موسيقى فلسطين ... في بروكسل

أقيمت طوال الشهر الماضي في بروكسل , فعاليات ثقافية لها علاقة بالقضية الفلسطينية

تنوعت ما بين افلام ومعارض تصوير .. وشعر وموسيقى وغيرها .. تحت مسمى مشروع "مسارات"

انا عرفت بالموضوع من خلال عدة مصادر .. والصراحة اني ما تابعت الموضوع كما يجب

او يمكن كان الاهتمام موجود .. لكن الظروف ما كانت بتساعد .. بتعرف كيف لما تكون عايز تروح مشوار معين .. لكن خلص .. ببساطة تجد انه مش "مسهّل"

وحين شاءت الظروف .. حضرت ثلاث ايام عروض موسيقية لفرق فلسطينية

---------------

يوم الاربعاء الماضي 29\10 كان حفلين الاول لعازف العود الفلسطيني خالد جبران .. ثم حفل لفرقة "وتر" ذات الطابع الشرقي الصرف

وصلت متأخرة على فقرة الفنان خالد جبران

وللأسف ما قدرت اصور مقاطع واضحة لعزفه ... الي تميز بالشجن وغلب عليه طابع الحزن

----------

بعده كانت حفلة فرقة "وتر" .. وكان عزفهم شديد الشرقية والاصالة

قانون .. عود .. كمان .. بُزُق .. ودف

صراحة .. هادا هو النوع الي بحبه من الموسيقى

صوت القانون الرائع مع رنات العود الدافية

لحسن الحظ .. وقتها كنت قاعدة في مكان كويس وقدرت اصور فيديو ..

---- معزوفة 1-----

----- معزوفة 2------

بعديها فضيت بطارية الكاميرا

:p

---------------------------

اليوم التالي 30\10 .. كان الحفل لفرقة دلعونة

لأول وهلة .. كان عندي انطباع ان السهرة حتكون مع اغاني الدلعونة التراثية .. المصحوبة بالدبكة (رقصة فلسطينية تراثية) .. لكن اعتقادي ما كان بمحله

كانت عبارة عن عزف شرقي .. نفس الات وتر لكن مصحوبا بالاوكورديون ومن دون قانون

عزفو عدة معزوفات

اليكم احداها

المقطوعة التالية غناء منفرد لفتى واعد بصوت جبلي قوي .. اسمه عدي

اسمعو ايش بيحكي .. انا دمعت منه

--------------------

وبعدين غنى اغنية اعتقد غنتها من قبل أميمة مع مرسيل خليفة

الاغنية اسمها "الطيارة"

ماشاء الله عليه هادا الصبي .. عنجد صوتو كتيييير معبر وصادق

بردو كان فيه صبية غنّت اسمها صابرين صوتها كتييير حلو كمان .. بس ما صوّرتها

-----------------

حفل يوم 1\11 كان من نوع اخر

فن تجريبي اذا كان ممكن اسميه هيك !!

الحفل كان عبارة عن عزف مشترك ما بين فرقة "وتر" وفريق "Garrett List"

ليش بحكي تجريبي ..لأنو قائد الفرقة الغربية الظاهر كان حابب يجرب اشي بدون سابق تخطيط ! كان ببساطة عايز كل آلة تشتغل لحالها كدة .. لدرجة العشوائية والضوضاء في بعض الاحيان

لكن ومع ذلك مرت بعض المقاطع المتناغمة

الحق يقال .. موسيقتنا وآلاتنا وعزفنا الشرقي احلى بكتييييييير ولا مقارنة اساسا مع العزف الغربي

او يمكن فكرة الدمج بين الغربي والشرقي كفكرة .. هي بالعموم فكرة كويسة وممكن ينتج عنها اشي حلو .. لكن تحتاج لمايسترو شاطر وصاحب رؤية واضحة

اه حتى الموسيقى بدها رؤية واضحة :p

-------------------------

وبما ان الحكي عن موسيقى فلسطين ... خليني بهالمناسبة اعرفكم على موقع لابرز الفرق والمطربين الفلسطينيين ... انا نفسي اتعرفت عليه من فترة بسيطة من خلال مدونة رندة

موقع غناني

خليني انصحكم كبداية بكم اغنية كتييير حلويين -- لمحبي الاغاني الهادئة

فرقة تراب - شعرك دهب

بتقول كلماتها :

شعرك دهب مغزول .. بنول الشمس والريح

قلبي صهيل خيول .. متل الفرس بيصيح

شعرك دهب .. وبيلزمه بُكلة دهب

بس الدهب مدفون بجوة البلد

لو فيه بلد .. لو فيه بلد

كل الدهب بيهون

.

.

عندي الك ورد وغزل .. متل الخمر المعتق بالجرار

عندي الك شهد وعسل ..اصله ورد بس من محل اشعار

.

.

شعرك احله انعفه .. قمح بشمس الجرون

وبسمة بوشك هالحلو .. نجمة بسما المسجون

.

.

--------

مكادي نحس - يما مويل الهوا

وهادي بتقول كلماتها :

يما مويل الهوا .. يما مويلي يا

ضرب الخناجر ولا .. ظلم الولف ليا

.

.

ومشيت تحت الشتا .. والشتا ربواني

والصيف لما اتى .. ولع من نيراني

واللي شاف الردى .. عم يتعلم فيا

.

.

حبي بنا له بيت .. صغيّر على قده

اجى المطر والسيل .. ويا خسارة هدّه

بيضل حب الولف .. بقلبي وعينيا

.

.

يا ليل طاح الندى ..  يشهد على جراحي 

وانسل ميّ الشتا .. من كل النواحي 

بيضل عمر الفتى ..  ندِر للحنية

 --------------

وكانت هذه النشرة الفنية .. شاركين لكم حسن المتابعة 


مراسلتكم .. علا من بروكسل