خواطر رمضانية 2009

كنت قاعدة بأمان الله .. بفكر في الي جاي
لقيت في نفسي حاجة انو افتح المدونة واقعد ارغي شوية .. من زمان ما حكيت ولا كتبت


المهم اخر اخباري (هههه ما تقول الا نجمة من نجوم المجتمع قال يعني) انو مناقشة رسالة الماجستير تبعتي ان شاء الله يوم الجمعة القادم 4 سبتمبر .. وعلينا وعليكو خير
بحاول انو اكون هادية وكووول .. وفعلا الي بيشوفني ولا ممكن يخطر ببالو انو بعد اسبوع رح يكون اهم يوم بالنسبة للسنتين الي فاتو من حياتي .. كالعادة .. لا توتر .. لا قلق .. لعب عالفيسبوك عاااادي جدا
ربنا يستر بس


غير هيك لازلت في حالة حيص بيص بما يتعلق يما بعد هذه المرحلة .. يعني اراء كتير من الناس حواليا واهلي وذوي الخبرة والرأي الحكيم .. انو لازم اكمل واستغل وجودي خارج غزة .. واني ما استعجل ابدا بالرجوع الى مستقبل مجهول ومكان غير مستقر ومجتمع بيتحرك من وضع سئ الى وضع اسوأ


الرأي التاني انو بيكفي غربة وانو خلص هيك الماجستير نعمة وفضل من الله .. وبيكفيني سفر وشمة هوا وبُعد عن ال"وطن" والعائلة


المهم انا عملت من جانبي محاولة انو اقدر اضرب عصفورين بحجر بأنو اقدر اروّح على غزة في القريب العاجل  وفي نفس الوقت اخلي خياراتي مفتوحة بالنسبة للعودة الى بروكسل ..  لكنها فشلت ... والخطة الحالية للأسف رح تستدعي البقاء هنا مدة اطول الى ان يحصل امر معين ومن بعده اقدر ارجع على غزة


انا لسه مش عارفة اقرر .. وغالبا هاسيب الامور تمشي لحالها واشوف لوين هاتوديني
كعادتي بردو .. بحس دايما انو اغلب الامور المصيرية بحياتي صارت بدون تخطيط مسبق من ناحيتي


بغض النظر عن الي فات هادا .. بدي احكيلكم عن رمضان في بروكسل السنة هادي


اول اشي ..  انا عارفة انو رمضان في كل العالم جاي هالسنة في الصيف وربنا يكون بعون الجميع ويتقبل منا جميعا


اولا رمضان هادي السنة ببروكسل جاي والدنيا شوب وحر ودرجة حرارة لا تقل عن 27 و26 واحيانا بتوصل 30 (بعضكم هايقول احمدي ربنا وبوسي ايدك شعر ودقن) بس هادي درجات حرارة احنا مش متعودين عليها هنا


تاني اشي .. اليوم ماشاء الله طويل طويل .. يعني ببداية رمضان كان الفجر الساعة 4 ونص والمغرب حوالي الساعة 9 .. 16 ساعة ونص صيام !! طبعا الوقت بيقصر كل يوم عن يوم .. بس بردو بيضل طويل
(يعني حالا وانا بكتب اذن العصر الساعة 5 ونص)


اه بالمناسبة .. هادي امساكية شهر رمضان في بروكسل لعام 1430 ..
فيه كزا حد وصل للمدونة كنتيجة للبحث عن الامساكية






ثالث اشي .. يا جماعة والله ما في وقت كافي للأكل !! يعني يادوب بتخلص فطور بتكون الساعة صارت 10 مساء ..  يعني ببلادنا الساعة عشرة هادي بتكون هضمت فطورك واتحليت وجعت وعايز تقوم تاكل اشي تاني ... وبعدين لازم الواحد ينام بدري لأنو علينا شغل (مش انا .. ناس تانية ) وبعدين لو عايزين نتسحر لازم تكون صاحي الساعة 3 ونص بالكتير وتقوم تعمل سحورك لحالك وتصلي وترجع تلحق تنام كام ساعة عشان تقدر تصحى تاني يوم للشغل .. فش وقت زي رمضان عنا ببلادنا ..
هو طبعا اللهم لا اعتراض والحمد لله على كل شي .. انا بس عايزة احطكم بالصورة ههههه
وللأسف بهادي السنة الوقت مش رح يسمح بالتروايح في الجامع .. لأنو المواصلات العامة بتوقف عند ساعة معينة .. والعشا السنة هادي جاي كتيييير متأخر ... بس رح اجرب ولو مرة وحدة على الاقل اني اروح


بالنسبة للمسلسلات ... طبعا فيه موقع موجود عليه كل المسلسلات والبرامج اون لاين .. وهادي نعمة كبيرة .. المهم انا باب الحارة مش رح اتابعه زي كل سنة .. وبعد حوالي اسبوع من رمضان استقريت على مسلسل ونيس واحفاده (بيذكرني بفترة حلوة ايام اجزاءه الاولى) ولسبب او لأخر شفت كم حلقة من حرب الجواسيس وشكلي كدة زي ما اكون بتابعه مع انو مش عاجبني


المهم انو الخلاصة والبوتوم لاين عشان اختم هادا البوست
مناقشتي بعد اسبوع
رمضان السنة هادي طويل
وتستمر حالة الحيرة
وانا فعلا لازم اقوم عشان "البدء" في تحضير فطور اليوم


كل سنة وانتو سالمين ورمضان كريم