من صباحية ربنا وصور الإنتخابات في مصر منتشرة في صفحات الأخبار والمواقع الإجتماعية ,, وقبلها أخبار الإنتخابات في المغرب وفي تونس
وفي هذه المناسبات السعيدة انا بسأل سؤال بسيط .. وممكن تعتبروه سؤال خبيث
هو احنا بـفلسطين حقنا ناقص ؟؟
ذكريات آخر انتخابات نزلنا عشانها بـ2005 لاختيار رئيس السلطة الفلسطينية, وبعدها بـ2006 لاختيار أعضاء المجلس التشريعي .. كلها كانت ذكريات حلوة, عن فترة كانت مشرقة وتعم بالتفاؤل .. وقبل ما تصير مصيبة الانقسام الي خربت كل شئ ونكّدت عالناس ورجّعت الحالة النفسية للشعب خمسين سنة ضوئية الى الوراء
ممكن يا عمو هنية ويا عمو عباس تسمحولي وتتكرموا وعليا (خودوني على قد عقلي).. وتخلوني أعيش هادا الاحساس كمان مرة في حياتي؟
مهو مش منطق تخلّـوني أنتخب مرة وحدة وبعدين تحكولي Game Over
ما اتفقنا على هيك! اللعبة بتقول انو لازم اصبعي يتلون بالحبر الفسفوري مرة كل أربع سنين .. وانا اصبعي اشتاق للحبر بصراحة!
أنا مؤمنة أن الديمقراطية هي مهارة تكتسبها الشعوب بالممارسة ومع التكرار, واحنا شعوب لسه بصف أول ابتدائي بالنسبة للديمقراطية, ومش معنى أن الشعب ربما يسئ الاختيار في الامتحان الأول أنو خلص مش شاطر وفش منه أمل .. لأ .. خلوه يجرب ويختار ويغلط ويصحح اختياره في المرة والمرات الجاية
المهم أنكم تسمحوا للشعب أنو يعيد التجربة مرة واتنين وتلاتة .. وهو مع الوقت رح يتعلم
والطفل الي جرّب يمشي لأول مرة واتكعبل في خطواته ووقع .. مش معقول تمنعوه يجرب مرة تانية .. وإلا مش رح يمشي!
بصراحة أكتر ,, أنا مش قلقانة من فوز التيارات الاسلامية في الدول العربية, الي ياما انمنعت وتم قمعها وحبس أفرادها لسنوات طويلة.. المهم ان يبقى نظام الانتخابات موجودا في المستقبل.
وانا بحكي هيك برغم احساسي بالمرارة كمواطنة فلسطينية, لأن تجربتنا كانت أليمة .. والبعض ما صدّق يوصل للكرسي ولزّق عليه.. وقال والله منا قايم!
قبل ما أبدأ بكتابة هذه التدوينة مباشرة, كتبت جملة بنفس المعنى على صفحة المدونة بفيسبوك .. وقامت صفحة عاجل من غزة بنشر الجملة على صفحتهم الواسعة الانتشار (31 ألف متابع) .. وهادي عينة من تعليقات الناس:
- (ضحكة طويلة) في المشمش
- كل دول العالم بصير فيها انتخابات إلا احنا
- لا مهو الانتخابات بس مرة بعدين كُفر
- بصفتك ايش بدك تنتخب؟ مواطن مثلا؟ والله عال
- أقسمت بربي بأنني لن أنتخب أحدا في حياتي لأنني لن أمنح صوتي إلى عباد الكراسي
كرّهتو الناس في الانتخابات الله يسامحكو (والباقي منعته الرقابة) ... على العموم, لن أتوقف عن كوني متفائلة بأن اخبار المصالحة حقيقية وجدية هادي المرّة .. وبتمنى من كل قلبي انهم يكونو اتفـقوا إلنا مش علينا ..
