شاهدت لكم .. اول بوست بعد الحرب

عنجد حاولت اكتر من مرة انو اكتب بالمدونة بعد ما خلصت الحرب
كتبت يمكن تلات درافتات (مسودات) وما نزلتهم .. مش عاجبني الي كتبته
على رأي شريفو .. كان بحكي انو الواحد بعد ما كتب عن الحرب صار كل شي تاني مبين تااااافه بالنسبة للحكي عن الحرب


بس انا .. مش عايزة احكي بالسياسة وبالحرب .. لأنو بصراحة .. خلص فش حكي ممكن يفيد .. انا شخصيا طبعا لسه بسمع اخبار وقصص وحكاوي .. والي بسمعه من اهلي مختلف تماما عن حكي الاخبار .. بس خلص .. مش هاممني غير انو اسمع خبر واحد وحيد .. انو في حدا من الكبار اتغيرو .. اي حد .. بس احس انو الحرب غيرت اشي .. مش زي ما رحنا زي ما جينا .. وما استفدنا غير الدمار والموت


فش فايدة .. بردو حكيت عن الحرب !!


طيب .. من اول السطر


بما انو احنا متفقين انو الحكي عن اي اشي تاني غير الحرب يعتبر تفاهة .. فا تفاهة بتفاهة .. بدي احكي عن اخر الافلام الي شفتها بالفترة الي فاتت
الله يخليلنا المواقع الاونلاين .. ما في حاجة احمّل ولا استنى .. وهادي هي الافلام الي شفتها بترتيب التذكر

الجزيــرة

هادا فيلم شفته مع بنت خالتي وجوزها لما رحت زرتهم في اسبانيا
الفيلم مش كتير جديد .. بس منقول عن قصة حقيقية ..
بصراحة اليفلم معمول كتير حلو .. عجبني جدا .. ولمس فيا شوية اوتار حساسة ..
ومن نوعية الافلام الي بتخليك تتعاطف مع المجرم ..
وتتسائل بعد ما ينتهي الفيلم .. هل الشخص هادا كويس ولا لأ وهل تصرفه هادا مبرر ولا لأ وبيخليك تفكر وتتناقش .. وكمان نهاية مفتوحة
اكتر لقطة عجبتني لما بنشوف ابن البطل مع عمه .. وهو بس بيطّلع على ابوه وهو رايح على السجن
اللقطة فش فيها كلام .. لكن نظرة عين الطفل فيها كلام كتير .. وذكرتني بأطفالنا
انو القصة ما بتنتهي .. ولكنها للأسف بتستمر مع توالي الاجيال

45 يــوم

فيلم درامي .. حزين
هو مش جديد بالمرة .. وقلت اشوفه من باب انو بحب افلام الدراما
ومن باب انو بصراحة كان عندي مشكلة مع احمد الفيشاوي
وبعدين رجعت ابدأاتقبله مرة تانية يعني .. وكممثل هو اشي كتير كويس فعلا
المهم .. الفيلم من نوعية الي بتكون طووول الفيلم فاهم اشي معين وبعدين في اخر لحظة بتكتشف الحقيقة .. وفي هادا الفيلم اشي غريب .. يعني كل واحد في الفيلم بيكون عارف جزء من الحقيقة وبشكل مختلف عن التاني
وكلهم بيموتو وهما فاكرين اشي تاني غير الي انت كمشاهد بتكتشفه في الآآآخر خالص
وبيسيبوك لحالك كدة تضرب كف بكف وتتدايق من الي الي عرفته وبتقول ياريتني ما عرفت
بس هو كتجربة فيلم .. مش سئ يعني .. بحب انا الافلام الي فيها مفاجأة ونهاية غير سعيدة كعادة الافلام العربي يعني ..

