عن التدوين وسنينه





لو كان يوجد للمدونين قًسـَم يحلفو عليه يوم ما يبدأوا مدوناتهم .. كان زمانهم اعتبروني مخالفة للقسَم ورامية به عرض الحائط .. وكان زمانهم سكّرولي اياها من زمان "هما مين ؟!"

حاسة حالي خنت هادي الصفحة بعد ما صار نشاطي كله عالفيسبوك ومؤخرا على تويتر

ههه باركولي .. صارلي تويتر كمان .. بس حاسة حالي مش عارفة اسوق عليه كويس

بصراحة .. انا تقريبا نسيت الفايدة من هادا المكان .. اوقات بحس انو فعليا انا بحكي مع حالي ومع عشرة او 15 نفر .. مهو بيني وبينكم .. حكي تخبيص زي هادا الي قاعدة بكتبه ما بستحق اكتر من هيك قراء الحقيقة

اليوم بالصدفة شفت فيلمين وطلعت المدونات اشي اساسي فيهم : فيلم Motherhood و Julie & Julia .. وزي ما تقولوا كنت منتشية في الفيلمين لدرجة خلتني ارجع اتذكر فوايد التدوين من اول وجديد

1- المدونة هادي مش بس مكان للفضفضة .. هادي كمان تأريخ البني ادم للاحداث الي بتصير معه .. تأريخ للشخص نفسه بدرجة اولى .. بكفي اني اقرأ شغلات كنت كاتباها زمان عشان اتذكر حالي كيف كنت بفكر .. وايش كانت احلامي .. واديش "كبرت" من اول ما فتحت هادي المدونة لغاية اليوم

2- لما بحكو انو الكتابة بتريح صدقوني معاهم حق .. الكتابة لاجل الكتابة .. مش لأجل قضية ولا عشان تعليقات ولا عشان لما حدن يكتب "غزة " في جوجل يجي يفتح ويلاقيني كاتبة كلام مفيد .. مش ضروري يعني كل الحكي يكون مفيد .. كتير صرت بكرر تعبير "لا بأس من بعض التفاهة" .. صح ؟!

3- لما البني ادم منا يحس باشي او يراود تفكيره اشي معين .. ويجي يكتبه في هالمساحة الفاضية .. رح يصير معه حاجة من اتنين : يا إما هايلاقي حدا تاني بيشاركه بالتفكير في نفس الافكار .. يا إما هيلاقي انو الي بيفكر فيه هادا اصلا عمره ما خطر على بال حدا فايعرف حاله انو فيه عنده مشكلة بمخه .. يا إما مش هايلاقي حدا يرد عليه من اساسه .. وساعتها هايبطل يفكر في الفكرة هادي اصلا ورح يروح يدور على حاجة مفيدة يعملها بحياته

4- وجود الفيسبوك في حياتي .. بصراحة سببلي نوع من الهسهس .. احساس انو لو غبت ساعة اني هارجع الاقي الدنيا مقلوية مثلا ... بعمل شير للاشي وانا بتخيل اكم واحد هايعمل لايك واكم واحد هايعمل كومنت .. اكيييد هادا اشي مش صحي بالمرة ... وبعدين المشكلة في الفيس انو مهما كان الاشي الي بحكيه او بشارك فيها البشر الي حواليا "على ستيتس او شير او وات ايفر" بيكون تأثيره محدود وطيّاري كدة .. وبالتالي المدونة بتعطي عمر اطول للفكرة وتأثير اكبر للملاحظة وفيد باك اعلى من الفيسبوك

5- صار وانسألت اكتر من مرة خلال الفترة الماضية .. انو اعرّف المدونة تبعتي .. هيو على الاقل صار فيه ناس بتسمع بهالكلمة العجيبة في غزة .. عموما انا ساعتها بلتخم وما بعرف احط تعريف او تصنيف للمدونة .. مهي المدونة في عرفي انا مش لازم يكون الها تصنيف .. ولا هدف بصراحة .. الي عايز يكتب بهدف معين هادا لازم يصير صحافي ويكتب في اماكن رسمية .. اما المدونة فهي مكان للحكي الي ملوش هدف ... زي الكلام الي انا قاعدة بكتبه هادا بالزبط