وأثناء كتابة هذه السطور .. عرفت أن محمود عباس أعلن عن 4 مايو 2012 القادم كموعد للانتخابات الرئاسية والتشريعية .. تيجو نعمل حالنا صدّقنا .. و نجرب نتفاءل بأن الدور علينا عشان نتصور مع اصابعنا الملونة بالحبر الفسفوري؟؟
وفي ابهامي اشتياقٌ .. للحبر الفسفوري
تمت مراجعته من قبل علا من غزة
في
نوفمبر 28, 2011
تقييم:
تمت مراجعته من قبل علا من غزة
في
نوفمبر 28, 2011
تقييم:
انا مش فلسطينية لكن ليه ما تجبروهمش انهم يعملوا الانتخابات الشعب سيد قراره ؟
ردحذفربنا يفسفر إبهامك عن قريب :)
ردحذفوالله شايف انو صعب هالشي يحصل .. يا علا لانو ما حدا من الطرفين مستعد يتخلى عن المال والكراسي والسلطة والسيارات ..
ردحذفعموماً خليهم كمان 3 سنوات عشان يكون مسموح الي بالانتخابات نظرا لصغر سني نوعا ما .. عشان اكون شاهد على اعنف انتخابات وراح انتخب مستقل طبعا او واحد مسيحي حتى ! ..
تدوينة رائعة وجميلة ..
اول شئ بباركلك انك مارستي حقك في الانتخابات مرة..انا بالنسبة الي ما مارسته بحكم السن القانوني ..والي 3 سنيين متجاوز السن القانوني ونفسي انتخب ..تاني شي انا متفائل نوعا ما انو حتصير انتخابات السنة الجاية وان صارت ما اظن انو اناانتخب بحكم اني خارج الوطن الا لو صار حقوق لفلسطينيية الخارج انهم ينتخبو ..ثالت اشي انا مش هاممني لا رئاسة ولا تشريعي ..انا بدي انتخب مجلس وطني ..لانو السلطة محلولة محلولة
ردحذفتدوينة رائعة ياعلا..نفسي أعرف سر أسلوبك السلس البسيط ده إيه..المهم..ألمكم ألمنا..وكما فتح الله لمصر وتونس وغيرهم..سيحل الربيع قريبا في فلسطين :)) ،مهما حاولوا قهر الشعوب ...الشعوب دائما تنتصر...لاتقهر ولاتموت..القطار خرج من محطته وقريبا سينزل بفلسطين
ردحذفبالمناسبة الانتخابات ما هي الا اداة لممارسة الديموقراطية وبالتالي لا نستطيع ان نختزل مفهوم واسع مثل الديموقراطية في عملية واحدة وهي الانتخابات او بمعنى اخر انه ما بنقدر نقول انه تحققت الديموقراطية بمجرد وقوع الانتخابات :)
ردحذفصحيح انه هي الاداة الابرز لكن ماهي الا مصطلح من جملة من المصطلحات التي لا نستطيع التقليل من شأنها وأهميتها متل احترام حقوق الانسان , الشفافية , احترام التعددية , احترام الحريات بمختلف انواعها,, من المهم جدا ان يتم احترام هذه المصطلحات والمعايير والادوات حتى نتجرأ ونقول ان في هذه البلاد ديمووووووقراطية حتى لا نأخذ من هذه التجربة مجرد الاسم فقط
تدوينة رائعة استاذة علا ومزيد من الضوء على هكذا موضوعات مهمة , بهكذا اسلوب مرح وسلس وبناء
شكرا
ما هو المشكلة انو احنا بنتفائل و بنكون نايمين و بنحلم
ردحذفكالعادة..أسلوب لطيف..ومنطق يستحق التقدير يا علا..
