههه اما اسألتك .. بما اني اجيبك وارد على نعليقك وانا في غزة .. فا السؤال اصبح منتهي الصلاحية هههه
    تحياتي


    هديل
    قصتك لمستني والله
    مهو انا عشت برة البلد مع اسرتي وانا طفلة ورجعنا مع رجوع السلطة .. وعلى هادا الاساس بقارن قبل وبعد المعيشة جوة البلد ..
    عموما انا هيني رجعت والحمد لله .. ومهما كان الواحد ما الو بركة الا مع اهله وبين ناسه

    تحياتي :)


    ليمونة
    يا سلام عالاسماء المنعشة :)
    عنجد خجلتيني بوصفك وكلماتك الخاصة بوصف فلسطينك .. خجلت من حبك وحنينك وبتمنى يكون عندي نصهم .. فلسطين بتفتخر انك حاطاها بقلبك وقافلة عليها بمفتاح العودة لبلادنا .. ولاراضينا .. ولبلدنا الجريح بيد ابناؤه قبل الاعادي
    شرفتني وجودك يا ليمونة :)
    تحياتي العميقة


    فاتن
    شكرا عزيزتي .. تسلم عينك وربنا لا ينزل دموعك على غالي ..
    صلاح الدين رح يرجع
    احنا كلنا عايشين على هادا الامل
    تحياتي واحترامي :)

    ردحذف
  19. مرحبا يا علا..
    بكتبلك اللي قاله أحمد فؤاد نجم..

    بعد السلام والمرحبا
    يا اولاد بلدنا يا طيبين
    نفرش كلام المصطبة
    واضح لكل السامعين
    فلسطين الحبيبة الطيبة
    أم البنية والبنين
    ايش حالها في عز الصبا
    ايش حال ولادها المخلصين

    مع التحية..

    مقلوبة..

    http://maglouba.wordpress.com/

    ردحذف
  20. أنا كمان زمان كنت احبها اكثر
    لما كنت بالغربة وكانت حلم كبير وكانت وطن
    دايما الاشياء من بعيد بتحبيها اكثر..لما تدخلي في تفاصيلها تجدي الشيطان، ويبدأ الواقع يغلب على المشاعر وتصبحي نافرة منه..وتنسي الحلم كانه لم يكن له وجود
    حب الوطن ليس فطرة في الانسان..مكتسب ..ويجب نحن أن نعرف كيف نكتسبه واذا اعتقدنا انه فطرة يجب ان نتخلص منه ونبدأ نحبه من جديد كي لا يكون حبنا جزء من شعارات وقوالب جاهزة وتعبئة اعتدنا عليها منذ ولدنا: اللجوء والبلاد وابوعمار والقدس..
    الهوية بالاختيار مثل ما بقول ادوارد سعيد..
    أعتقد انه الوطن بالانجليزي هو الهوم لاند..ولكن هذه ترجمة حرفية تعتمد على مكان الولادة..هناك أفكار وتساؤلات تظل عالقة في الزمن دون اجابة عزيزتي علا..
    محبتي
    أسماء الغول

    ردحذف
  21. أختي علا كلامك كثير صادف ..
    والله أنا كمان بحب فلسطين وبموت فيها ...
    صحيح اني مو فلسطينية ومالي اي صله فيها
    بس بحبها وكأنها بلدي وأكثر كمان ..
    ...

    ردحذف
  22. دايما يا علا بتعبري عن مشاعرك و حبك لهلبلد بكلام بسيط و لكن بطريقة رائعة بتوصل الفكرة، بلدنا هاي غلبناها و غلبتنا كتير بس والله كلنا بنحبها و ما إلنا غيرها.

    ردحذف