سيبكو من القصص هادي كلها .. الموضوع ااكبر مما تتخيلو على فكرة

انا نويت ان شاء الله بعد البوست العك هادا .. اني ارجع اكتب زي زمان .. ان شاء الله
اولا لأنو فيه حوالي ميت الف حاجة صارت ولازم ينكتب عنها
رمضان والعيد في غزة بعد الغربة - المفاوضات - قريبنا الي اتقتل - لقاءات المدونين وزيارة ليلى الحداد لغزة - التحديثات الي عملتها بالمدونة - كورس التدوين الآمن الي اعطانا اياه سامي بن غربية - زائد شوية حكاوي كدة مش عارفة اذا بنفع اكتب عنها او لأ .. لوقتها بقرر

ثانيا وهادا الاهم .. اني فعلا فعلا اشتقت للمدونة هادي .. وحاسة انو لازم اصالحها صلحة كبيرة على الخيانة والغياب طول الفترة الماضية

شكرا كتير لكل واحد وصل بالقراءة لعند هنا :)

كل عام وانتو بخير


عن التدوين وسنينه عن التدوين وسنينه تمت مراجعته من قبل علا من غزة في سبتمبر 07, 2010 تقييم: 5

هناك 18 تعليقًا:

  1. مرحبا علا
    على فكره العدد في اللمون يا علا يعني ما تاخدي ببالك نقطة العدد ;) لانو الكثرة مش معناها الجودة،
    الناس بتختلف في الاهتمامات وكل مدون الو متابعينو
    هادي مدونتك الشخصية يعني عباره عن نظرتك للامور وشو بتقابلي بالحياه اليومية من مواقف وطرائف
    واهم شي بالموضوع هادا انو بتشاركي الاخرين في اللي عندك وشو بيدور في بالك
    وبعدين هادي مدونة شخصية مش موقع تابع لاشي رسمي
    يعني فيها جد على مزح
    بالعربي زي ما حكيتي الكتابة لاجل الكتابه
    يعني بنقدر نقول جزء منها تنفيس انفعالي
    على فكره بهالنقطة حسيت إنك قلبتي في بوستات قديمة هههههه وبعدين كتبتي هالنقطة !!!!
    بالنسبه لموضوع الفيسبوك
    لا تعليق لانو اشي طبيعي مش غريب كتير
    اي اشي الواحد بيعملو بيحب يلاقي في عالم مهتمة فيه
    بعدين شو جو هالاحباط ههههه محسساني انو المدونة ما في حد بيفوتها
    مدونتك طلعت في مجلة العربي وبنفس الصفحة كانت برضو مدونة رشيد بيدوسي وبنقدر نحكي انو رشيد هو عميد المدونين الفلسطين - بدون ما يزعل حد من حبايبنا المدونين بس ما ظنيت في فلسطيني بدأ التدوين قبلو :) - وبالذات على مستوى الوطن العربي في الوردبرس.
    وكمان Global Voices اقتبست تدوينتك "قراصنة المتوسط"
    وبتحكي ما في حد مطلع على المدونة!!!
    على فكره يا علا الاصل المدونة وبعدين صفحة المدونة في الفيسبوك....
    وبانتظار التدوينات القادمة
    وكل عام وانتم بخير :)
    يللا تحياتي

    ردحذف
  2. بجد وحشتنا تدويناتك اللي بتعبر عن روح الإنسان العادي البسيط في غزة
    و ابقي ضيفيني على التويتر عندك https://twitter.com/egyptianengneer
    :)
    منتظرين تدويناتك الجديدة

    ردحذف
  3. علا
    تعرفي ان كل شوية اسمع مدون كاره الفيس بوك وعايز يرجع يهتم بمدونته
    بس غالبا الفيسبوك ادمان
    اناماهجرت التدوين الحمد لله بس اتوحشتك هنا كتير
    خليتيني احكي زيك
    :)))

    ردحذف
  4. بصراحه اول زياره ليا للمدونه واكيد بعد اذنك مش هتكون الاخير ان شاء الله
    مدونه جميله

    ردحذف
  5. على فكرة انا كتبت تعليقي وارسلته بس رجعت ما لقيته
    باين انه ضاااااااااااع :(
    عموما بما أني نسيت شو كتبت بالزبط عشان ارجع اعيده فاللي بدي أحكيه انه مدونتك حلوة ياعلا وأنا متابعاها من مدة واحلى ما فيها اسلوبك العامي بالكتابة لانه بيدخل جوه البني آدمين بدون حواجز
    والمدونة بتختلف عن الفيس انها بتضل عامة للكل اما الفيس خاص وانتي وحدك بتقرري مين يقرا تدويناتك فيه
    بس هي اللي متذكراه والباقي نسيته....