ردحذفأنا للأسف كنت خارج غزة لما صارت الانتخابات..ولم انتخب حتى اليوم..اتفق مع الاستاذ عطا حرارة في كلامه انو مش شرط انو صارت انتخابات انو تحققت ديمقراطية كاملة..والدليل على ذلك- وما تفهمونيش غلط- ما حدث بعد الانتخابات الفلسطينية، يعني كانو الجماعة الفايزين في الحكومة و لم يكونو في الحكم!! كان الوزراء يصدرون الاوامر و المدراء العامون يرفضون التنفيذ!!تجربتنا في فلسطين كانت قاسية جدا..لم يُسمح لها أن تحيى، و كان يُراد لها ان تكون درساً قاسيا لمن حولنا من الشعوب العربية إن هي فكرت يوما بالتغيير أو اختيار من لا ترضى عن امريكا-مرة تانية ما تفهمونيش غلط- ولكن لا شك ان للكرسي سحره الخاص..وللسلطة سطوتها!!لذلك تكرار الانتخابات و تجديد الوجوه يدرك الحاكم قبل السقوط في وحل الاستبداد..ويذكره بان هناك من يترقب سقطاته، ومن يعد عليه انفاسه، فالانتخابات صمام امان لضمان الديمقراطية و لا تتجلى الديمقراطية0فقط- في صورة الانتخابات، انا متفائل بخصوص كل شيء في هذا العالم إلا- و لسخرية القدر- موضوع المصالحة الفلسطينية، بصراحة ارى ان موضوع الانقسام سينتهي بذوبان احد الاطراف و تفككه، لا بالاتفاق!! طولنا عليكو..و يعطيكو العافية..
ياسر بارود
تحياتي لقلمك المبدع يا باش مهندسة
ردحذفالانتخابات الأكثر نزاهة جرت في فلسطين، وشرارة الربيع العربي انطلقت من غزة التي استلهم من صمودها جموع الثوار.
إذا أردنا أن نكون أكثر موضوعية، فعلينا أن نشير إلى من انقلب على هذه النتائج، ومارس الفلتان والفوضى الخلاقة، ومن شارك في الحصار، وارتضى الذل وهوان التنسيق الأمني
الانتخابات في فلسطين حتى تكون مقبولة، فعليها أن تؤدي إلى نتيجة واحدة مفادها إقصاء حماس...
الله يعطيكم ع قد نيتكم ;)
ردحذفههههه .. اهئ اهئ اهئ .. مش عارفة اضحك ولا ابكي ..
ردحذفذكرتيني بأيام الانتخابات . . الله يرحمها هديك الايام .. كان لسه عندنا أمل .. لكن شو نقول باللي وصلوا للكراسي وبعدين اصدروا فتوى بتحريم الانتخابات .. !! طبعا مش فتوى رسمية بلاش نروح في الداهية " بتاعتك !"
رغم كل شيء عندي أمل يا علا .. انه راح يجي يوم وننتخب .. امتى ..؟؟ الله اعلم .. :)
بالنسبة للتعليقات ع الفيس .. فيها خفة دم مش طبيعية علينا كشعب فلسطيني !! اما التعليقات على المدونة .. أعجبتني تعليق " انسانة " وتعليق " تونسي وافتخر " .. وبأقلهم " قلبكم أبيض !"
عنجد يا علا ما إلك حق شو هالحكي .. انتخابات !
ردحذفأصلا هم قلبهم عليك و لو نظرتي الها من منظور اخر لعلمتي انهم على حق .. الفسفور بيوسخ الاصابع !
فكك من القصة يا صديقتي :)
اووووه عال العال لو صرنا زي غيرنا ونعمل انتخابات
ردحذفشي ولا اروع منه والله .. بس طالما ما في مصالحة عالفاضي
يعني انا ما انتخبت ولا مرة يمكن بنفع انتخب هلقيت !
ان شاء الله بجي هاليوم ونحاول نختار الي بدنا ياه بإيدينا بهالحبر الفسفوري وان شاء الله كمان ما يكون اخر مرة الي
جميل جدا ما قلتيه يا علا، أعجبني أسلوبك البسيط في الحديث عن أشياء معقدة.. المهم أنك استطعت أن تعبري عن أفكار كل المواطنين العرب من المحيط إلى الخليج، الشعوب العربية لا تطلب شيئا سوى الحرية والكرامة، وما الانتخابات سوى أداة من الأدواة لتحقيق الديمقراطية، والعيش في كرامة، شريطة أن تكون نزيهة وتحترم حقوق الشعوب في اختيار المصير..
