20 يوم مروا على بداية سنة 2011 .. معقول كل هالاحداث بس بـ 20 يوم ؟؟
باين انها رح تكون سنة متعبة جدا للاعصاب .. اذا استمرت على نفس المنوال رح تكون فعلا الـ 2012 نهاية العالم..
هادي اول تدوينة بالسنة.. بس مش عارفة اكتب عن ايش ولا ايش ولا ايش
بدت من اول ليلة بتجربة شخصية اول مرة اعملها بصراحة .. اني رحت حضرت حفلة راس السنة بالمطعم الي بتمتلكه عائلتي بمدينة غزة .. وكانت ليلة مليئة بالاحداث ..
ليلتها سألني والدي اذا كنت حضرت راس السنة في بروكسل .. فاجأني سؤاله بصراحة .. راس سنة 2008 كنت لسه واصلة جديد ومش قادرة اتزكر ايش كنت بعمل ليلة راس السنة ... يمكن كنت بالسكن برتب اغراضي ويمكن كنت طالعة مع عيلتي التانية هناك .. حقيقي مش فاكرة .. اما راس سنة 2009 فكانت حرب غزة شغالة وكنت بجاهد ما بين دراسة امتحانات اخر الفصل وما بين متابعة موقع الجزيرة وتقارير تامر المسحال على موسيقى المفرقعات النارية الي كنت سامعاها من غرفتي
عودة لراس سنة 2011 .. قبل ما تنتهي السنة بكزا دقيقة فزت بجهاز توستر عشان عرفت اقول "ارنبنا في منور انور .. وارنب انور في منورنا" تلات مرات ورا بعض
شرطة حماس كانو بحتفلو معانا على فكرة .. ووجودهم كان دمه خفيف جدا للحقيقة .. يعني من غيرهم كانت رح تكون حفلة رتيبة عالاخر
اول اشي قالوا مافش وحدة ست تمسك شيشة .. الشيشة للرجال فقط
وطبعا الموجودين هللوا فرحا عشان حكومتنا خايفة على صحة المرأة ومش فارقة عندهم صحة الرجل
تاني اشي قالوا ممنوع نحتفل عالساعة 12 .. لا نطفي الضواو ولا نصفق على رأس الساعة ولا ترحيب بالسنة الجديدة (عشان راس السنة بدعة) عالساعة 12 وربع عريف الحفلة اعلن عن انوهم سمحوا لبابا نويل يدخل القاعة وهو جايب معه كيكة كبيرة .. كل الي صار ساعتها انو الناس فرحت بالدخول الميمون وعبرت عن ترحيبها بالتصفيق والتهليل والتصفير ..!
يعني احنا رحّبنا ببابا نويل والكيكة مش بالسنة الجديدة .. هناك فرق كبير على فكرة
الموهم .. عدت الليلة على خير - نوعا ما - ومحدش انحبس يومها
لكن بمجرد وصولي البيت عرفت عن تفجير كنيسة الاسكندرية
اسرتي في هالكم يوم الاوائل من السنة كانت مشغولة بحدث من نوع اخر .. الا وهو الاحتفال والتجهيز لخطوبة اختي العزيزة .. وهو حدثٌ لو تعلمون عظيم خاصة في اسرتي .. في منكم ناس بيعرفو ليش , وناس مش ضروري يعرفو ليش .. لكنه فعلا كان حدث مزلزل ويفصل بين حقبتين من الزمن .. ايش الي انا بقولو هادا !؟
المهم بدي ابارك لاختي من معاميق معاميقي وبحكيلك انو احيانا بفشل في اظهار مدى سعادتي لكٍ وبكٍ .. بوامة منتي عارفة .. بس انا عارفة انك عارفة اديش انا سعيدة عشانك
هنا بدأت تونس تظهر بالصورة .. كنت بعرف من تويتر اخبار مباشرة واشاعات عن الاطاحة بالرئيس من قبل الاطاحة الفعلية بكزا يوم .. وكنت تقريبا الوحيدة بالبيت الي دايرة بحكي زي المجنونة "فيه ثورة بتونس" , "يا جماعة الخير افتحوا عالجزيرة فيه مظاهرات بتونس" , "سمعتو عن الي قاعد بيصير في تونس؟" اخر ما يزهقوا مني يفتحوا عالجزيرة وما يكونش فيه اشي يدل انو الي بحكيه صح !
يوم ما صارت الاطاحة وفعلا زين العابدين بن علي هرب من تونس .. كنت بردو مصدر الاخبار الاول بالبيت وفتحت على العربية اتفرج بمنتهى الانشكاح .. اهلي اه كانو مهتمين بالموضوع ومش عارفة ليش اول اشي حكتو والدتي "يلا عقبال مصر" بس بعد شوية فقدو اهتمامهم بتونس عشان كان فيه مواضيع اهم يحكو فيها (!) صرت كل ما بفتح سيرة تونس الاقي الرد "واحنا مالنا ومال تونس".
يستحق الشعب في تونس الحرية .. بينما كل الشعوب العربية التانية (واحنا اولهم) قاعدين بنتمنى نتحرر زيهم .. وفي نفس الوقت مش مستعدين ندفع اي ثمن غالي مقابل هادي الحرية.