    وفي انتظار جديدك

    ردحذف
  6. ابراهيم
    دايما سبّاق يا ابراهيم :)
    لا هو مش جو احباط ولا اشي .. بس انو عنجد مرات بحس انو المدونات هادي في واد وباقي الناس في واد تاني ولا حد سامع ولا داري فينا اصلا .. وبنفس الوقت فخورة والله بهادي المدونة (هابدا انفش ريشي عليكو خلص هع)


    مهندس مصري
    انا كمان وحشتني هاديك الروح الي كانت موجودة .. لأ خلص ان شاء الله هاترجع تاني .. وعد !


    بثينة
    مش احنا الي بنقول "اتوحشتك" هادي :p احنا بنقول اشتقتلك :D
    بس "احكي" زيك مزبوطة هههههههه
    والله يا بثينة انا معجبة جدا بنشاطك انتي بالزات .. يعني شوف سبحان الله مع انو بردو بثينة صارت ناشرة مشهورة وصاحبة كتب وربنا اعطاها .. لكن لسه بتكتب في المدونة وتدوينات "دسمة" يعني .. لأ ماشاء الله عليكي بجد !!


    عمرو
    والله انا سعيدة جدا بتعليقك الاول كمان :)) اهلا وسهلا


    اماني
    ييي وين راح التعليق !! دوري عليه منيح يمكن يكون راح هنا ولا هنا !!
    معلش بتحصل في احسن المدونات ! وبشكرك بشدة انك رجعتي كتبتي تعليق تاني ! روحك طويلة ماشالله
    انا بحب اكتب بالعامي عشان ساعتها انا بكون بكتب الي بدور بمخي فعليا .. بس احيانا لازم الحكي يكون ارتب شوية لو بحكي عن موضوع جد ..
    النقطة الي حكيتيها عن المدونة والفيس انو المدونة عامة .. مهو هادا الميزة فيها ! انو توصل الفكرة او الشغلة الي براسي لاكبر عدد من الناس سواء عندي عالفيس ولا مش عندي
    بس الاخطر من هيك .. انو الفيسبوك بيفش غلك ولو مؤقتا بأنك تطلعي الشحنة وتعبري عن نفسك .. بس فعليا التأثير تبع هادا الاشي بيكون كتير قصير المدى وبيضيع على طول ... حدا فاهم عليا ؟!
    المهم ,, اذا رجعتي اتزكرتي تعليقك الي فات ايش كان اكيد بحب اسمعه :)


    تحيــــــــــــــاتي

    ردحذف
  7. (فان حزب الله هم الغالبون.)
    انا من ایران.
    فی امان الله.

    ردحذف
  8. لا والله ما تذكرت الا اللي كتبته، مع الصيام الزهايمر بعمل عمايله :)
    عموما الحمد لله انو بكرة لسه مش العيد عشان انا مش جاهزة لسه لاستقباله بصراحة فرحت انه بكرة المتمم لرمضان وكل عام وانتو بخير
    معلش اسمحيلي دونت في مدونتك :)

    ردحذف
  9. parizad
    اهلا بك اخي من ايران
    اسعدني تعليقك

    محمد امام
    اشكرك بشدة :)

    اماني
    كل عام وانتي بخير ... وهيو العيد قرب يخلص
    طبعا فش داعي احكيلك انو مكانك ومطرحك .. وبدي ياكي تاخدي راحتك عالآخر :D

    ردحذف
  10. مرحبا علا
    طيب ولي وصل للقراءة لحد هنا وقرأ التعليقات هادا بيطلعلوا خمسين شيكل.. أو كرت أبو عشرين للجوال..:)
    كل عام وانتي بخير..
    انابدي أضيف شغلة كمان. انتي بتحكي إنه اللي عايز يكتب بهدف معين هادا لازم يصير صحافي ويكتب في اماكن رسمية. يعني مثلا هي أنا صحفي وبكتب أشياء حقيقية بتصير معي ورسمية ولكن ما بأعلن عن اسمي والمكان اللي بكتب فيه هوا وورد برس.. وورد برس غير معروف وغير هيك إنه التدوينة اللي بكتبها هيا بالعامية مش بالفصحى..
    أنا بقول التالي: إنه المدونات هيا صحافة شعبية وطالما إنها شعبية لازم ننزل لمستوى كلمة شعبي في لغتنا وطرحنا للموضوعات وفي دفاعنا عن كل القضايا..
    يعني باختصار المدونات لازم تعمل اللي الصحافة الحقيقة عاجزة إنها تعمله.. وأنا كصحفي واقع ضحية للسياسات الإعلامية اللي بتمارسها القنوات الإخبارية والصحف، وبالتالي لازم استخدم وسيلة التدوين لكشف الحقيقة للناس العوام..
    أهلا وسهلا فيكي من جديد.. بنبقى نتابعك..
    يعني الق

