من غزة ,, مع الأسف

بصراحة ,,, انا خجلانة منكو يا جماعة

المفروض اني اتكلم عن الاحداث الي بتشهدها البلد ,, على اساس ان مدونتي من غزة

بس انا خجلانة جدا

ايش احكي ؟؟ وايش اقول ؟؟

ان الرصاص شغال 24 ساعة في اليوم فقط لا غير ؟؟
ان اصوات الانفجارات كتيرة ,, زي ايام القصف الاسرائيلي ويمكن اكتر ؟؟

ان الناس في غزة خايفة تنزل على شغلها ومدارسها وعلى جوامعها وجامعاتها ؟؟

ان القتل اصبح اهون على المتقاتلين من الجلوس على طاولة واحدة ؟؟

ان الاخوة يأسوا من الاتفاق ,, واصبح البديل ان احدهم يخلّص على التاني ؟؟


بكتب وبدوس على الكيبورد وانا سامعة الرصاص حوالين البيت , وكل شوية بيقوى وبيزيد

عندي مغص في معدتي وصداع في راسي ,, الظاهر ما نمتش كويس امبارح ,, بس تعرفو اني حلمت .. بقالي فترة ما بحلمش بالليل ,, ولو حلمت لما اصحى ما بتذكر اللي حلمته ,, لكن امبارح حلمت اني رجعت طالبة في جامعة الازهر واني بمتحن

فعلا ,, صحيت الصبح على اساس عندي امتحان لازم انزل اراقب عليه ,, امتحان اتأجل مرتين تلاتة , دفعة منحوسة بعيد عنكو ,,
طبعا الساعة 9 الا عشرة نزلت من البيت وانا سامعة صوت الرصاص جاي من النواحي اللي فيها الجامعة ,, وقفت استنى تاكسي ,, الشوارع فااااااضية , كأنو فيه منع تجول
ربنا ألهمني اني اتصل بواحد من الدكاترة ,, مشرف لجنة الامتحانات ,, رد عليا وسألتو ,, دكتور سامي ,, هو في امتحان اليوم ؟ رد عليا بنص ضحكة ,, امتحان مين ياعلا الله يهديكي ,, قبل شوية قصفو الجامعة بالأربيجيهات (جمع أر بي جي) !! شكرته وقفلت الجوال ورجعت تاني عالبيت

وانا ماشية واحدة من الجارات طلّت على جوزها في الشارع وسألته ,, وين رايح يا زلمة ,, جاوبها رايح عالشغل وين بدي اكون رايح يعني ,, ردت عليه بلا منه الشغل اليوم ,, اطلع

اكيد طلع


الخلاصة ان غزة اليوم هي اسوأ مكان ممكن تكون موجود فيه اليومين هادول ,, بلا شغل بلا علم بلا اي حاجة مفيدة ,,

صوت الرصاص اعلى من اي صوت اخر


ومازال الطخ مستمرا