واحنا مالنا ومال تونس


20 يوم مروا على بداية سنة 2011 .. معقول كل هالاحداث بس بـ 20 يوم ؟؟
باين انها رح تكون سنة متعبة جدا للاعصاب .. اذا استمرت على نفس المنوال رح تكون فعلا الـ 2012 نهاية العالم..

هادي اول تدوينة بالسنة.. بس مش عارفة اكتب عن ايش ولا ايش ولا ايش

بدت من اول ليلة بتجربة شخصية اول مرة اعملها بصراحة .. اني رحت حضرت حفلة راس السنة بالمطعم الي بتمتلكه عائلتي بمدينة غزة .. وكانت ليلة مليئة بالاحداث ..


ليلتها سألني والدي اذا كنت حضرت راس السنة في بروكسل .. فاجأني سؤاله بصراحة .. راس سنة 2008 كنت لسه واصلة جديد ومش قادرة اتزكر ايش كنت بعمل ليلة راس السنة ... يمكن كنت بالسكن برتب اغراضي ويمكن كنت طالعة مع عيلتي التانية هناك .. حقيقي مش فاكرة .. اما راس سنة 2009 فكانت حرب غزة شغالة وكنت بجاهد ما بين دراسة امتحانات اخر الفصل وما بين متابعة موقع الجزيرة وتقارير تامر المسحال على موسيقى المفرقعات النارية الي كنت سامعاها من غرفتي

عودة لراس سنة 2011 .. قبل ما تنتهي السنة بكزا دقيقة فزت بجهاز توستر عشان عرفت اقول "ارنبنا في منور انور .. وارنب انور في منورنا" تلات مرات ورا بعض

شرطة حماس كانو بحتفلو معانا على فكرة .. ووجودهم كان دمه خفيف جدا للحقيقة .. يعني من غيرهم كانت رح تكون حفلة رتيبة عالاخر
اول اشي قالوا مافش وحدة ست تمسك شيشة .. الشيشة للرجال فقط
وطبعا الموجودين هللوا فرحا عشان حكومتنا خايفة على صحة المرأة ومش فارقة عندهم صحة الرجل
تاني اشي قالوا ممنوع نحتفل عالساعة 12 .. لا نطفي الضواو ولا نصفق على رأس الساعة ولا ترحيب بالسنة الجديدة (عشان راس السنة بدعة) عالساعة 12 وربع عريف الحفلة اعلن عن انوهم سمحوا لبابا نويل يدخل القاعة وهو جايب معه كيكة كبيرة .. كل الي صار ساعتها انو الناس فرحت بالدخول الميمون وعبرت عن ترحيبها بالتصفيق والتهليل والتصفير ..!
يعني احنا رحّبنا ببابا نويل والكيكة مش بالسنة الجديدة .. هناك فرق كبير على فكرة

الموهم .. عدت الليلة على خير - نوعا ما - ومحدش انحبس يومها

لكن بمجرد وصولي البيت عرفت عن تفجير كنيسة الاسكندرية


مش هاكذب عليكو واقول انو الخبر نكد علينا كلنا بالبيت .. هو نكّد عليا لحالي لانو انا الوحيدة الي عندي تويتر ومحدش كان مهتم يفتح عالاخبار الساعة 1 ونص بالليل .. فا قضيت بقية ليلة راس السنة بتابع التغريدات الباكية والمصدومة للشعب المغرد على تويتر

اسرتي في هالكم يوم الاوائل من السنة كانت مشغولة بحدث من نوع اخر .. الا وهو الاحتفال والتجهيز لخطوبة اختي العزيزة .. وهو حدثٌ لو تعلمون عظيم خاصة في اسرتي .. في منكم ناس بيعرفو ليش , وناس مش ضروري يعرفو ليش .. لكنه فعلا كان حدث مزلزل ويفصل بين حقبتين من الزمن .. ايش الي انا بقولو هادا !؟

المهم بدي ابارك لاختي من معاميق معاميقي وبحكيلك انو احيانا بفشل في اظهار مدى سعادتي لكٍ وبكٍ .. بوامة منتي عارفة .. بس انا عارفة انك عارفة اديش انا سعيدة عشانك


هنا بدأت تونس تظهر بالصورة .. كنت بعرف من تويتر اخبار مباشرة واشاعات عن الاطاحة بالرئيس من قبل الاطاحة الفعلية بكزا يوم .. وكنت تقريبا الوحيدة بالبيت الي دايرة بحكي زي المجنونة "فيه ثورة بتونس" , "يا جماعة الخير افتحوا عالجزيرة فيه مظاهرات بتونس" , "سمعتو عن الي قاعد بيصير في تونس؟" اخر ما يزهقوا مني يفتحوا عالجزيرة وما يكونش فيه اشي يدل انو الي بحكيه صح !

يوم ما صارت الاطاحة وفعلا زين العابدين بن علي هرب من تونس .. كنت بردو مصدر الاخبار الاول بالبيت وفتحت على العربية اتفرج بمنتهى الانشكاح .. اهلي اه كانو مهتمين بالموضوع ومش عارفة ليش اول اشي حكتو والدتي "يلا عقبال مصر" بس بعد شوية فقدو اهتمامهم بتونس عشان كان فيه مواضيع اهم يحكو فيها (!) صرت كل ما بفتح سيرة تونس الاقي الرد "واحنا مالنا ومال تونس".


مش رح احكي كتير عن الثورة وتونس والحرية والشجاعة الخ الخ الخ .. الي بيعرفوني منيح بيعرفو اديش ما بعترف بموضوع الشعارات هادا .. انا سعيدة ومبهورة اكيد .. وحاسة انو تونس في هادي الايام اشجع من فلسطين المنقسمة .. ومنتصرة اكتر من غزة المهزومة نفسيا .. مثلي !

