خلال الاسبوع الماضي صار حاجتين مهمين كتير بالبلد ..
اغتيال المناضل الفلسطيني الايطالي فيتوريو اريغوني يوم الخميس 14 ابريل 2011
وتنظيم فعالية تيدكس رام الله يوم السبت 16 ابريل 2011
وبشكل غريب .. الحدثين كان الهم علاقة قوية ببعض!
V for Vittorio
الفكرة هي اعظم كائن حي في الدنيا ..
يمكن تبدا صغيرة .. محدودة التأثير .. غير مسموعة .. مش موجودة الا في خيال صاحبها
لكن لما تكبر وتلاقي مين يعتني فيها
ينميها .. ينشرها ويكبرها ..
يرويها زي النبتة الصغيرة
بتصير خالدة .. باقية إلى مالا نهاية
ساعتها حتى ولومات صاحبها أو انتهت حياته بأي شكل من الأشكال .. فالفكرة ما بتموت
لأنو الأفكار .. مضادة للرصاص!
فيتوريو اريغوني بني آدم .. انسان .. آمن بفكرة العدالة والحرية .. آمن بفكرة فلسطين والمقاومة
ومش انا الي رح اقدر احكي عنه بالشكل الي بستحقه
بس بتذكر دايما اني كنت اشوفه مع اسرتي في واحد من مطاعم البحر ...
قاعد بهدوء يحسد عليه .. يشرب قهوته ويكتب على لابتوبه
كان لازم بيوم م الايام اروح احييه واسلم عليه .. واقوله اديش احنا ممتنين لوجوده معنا في فلسطين ..
آخر مرة شفته بيوم 15 مارس بساحة الكتيبة
لما حاولنا كشباب نبدأ حركة شعبية للدعوة لانهاء الانقسام .. فاكرين !؟
كان موجود بيننا .. بيصور الناس الي بتهتف وبتغني لفلسطين وبيغني معهم
مهما يكون نتيجة التحقيق الجاري حاليا عن جريمة الاختطاف والقتل
انا "فكرتي" انو اسرائيل وعملاؤها هما الي قتلوه
وعندي قناعة انو مش رح يكون الاخير ..
واحد من اسباب وجود هادي القناعة عندي ..
انو وقع تحت ايدي ملف زي هادا, بيقول انو الجيش الاسرائيلي كان عامل قائمة استهداف لنشطاء اجانب .. وفيتوريو كان على رأس القائمة
بتعرفو انو فيتوريو كان مناهض لاسرائيل حتى بموته؟
اليوم كان تشييع جثمانه ..وتم تنفيذ طلبه ورغبته ووصيته ..
أنه لما يموت يطلع من غزة عبر معبر رفح مش معبر ايرز
بتصدقو انو هادي كانت وصيته لأسرته ؟
------------------
TEDxRamallah
TEDxRamallah
مؤتمر تيد العالمي هو ملتقى للناس اصحاب الافكار التي تستحق الانتشار .. في كل المجالات .. بيصير منه نسخ محلية التنظيم في العديد من المدن والدول حول العالم .. فيه منه نسخ عربية زي تيدكس القاهرة و تيدكس دبي والسنة هادي كان اول مرة ينعمل في فلسطين .. تحت اسم تيدكس رام الله
كان إلي شرف المشاركة مع مجموعة رائعة من المتطوعين والاصدقاء لتنظيم نقل الحدث عبر البث المباشر في مركز القطان في غزة .. في نفس الوقت مع 19 مدينة تانية حول العالم
الحدث كان جاي في وقته .. وجو الحزن والخجل الي كان معبي الهوا بسبب مقتل فيتوريو كان الو تأثيره على كلمات المتحدثين على مسرح قصر المؤتمرات في بيت لحم
وبعد ما انتهى اليوم ..وبسبب عظمة الكلمات والعروض الي قدموها اشخاص فلسطينيين ناجحين ومشرفين .. اتحول الشعور للفخر والاعتزاز .. وحب الحياة
المتحدثون في تيدكس رام الله
اختلطت دموع هويدا عراف مع صوت ريم البنا الدافي , سرت في اعماقي واعماق الحضورقشعريرة وسكينة .. واتذكرنا اديش بنحب فلسطين ..
عرفنا انو فيه ناس كتير بتعمل حاجات حلوة عشان اطفال فلسطين .. زي الطبيب الامريكي ستيف سوسبي ..
وناس كتير بتعمل معجزات وبتتحدى الاحتلال بالعمل مش بالكلام .. زي المناضلة ضد جدار الفصل شيرين الاعرج
ضحّكونا على حالنا .. ليلى العطشان بروحها المرحة ومنير فاشا وجاجته الفلسطينية وسعاد العامري هي وشارون وحماتها
ورجونا فلسطين بعيونهم .. بعيون الزوار من خارج كوكبنا المحتل .. أليس والكر ومارك جونزاليس
اندهشنا على قدرة الفلسطيني على الابداع والابتكار .. والحكي عن امور علمية معقدة بأبسط الكلمات .. زي ما عمل فينا خالد السبعاوي .. الي دمج حكيه عن الجيوثيرمال سمثنج بالسياسة والعلم والنكتة
ولا محمد الخطيب هو والبازينجا تبعته! ووائل عتيلي وخرابيشه
كان ميدان التحرير حاضر .. واديش هتفنا لما حكالنا محمد الدهشان عن مصر
كان يوم من العمر .. والحمد لله كل الحاضرين شحنوا طاقة ايجابية بتكفي لسنة قدام
ما تحرموا حالكم انتو كمان من هادا الاحساس
وبتمنى انو بتدوينة تانية اكتب بالتفصيل اكتر عن هادا اليوم
--------------
ملاحيظ عالسريع:
تسجيل الحدث موجود على تلات مقاطع في هادا الرابط
وان شاء الله ساقوم بتنزيل المقاطع اول ما يتم اضافتها على يوتيوب
صورة فيتوريو من تصميم أبو الشريف
عنوان التدوينة مقترح من خالد ابو شعبان
TEDxVittorio
تمت مراجعته من قبل علا من غزة
في
أبريل 19, 2011
تقييم:
تمت مراجعته من قبل علا من غزة
في
أبريل 19, 2011
تقييم:
تدوينة رائعة يا علا!