    ردحذف
  11. مقلوبة
    الي وصل بالقراءة والتعليقات لعند هنا, هادا بدو جائزة مرتبة والله .. منيحة فكرة الكرت على فكرة!
    مممم انت فايت من منطقة تانية يا معلم
    لأنو الكتابة باسم مستعار الها قواعد تانية مختلفة عن الكتابة بالاسم الحقيقي تماما ,,, بس حتى كتاباتك بقدرش احكي عنها انها رسمية .. لأنك رافع الكلفة وبتكتب هيك زي ما بتحكي من غير قال وقالوا ويقولون !
    انا بحكي على الناس الي معتبرين المدونة زيها زي الصحيفة والقناة الاخبارية .. وانو "دايما" لازم نكون من خلالها رافعين لواء القضية والامة والاهداف الوطنية الكبرى!
    يا زلمة انا مرة نزلت موضوع عن الافلام وكان اول اشي بكتبه بعد ما خلصت الحرب بشهر "عشان ما كنتش قادرة اكتب اصلا بعد الحرب" فا بعتلي واحد من القراء مشكورا بيلومني انو "هادي مدونة من غزة, بنفعش الناس تفوت وتلاقيكي كاتبة عن افلام"!
    المهم , انا سعيدة بأنو واخيرا صار فيه تشكيلة واسعة من المدونات في غزة .. وكل واحد عنده حرية يكتب زي ما بدو وبقرأ للي بدو اياه ..
    كل عام وانت بخير :)

    ردحذف
  12. عجبتني كلمة يا زلمة.. !
    وكل عام وانتي بخير.. لازم يكون فيه ديمقراطية..!

    ردحذف
  13. والله و أنا نفسي أرجع أكتب. يالله قوليلي شو بيصير معك بلكي شجعتيني. بعدين كيف لازم نحزر التويتر تاعك؟ بحث مثلا ؟؟ أيامك سعيدة :)

    ردحذف
  14. 100 اهلا وسهلا يامرحب بعصام
    عاش من قرالك والله
    ابدا يا سيدي الفكرة انو تقعد على هالجهاز .. وتكتب في الاول اي حاجة في مخك من غير تزبيط ومنتجة .. وحط في بالك فكرة انك بدك تكتب .. حاتلاقي الوحي نزل بعد يوم ولا يومين على طووول
    وهادا التويتر تبعي
    مش هالاشي المفيد انو بتتابع صدقني :p
    تحياتي

    ردحذف
  15. طمعت في الاجابة عن استفساري وكنت مخطئاً في انتظاري للاجابة على اي حال فالمدونة ليست بما فيها من اضافات
    ولو ان مدونتي ستبقى صفحةً بيضاء لن اسأل احداً شيئاً
    اشكرك على حذفك لآخر تعليقين
    واسف على هذا التعليق الثالث فهو فقط كان مجرد تعبير عن اهداري لقيمة الوقت
    وليكن مصيره مع اخوته
    والله لست غاضبا وفقك الله

    ردحذف
  16. واضح انه حضرتك مخطئ وغير صبور بالمرة
    لكني قمت بالفعل بالرد على تعليقك
    هنا
    حيث يوجد تعليقين باسمك كما انني عادة لا اقوم بحذف التعليقات

    عموما شكرا لك

    ردحذف
  17. كم انا خجل من نفسي
    وكم انت كريمة
    وصبورة على المتسرعين امثالي
    تقبلي اعتذاري
    وسامحيني على حماقة التسرع
    ظننت عند عودتي لنظر الاجابة على سؤالي في المرة الاولى
    ان الصفحة عندكم تحتوي على تدوينة واحدة لذلك تسرعت ونزلت بالسهم الى اخر الصفحة حتى اجد زر التعليق
    ولم ادرك انني دخلت على تعليقات موضوع اخر
    ومع ذلك لن اعتبر ذلك مبرر

    طمعت في الاجابة على سؤالين فتعلمت درساً اهم
    اشكر لك اهتمامك الذي صدقاً لم اكن استحقه في المرة الثالثة
    وفقكم الله

    ردحذف