واحنا مالنا ومال تونس


20 يوم مروا على بداية سنة 2011 .. معقول كل هالاحداث بس بـ 20 يوم ؟؟
باين انها رح تكون سنة متعبة جدا للاعصاب .. اذا استمرت على نفس المنوال رح تكون فعلا الـ 2012 نهاية العالم..

هادي اول تدوينة بالسنة.. بس مش عارفة اكتب عن ايش ولا ايش ولا ايش

بدت من اول ليلة بتجربة شخصية اول مرة اعملها بصراحة .. اني رحت حضرت حفلة راس السنة بالمطعم الي بتمتلكه عائلتي بمدينة غزة .. وكانت ليلة مليئة بالاحداث ..


ليلتها سألني والدي اذا كنت حضرت راس السنة في بروكسل .. فاجأني سؤاله بصراحة .. راس سنة 2008 كنت لسه واصلة جديد ومش قادرة اتزكر ايش كنت بعمل ليلة راس السنة ... يمكن كنت بالسكن برتب اغراضي ويمكن كنت طالعة مع عيلتي التانية هناك .. حقيقي مش فاكرة .. اما راس سنة 2009 فكانت حرب غزة شغالة وكنت بجاهد ما بين دراسة امتحانات اخر الفصل وما بين متابعة موقع الجزيرة وتقارير تامر المسحال على موسيقى المفرقعات النارية الي كنت سامعاها من غرفتي

عودة لراس سنة 2011 .. قبل ما تنتهي السنة بكزا دقيقة فزت بجهاز توستر عشان عرفت اقول "ارنبنا في منور انور .. وارنب انور في منورنا" تلات مرات ورا بعض

شرطة حماس كانو بحتفلو معانا على فكرة .. ووجودهم كان دمه خفيف جدا للحقيقة .. يعني من غيرهم كانت رح تكون حفلة رتيبة عالاخر
اول اشي قالوا مافش وحدة ست تمسك شيشة .. الشيشة للرجال فقط
وطبعا الموجودين هللوا فرحا عشان حكومتنا خايفة على صحة المرأة ومش فارقة عندهم صحة الرجل
تاني اشي قالوا ممنوع نحتفل عالساعة 12 .. لا نطفي الضواو ولا نصفق على رأس الساعة ولا ترحيب بالسنة الجديدة (عشان راس السنة بدعة) عالساعة 12 وربع عريف الحفلة اعلن عن انوهم سمحوا لبابا نويل يدخل القاعة وهو جايب معه كيكة كبيرة .. كل الي صار ساعتها انو الناس فرحت بالدخول الميمون وعبرت عن ترحيبها بالتصفيق والتهليل والتصفير ..!
يعني احنا رحّبنا ببابا نويل والكيكة مش بالسنة الجديدة .. هناك فرق كبير على فكرة

الموهم .. عدت الليلة على خير - نوعا ما - ومحدش انحبس يومها

لكن بمجرد وصولي البيت عرفت عن تفجير كنيسة الاسكندرية


مش هاكذب عليكو واقول انو الخبر نكد علينا كلنا بالبيت .. هو نكّد عليا لحالي لانو انا الوحيدة الي عندي تويتر ومحدش كان مهتم يفتح عالاخبار الساعة 1 ونص بالليل .. فا قضيت بقية ليلة راس السنة بتابع التغريدات الباكية والمصدومة للشعب المغرد على تويتر

اسرتي في هالكم يوم الاوائل من السنة كانت مشغولة بحدث من نوع اخر .. الا وهو الاحتفال والتجهيز لخطوبة اختي العزيزة .. وهو حدثٌ لو تعلمون عظيم خاصة في اسرتي .. في منكم ناس بيعرفو ليش , وناس مش ضروري يعرفو ليش .. لكنه فعلا كان حدث مزلزل ويفصل بين حقبتين من الزمن .. ايش الي انا بقولو هادا !؟

المهم بدي ابارك لاختي من معاميق معاميقي وبحكيلك انو احيانا بفشل في اظهار مدى سعادتي لكٍ وبكٍ .. بوامة منتي عارفة .. بس انا عارفة انك عارفة اديش انا سعيدة عشانك


هنا بدأت تونس تظهر بالصورة .. كنت بعرف من تويتر اخبار مباشرة واشاعات عن الاطاحة بالرئيس من قبل الاطاحة الفعلية بكزا يوم .. وكنت تقريبا الوحيدة بالبيت الي دايرة بحكي زي المجنونة "فيه ثورة بتونس" , "يا جماعة الخير افتحوا عالجزيرة فيه مظاهرات بتونس" , "سمعتو عن الي قاعد بيصير في تونس؟" اخر ما يزهقوا مني يفتحوا عالجزيرة وما يكونش فيه اشي يدل انو الي بحكيه صح !

يوم ما صارت الاطاحة وفعلا زين العابدين بن علي هرب من تونس .. كنت بردو مصدر الاخبار الاول بالبيت وفتحت على العربية اتفرج بمنتهى الانشكاح .. اهلي اه كانو مهتمين بالموضوع ومش عارفة ليش اول اشي حكتو والدتي "يلا عقبال مصر" بس بعد شوية فقدو اهتمامهم بتونس عشان كان فيه مواضيع اهم يحكو فيها (!) صرت كل ما بفتح سيرة تونس الاقي الرد "واحنا مالنا ومال تونس".


مش رح احكي كتير عن الثورة وتونس والحرية والشجاعة الخ الخ الخ .. الي بيعرفوني منيح بيعرفو اديش ما بعترف بموضوع الشعارات هادا .. انا سعيدة ومبهورة اكيد .. وحاسة انو تونس في هادي الايام اشجع من فلسطين المنقسمة .. ومنتصرة اكتر من غزة المهزومة نفسيا .. مثلي !

يستحق الشعب في تونس الحرية .. بينما كل الشعوب العربية التانية (واحنا اولهم) قاعدين بنتمنى نتحرر زيهم .. وفي نفس الوقت مش مستعدين ندفع اي ثمن غالي مقابل هادي الحرية.

ملاحظة شخصية: يبدو اني بيوم من الايام .. رح اندم على كوني انسانة مختلفة في مجتمع يهوى النسخ واللصق!