يستحق الشعب في تونس الحرية .. بينما كل الشعوب العربية التانية (واحنا اولهم) قاعدين بنتمنى نتحرر زيهم .. وفي نفس الوقت مش مستعدين ندفع اي ثمن غالي مقابل هادي الحرية.

ملاحظة شخصية: يبدو اني بيوم من الايام .. رح اندم على كوني انسانة مختلفة في مجتمع يهوى النسخ واللصق!


واحنا مالنا ومال تونس واحنا مالنا ومال تونس تمت مراجعته من قبل علا من غزة في يناير 20, 2011 تقييم: 5

هناك 12 تعليقًا:

  1. عجبتني قصة 12 بدعة بس 12 و ربع ماشي ههههههه .. عنجد عالم غريبة و أحييهم كل التحية على تمميزهم العنصري اللي انصب لصالح المرأة هالمرة بغض النظر عن الفصيل اللي تنتميله !!

    عن تونس .. انا محتفظة برأيي لأشوف اخرة الثورة هادي ايش .. نجاح و تحقيق مطالب و بالتالي فعلا نغبطهم عليه .. و لا هيصة حيسكتوها بشرير تاني لابس توب ابيض و يضحكوا عليهم و علينا تاني ؟

    اذا كان في شي رح تندمي عليه فهو الجملة الاخيرة هادي .. اختلافك حلو و اللي عنده الحلا تبعك وحده اللي ما بيندم :)

    ردحذف
  2. بدك الصراحة يا علا
    راسي بوجعني من اول يوم بهاي السنة
    عمريش خفت من المجهول الا من يوم ما بدت
    ليـــــــش مش عارفة
    وحاساها سنة تقليدية رغم خوفي من عنصر اضافي يكملها
    انا معك انو شعبنا بدو كل اشي عالجهاز زي الكوبونة بالزبط
    بدو انوصلو الحرية لباب دارو وهو ممدد على فرشتو قدام الدفاية ..

    ردحذف
  3. بلاش نظلم أنفسنا
    احنا فى موقف صعب
    عايشين فى لحظات مظلمة من الحياة

    ردحذف
  4. الحياة عمرها ما تغيرت احنا اللى بنغير نفوسنا و هيا بتبقي متل ما هيا
    احنا لو نوهم حالنا لو للحظة انه السلطة الموجودة حاليا بغزة منيحة.. راح نصير نحكي انهم احسن ناس و العكس صحيح .
    مشكلة العمل موجودة بكل انحاء العالم و الكبت النفسي كذلك .
    اللهم متعني بملكي ولا تعجل نفسي بما اتمني !

    ردحذف
  5. حبيت اسجل وجودي...
    ميت نعس...و البوست بدو تركيز
    بحكي اللي عندي بس امخمخ عليه !

    ردحذف
  6. وبالإضافة للي صار في انفصال السودان ومشكلة لبنان

    والله أعلم ايش اللي جاي

    ردحذف
  7. آآآه كلنا عندنا نفس الاحساس (بدو اني بيوم من الايام .. رح اندم على كوني انسانة مختلفة في مجتمع يهوى النسخ واللصق!) .. ضريبة الاختلاف لازم تتدفع ..

    مبروك لأختك وعقبالك :)

    وبجد هنيئا لتونس وعقبالنا

    ردحذف
  8. Life is what you make it !
    هادا اللي دايما بحكيه...
    كلامك صح السنة هادي بدايتها مش معطيانا الفرصة انو نتفلءل كتير...بس بضل كيف احنا شايفين الاشي هادا !!
    بعرف بتفلسف...بس الخير هو الإشي اللي بنشوفو...و الشر هو الاشي اللي ما قدرنا نشوف الخير فيه !

    ردحذف
  9. مرحبا علا , بما أن زمن المعجزات انتهى مش ضروري نستنى المعجزة , قال تعالى : "ان الله لا يغير ما في قوم حتى يغيروا ما بأنفسهم " .

    فاذا نحنا ما تغييرنا طول عمرنا راح نبقى في نفس المكان

    ردحذف
  10. "مش مستعدين ندفع اي ثمن غالي مقابل هادي الحرية"
    جملة بحاجة لمراجعة بالنسبة للشعب الفلسطيني اللي كان ولا زال قدوة لغيره بالعطاء والتضحية

    ردحذف
  11. حبيتها كتير يا لولو.. بس "اخنا مالنا ومال تونس" لا لا...لازم كلنا نقول احنا كلنا تونس..
    كنت حابة اكتب عن الي بيصير بمدونة بس طبعا لاني بمصر فالكل بيقلي ما تحكي ولا حرف بالسياية يالوقت الحالي:S
    وعقبال ما اصير زيك مختلفة واصير اكتب طبيعي وبس ...بس اعتقد اني بالوقت الحالي سوف اكتفي اني اكون زيي زي هالناس الي مرة بتكتب ومراااات بتنسخ وبتلصق :)

    ردحذف
  12. والله يا علا فعلاً الواحد ما لازم يكون كتير مختلف عن الآخرين، بس علشان ما يتعب كتير في الحياة.
    وثانياَ ما بيقدر الواحد يقول إنهم أشجع منا لأن المقاييس مختلفة جداً ما بين أهل فلسطين وغزة خصوصاً.

    عالعموم ربنا يهدي البال ويصلح الأحوال لأن بالنهاية لما مصر تتبهدل أتوماتيك إحنا بنتبهدل كالعادة، وعقبال باقي الدول العربية، بس ياريت يبعدو عن الإمارات لأن أهلي فيها.

    في أمان الله

    ردحذف