Seven Pounds

ممم .. بردو درامي جدا .. شفته من يومين بس زهو اصدار هادي السنة
انا قعدت التلت الاول من الفيلم مش فاهمة اشي ومش قادرة اربط الاحداث
ولا ويل سميث هادا مين ولا ايش بشتغل
ووجعلي قلبي من طريقة تعامله مع واحد اعمى بأول الفيلم
بردو هما بيسيبوك فترة كدة تحاول تكتشف لحالك وتفسر الاحداث
لغاية ما في اخر ربع ساعة تقريبا بتعرف الحقيقة
وبردو فيلم درامي جدا لدرجة انو نهايته مأساوية لكن بتتعاطف معها
بنصح بمشاهدته كل من يشعر ان لديه فائض من الدموع ويريد اخراجها بشكل ما ..
:D

Changeling

فيلم دراما من بطولة انجلينا جولي واخراج كلينت ايستوود
فيلم رهيب وعن قصة واقعية صارت في فترة العشرينات
وعن وحدة ست قدرت تغير قوانين وتعمل حاجات اول مرة تعملها وحدة ست
يمكن مش بغرض الثورة او قيادة الامة ولا حاجة .. لكن بس من منطلق انها ام وبتحركها عاطفتها تجاه ابنها المفقود
مع اني بحبهاش كتير هاي المخلوقة .. لكن قدرت تخليني احبها في هادا الفيلم
وطبعا جو الازياء والمكياج والشعر في هاديك الفترة عامل شغل غييير شكل

Yes Man!

اه يعني مش كل الافلام الي بشوفها دراما ونكد
هادا فيلم كوميدي جيم كاري طبعا
ورحت شفته في السينما :D
بيقولك في البوستر .. انو كلمة وحدة ممكن تغير كل شي
وبغض النظر عن بعض الاشياء في الفيلم .. الا انو المغزى من وراه ممكن يكون صح
ان الواحد يكون مفتوح لأي فرصة ممكن الحياة ترميها بطريقه
انك تعيش وتجرب وتتعلم وتعمل كل شي جديد عليك
لأنو طول ما انت قاعد في بيتك وبتقول لأ مش هاعمل ولأ مش هاروح وانت بتضيع على حالك اشياء حلوة وتجارب ممكن تفتحلك ابواب عمرك ما فكرت انها ممكن تكون موجودة اساسا
الفيلم حلو وبيضحك وعجبني كتير مشهد لجيم كاري وهو بيحاول ينقذ واحد عايز ينتحر وبيروح بيعزفله على الجيتار ... وبيصيروا الناس الي في الشارع يغنو معاه هههه
فيلم مسخرة بجد
بس حلو واساسا انا بحب جيم كاري




وفيه افلام تانية .. مش عارفة يعني خجلانة احكي عنها

زي مثلا كابتن هيما .. لا تعليق
, جوبا .. شفته بس عشان اعرف شكل الفلسطينيين كيف بالافلام وما عجبنيش
, شيكامارا .. ماقدرتش استحمل منه عشر دقايق على بعض
خارج على القانون .. كويس .. مش على نفس مستوى واحد من الناس ومش فاهمة ايش لازمة مايا نصري في الفيلم


وفيه افلام عجبتني بشدة طبعا لكن مش ححكي عليها

زي مثلا آسف على الازعاج .. ارفع القبعة
كدة رضا .. لزيز ودمه خفيف وفيه فكرة ذكية
بوشكاش .. اهبل شوية بس بردو فيه فكرة وشوية مفاجآت في الآخر


وبعدين غير الافلام .. فيه البرامج والله يخليلنا اليوتيوب وبالمرة خليني اجيب السيرة



بتابع بشكل شبه يومي برنامج القاهرة اليوم

ومن وقت للتاني كنت بشوف برنامج دارك والحقيقة سلاّني في فترة الضغط والامتحانات

فيه كمان اخبار الخامسة والعشرون .. مسخررررة

كنت صارلي فترة ملاحظة على الفيسبوك ناس بتحكي عن سيد ابو حفيظة واظن قريت عنه في مدونة
باين ولا حاجة .. مش فاكرة بالزبط .. بس طلع اشي فعلا فعلا مسخرة


معلش انا بعترف انو البوست تافه ويمكن بيبيّن اديش انا بضيع وقتي "السمين" .. 

يلا كل سنة وانتو طيبيييييين


وما نجيلكوش في حاجة وحشة


سلام