ملاحظة شخصية: يبدو اني بيوم من الايام .. رح اندم على كوني انسانة مختلفة في مجتمع يهوى النسخ واللصق!
واحنا مالنا ومال تونس
تمت مراجعته من قبل علا من غزة
في
يناير 20, 2011
تقييم:
تمت مراجعته من قبل علا من غزة
في
يناير 20, 2011
تقييم:
عجبتني قصة 12 بدعة بس 12 و ربع ماشي ههههههه .. عنجد عالم غريبة و أحييهم كل التحية على تمميزهم العنصري اللي انصب لصالح المرأة هالمرة بغض النظر عن الفصيل اللي تنتميله !!
ردحذفعن تونس .. انا محتفظة برأيي لأشوف اخرة الثورة هادي ايش .. نجاح و تحقيق مطالب و بالتالي فعلا نغبطهم عليه .. و لا هيصة حيسكتوها بشرير تاني لابس توب ابيض و يضحكوا عليهم و علينا تاني ؟
اذا كان في شي رح تندمي عليه فهو الجملة الاخيرة هادي .. اختلافك حلو و اللي عنده الحلا تبعك وحده اللي ما بيندم :)
بدك الصراحة يا علا
ردحذفراسي بوجعني من اول يوم بهاي السنة
عمريش خفت من المجهول الا من يوم ما بدت
ليـــــــش مش عارفة
وحاساها سنة تقليدية رغم خوفي من عنصر اضافي يكملها
انا معك انو شعبنا بدو كل اشي عالجهاز زي الكوبونة بالزبط
بدو انوصلو الحرية لباب دارو وهو ممدد على فرشتو قدام الدفاية ..
بلاش نظلم أنفسنا
ردحذفاحنا فى موقف صعب
عايشين فى لحظات مظلمة من الحياة
الحياة عمرها ما تغيرت احنا اللى بنغير نفوسنا و هيا بتبقي متل ما هيا
ردحذفاحنا لو نوهم حالنا لو للحظة انه السلطة الموجودة حاليا بغزة منيحة.. راح نصير نحكي انهم احسن ناس و العكس صحيح .
مشكلة العمل موجودة بكل انحاء العالم و الكبت النفسي كذلك .
اللهم متعني بملكي ولا تعجل نفسي بما اتمني !
حبيت اسجل وجودي...
ردحذفميت نعس...و البوست بدو تركيز
بحكي اللي عندي بس امخمخ عليه !
وبالإضافة للي صار في انفصال السودان ومشكلة لبنان
ردحذفوالله أعلم ايش اللي جاي
آآآه كلنا عندنا نفس الاحساس (بدو اني بيوم من الايام .. رح اندم على كوني انسانة مختلفة في مجتمع يهوى النسخ واللصق!) .. ضريبة الاختلاف لازم تتدفع ..
ردحذفمبروك لأختك وعقبالك :)
وبجد هنيئا لتونس وعقبالنا
Life is what you make it !
ردحذفهادا اللي دايما بحكيه...
كلامك صح السنة هادي بدايتها مش معطيانا الفرصة انو نتفلءل كتير...بس بضل كيف احنا شايفين الاشي هادا !!
بعرف بتفلسف...بس الخير هو الإشي اللي بنشوفو...و الشر هو الاشي اللي ما قدرنا نشوف الخير فيه !
مرحبا علا , بما أن زمن المعجزات انتهى مش ضروري نستنى المعجزة , قال تعالى : "ان الله لا يغير ما في قوم حتى يغيروا ما بأنفسهم " .
ردحذففاذا نحنا ما تغييرنا طول عمرنا راح نبقى في نفس المكان
"مش مستعدين ندفع اي ثمن غالي مقابل هادي الحرية"
ردحذفجملة بحاجة لمراجعة بالنسبة للشعب الفلسطيني اللي كان ولا زال قدوة لغيره بالعطاء والتضحية
حبيتها كتير يا لولو.. بس "اخنا مالنا ومال تونس" لا لا...لازم كلنا نقول احنا كلنا تونس..
ردحذفكنت حابة اكتب عن الي بيصير بمدونة بس طبعا لاني بمصر فالكل بيقلي ما تحكي ولا حرف بالسياية يالوقت الحالي:S
وعقبال ما اصير زيك مختلفة واصير اكتب طبيعي وبس ...بس اعتقد اني بالوقت الحالي سوف اكتفي اني اكون زيي زي هالناس الي مرة بتكتب ومراااات بتنسخ وبتلصق :)
والله يا علا فعلاً الواحد ما لازم يكون كتير مختلف عن الآخرين، بس علشان ما يتعب كتير في الحياة.
ردحذفوثانياَ ما بيقدر الواحد يقول إنهم أشجع منا لأن المقاييس مختلفة جداً ما بين أهل فلسطين وغزة خصوصاً.
عالعموم ربنا يهدي البال ويصلح الأحوال لأن بالنهاية لما مصر تتبهدل أتوماتيك إحنا بنتبهدل كالعادة، وعقبال باقي الدول العربية، بس ياريت يبعدو عن الإمارات لأن أهلي فيها.
في أمان الله