انا عايز كوكاكولا




ام علي: مساء الخير ... كيف حالك يا ام سليم ؟

ام سليم: اهلا اهلا يا اختي ام علي .. اتفضلي اتفضلي ...

ام علي: كيفك حالكم يا اختي .. كيف الولاد .. ما اكون اجيت بوقت مش مناسب

ام سليم: لا يا ستي . ولو .. انتي تشرفي بأي وقت ...

يااا سميرة ... شوفي خالتك ايش بتشرب ....


سميرة: ايش بتحبي تشربي يا خالتو ؟ شاي قهوة عصير .. كولا .. ؟

تنظر الحاجة ام سليم الى ابنتها شزراً ... أعادت الى وجها الابتسامة عن كره ... وقالت في سرها ..

كان لازم احكيلها تعمل شاي وخلص ..


ام علي: يوه يا ختي !! اه طبعا اذا عندكم كولا بشرب كولا

ام سليم: ايش اللي كولا بس في هالبرد يا سميرة .. اعملي شاي وبسكوت

ام علي: لا ياختي خلص كولا منيح .. وبعدين شوب هالئيت على الشاي ..

كولا منيح يا سميرة .. كولا منيح

سميرة : حـ .. حاضر يا خالتو

ايش بتشربي يا ماما ؟

ام سليم: ولا اشي !! هاتي لي كباية مية

تنظر الى ام علي وعلى وجهها نفس الابتسامة .. لكنها مازالت تفكر ..

هالمخلوقة عمرها ما كانت بتحب الكولا ... بس انا بعرفك يا ام علي .. عالاشي الغالي وبتنطي


***************************

كان هذا الموجز وإليكم الأخبار بالتفصيل

غزة تعاني من نقص في كل حاجة ,, وصلت فيهم انعدام الانسانية لدرجة انهم يمنعوا عنا الكوكاكولا والميرندا

مش حرام عليهم .. ازازة المياه الغازية يرتفع سعرها اربع اضعاف في ظرف كم اسبوع

واحنا كيف بدنا نعيش من غير كوكاكولا !! صحيح انو كمان
الخبز ارتفع سعره للضعفين ... بس الخبز ممكن نستغني عنه .. بناكل بسكوت

اما الببسي !! كيف يا ناس بدنا نبل ريقنا ونبلع اللقمة

صحيح انو
مساحيق التنظيف وصابون الجلي والبامبرز كمان ناقصين .. بس مش مشكلة .. ومالو الجلي بالمية والصابون النابلسي ... وبعدين مالها الكوافيل ؟؟

الأخبار بتقول انو الوضع مش باين انو رح يفرج .. ويبدو انو الكهربا رح تصير تقطع كتير ... بس احنا ما يهمناش .. اصلا اتعودنا

حتى لو انو البنزين صار شحيح ... واحنا على ابواب شتا .. والشتا ما شالله بدو تدفئة من برودة هوا بحر غزة ... بس بردو عادي .. بنلبس بلوزتين صوف زيادة

النشرة اليوم دمها تقيل .. خلص بديش اكمل ... انزل يا ولد بالفاصل


سنعود إليكم بعد فاصل قصير .. وانتو حرين تبقوا معنا ولا ما تبقوا

بس امانة تدعولي كتيييييير ان ربنا يسهل طريقي ويفتح في وشي الابواب المقفولة

سلامات