ردحذفأملنا أن يلتم الشعب الفلسطيني تحت قيادة واحدة من اختيار الشعب
مثال من المغرب
انسانة
ردحذفبيقول المثل كل شي بالخناق الا الجواز -والانتخابات- بالاتفاق .. احنا مستنيين القيادات تحن علينا وتتصالح .. بس انا معاكي ان احنا لازم نجبرهم !
تونسي وافتخر
زميلتي "وجع البنفسج" علقت تحت بتقولك: قلبك ابيض :))
احنا متأكدين ان الانتخابات جاية ,, لكن متى بالتحديد؟ هادا هو السؤال!
ياسر
مهو احنا الحق علينا الي سايبينهم ع راحتهم ! طبعا الي قاعد على اقل من مهله طالما ماحدش محاسبه!
ع فكرة الواحد بيقدر ينتخب لما يصير معه هوية
همام
واخييييرا في حد متفائل! بس وينك .. لو صار انتخابات بتحمل حالك وتيجي تنتخب ! لن اقبل اي اعذار :P
مازن
اول اشي كالعادة شكرا على الاطراء :D
احنا بانتظار الربيع من مدة طوييييلة لدرجة ان البعض نسي اصلا انه موجود!
عطا حرارة
بلا مبالغة تعليقك اضافة قيمة للتدوينة
الانتخابات هي اوضح اداة من ادوات الديمقراطية .. لكن تطبيق باقي المفاهيم يحتاج وقتا طويلا لكي يصبح جزءا من المنظومة الاجتماعية في بلادنا
اشكر لك مشاركتك مرة اخرى
غير معرف
التفاؤل لا يعني بالطبع ان نغرق في الاوهام .. والاحباط مش حل بردو!
ياسر بارود
رأيك وتحليلك واقعي جدا سواء فيما حدث بعد الانتخابات الماضية وما حدث باستمرار الجلوس على كرسي الحكم لمدة طويلة
وبتعرف .. كمان رأيك عن نهاية الانقسام يشاركك فيه الكثيرون لأن الطرفين الكبيرين ثبتت عليهم سلبيات كثيرة واصبحنا نريد بديلا ثالثا !
المشكلة ان ظهور مثل هذا البديل يحتاج لسنوات طويلة ! وبالتالي خلينا قاعدين نستنى !
غير معرف
"شرارة الربيع العربي انطلقت من غزة" مممممممم مش كان اسمها فلسطين زمان !؟
انا بحترم رأيك لكني أرى أن الزمن لديك توقف عند عام 2006 ولا اريد ان يكون نقاشنا كمجتمع متوقف عند ذلك التاريخ ! لأن الوقت بيجري واحنا لسه بنحكي في الماضي !!
القانون يقول ان شرعية الانتخابات الماضية انتهت بغض النظر عما حصل .. والشعب له الحق في الاختيار إما لتغيير النتائج او الاصرار عليها ! انتهى
UmmOmar
ههههههههههههه نيتنا "فل" ماشاء الله علينا
امتياز
ردحذفههههههه مش رح اضيف ولا اشي ع كلامك .. كالعادة انا واياكي واقفين بنفس الصفحة :P
هديل
ههههههه عجبتني هاي الفسفور بيوسخ الاصابع :P
والله انا بدي ألعب بس .. اصلا رح افوت اعمل حادي بادي مش رح اختار على اي اساس حزبي ولا ديني ولا اي حاجة .. تضلها بنفسي يعني ؟؟ :D
مقداد
حسستوني اني عجوزة انت وياسر وهمام :P
هلقد كبيرة انا :D
بالله ما عندك فضول تعرف كيف بتصير القصة؟؟ :D
مثال
سعيدة جدا بتعليقك عزيزتي .. والأهم قولك أن ما اطالب به من انتخابات واستماع الى رأي الشعب هو المطلب الأساسي لكل الشعوب العربية .. وليست فلسطين بمعزل عن هذا المطلب
هههه اكيد والله اتمنى بس اجربها مرة وحدة
ردحذفاصلا هدول الي حاكمينا اليوم هما الي حرمونا هالحق P:
يمكن بتطلعي قد ستي ام خميس P: ههه
رااااااااائع
ردحذفتسلم ايديك
ردحذف