ردحذف"انا "فكرتي" انو اسرائيل وعملاؤها هما الي قتلوه" .. فعلا، نظريّتك منطقيّة. اللي عرفوا يخلّوا جلودستون يغيّر رأيه بعد سنتين واللي عرفوا يغتالوا الكثير من أعدائهم، مش بعيد يدبّروا اغتيال فيتوريو. خصوصا التوقيت ممتاز مع تراجع جولدستون عن تقريره.
أما بالنسبة لتيد..انا انبسطت كتييييير انه نظّموا هالحدث في فلسطين.. روعة :) منتظرين التفاصيل ان شاء الله..
but so far sounds like it was a successful, exciting event.. way to go!
لو كان فيتوريو حيًا لكان أفضل من يحمل فكرة ..
ردحذفانتهى الحدث بنصف يوم الا ثلاث ساعات .. لكن لم ينته تأثيره ولن .
يسلمو هالانامل علا :)
*P.S.: I meant the timing is convenient because if Israel manages to frame Hamas (or other religious groups) for Vittorio's murder, then they can use that as a supporting argument for "targeting civilians", & one more reason not to trust Goldstone's "original" report.
ردحذفمرحبا علا..
ردحذفأنا كنت على الطرف الآخر..في بيت لحم :)
إن شاء الله عقبال ما يكون فيه TEDxGaza و اكون هناك..مش بالفيديو كونفرنس :)
سعيدة بالشحنة الايجابية اللي زودتكم فيها هادي الفعالية ..
ردحذفيلا تكّوا عنكم همومكم و اقفوا منارات غزاوية تنور ليالي طال عتمها ..
بنبسط لما تنبسطي :)
كل يوم بزيد الاقتناع الداخلي انو اسرائيل هي محرك اغتيال فيتوريو...
ردحذفللاسف احنا شاطرين نقتل بعض...بس ولا مرة حد استجرى يقتل متضامن معنا
و عن تيدإكس فكان خبرة رائعة...بتمنى انو نقدر انطورها بطريقة ما...مش يمكن نعملها بغزة بيوم من الايام :)
بالنسبة لفيتوريو.. انا ما قابلته ولا مرة ولا سمعت عنه قبل خطفه وقتله بس موقفه حتى بموته كان شيء يدعو للفخر بإني من فلسطين.
ردحذفأما تيدإكس رام الله كانت كمان أول مرة إلي أحضر هيك حدث بس كتير أثرت فيي أفكار اللي حكوا وخاصة سعاد العميري لما قالت بالآخر معك 60 ثانية تفكر هل أنت مبسوط باللي بتعمله؟ أنا متأكدة إنه ناس كتير من اللي حضروا فكروا بهاد السؤال وبدوا فعلا يدوروا على سعادتهم وفي ناس غفيروا حياتهم فعلا بعد ما سمعوا هاد الكلام
شكرا إلك علا في المقام الأول لإنك خبرتيني عن تيدإكس وشكرا لكل الشباب المتطوعين اللي خلونا نعيش هاللحظات الفريدة من نوعهاواللي غيرت حياة ناس كتار
المفروض بلغتيني يا علا .. علشان احضر معاكم ، يلا خيرها في غيرها ..
ردحذفأظن اني بطلت اعرف اكتب وأعبر عن اللي في بالي زي زمان يا علا.بقول لحالي ان شاء الله تكون هادي مرحلة انتقالية بحياتي ورح اضلني متمسكة بهالفكرة على أمل :)فبس بدي اقولك اني فخووووورة فيكي وبس اشوفك أو تنجاب سيرتك بالعيلة بحس وداني طرطقوا بدي اسمع اخبارك دايما وأشوف لوين وصلتي وكأني بعيش معك حلم نجاح,,,ما تضحكي عليا بس هادا اللي طلع معي.... طبعا المدونة راااااااااااائعة وعجبتني كتيييييير (لانو الافكار مضادة للرصاص) اسنمري يا عزيزتي:)
ردحذفالله يرحمو يارب ..والله انو انسان رائع وقليل الي زيو هالايام ... تسلم ايدك يا لولو زي دايما متألقة وبتجبيلنا اشياء جديدة بنستفيد منها عن اي موضوع :)))
ردحذفوانا كمان قريبتك الي معجبة جداااا وفخورة فيكي :)))
ما تركزوا على الانتفاضة التالته و اعتقد ان ده وقت مناسب جدا لكده
ردحذفانه رابط نداء لتكريم بن لادن من قبل حركة حماس
ردحذفhttp://www.facebook.com/event.php?eid=117797901635864