صَـداقـة تـوْأميّـــة



حدا منكم بيآمن بموضوع تناسخ الأرواح ؟؟

او مثلا عمرك قابلت انسان وحكيت معه .. وحسيت انك بتكلم حالك! انو الي واقف قدامك هادا هو .. انت ؟!

بصراحة انا حسيت هادا الشعور مع اكتر من حدا .. وفي عدة مواقف من حياتي كنت محظوظة واتقابلت مع اصدقاء حقيقيين .. كنت ما بحتاج اني احكي عشان يفهموني .. لأنو مخهم -يا سبحان الله- زي مخي بالزبط


هديل من الناس الي اكيد اكيد في حياة سابقة كنا توأم .. او حتى بني آدم واحد وعاود انفصل لسبب او لآخر

التشابه بيننا مش بس من الناحية المهنية - بتفصل بيننا سنة دراسية وحدة, لكن اتخرجنا من نفس الكلية , نفس التخصص , احنا التنتين كنا اوائل دفعاتنا (مش قلال بالبلد احنا هع) . وبعدين اشتغلنا معيدات بالكلية , وكل وحدة طلعت لها منحة ماجستير, كل وحدة اتبهدلت واستنت كتير قبل ما تعرف تسافر وتطلع من غزة, وقضينا سنتين كل واحدة في بلد غريب وطلعت عينينا لما ربنا كرمنا بالنجاح ورجعنا بالشهادة

مش بس هيك ! التشابه بيننا حتى في تفاصيل صغيرة.. بالشكل مبدئيا.. و بالروح وطريقة التفكير كمان

في الجامعة ما كان بيننا علاقة اكتر من زمالة وتبادل خبرات ونميمة عن الدراسة وما يخصها .. وبعد الجامعة الحياة اخدت كل حد بطريق .. لكن ادراكنا لحالة التوأمة الي بينا اتأخرت الى بعد ما الفيسبوك جمّعنا مرة تانية

بدأت الاحظ من خلال الستيتس والتعليقات انو فيه توارد في الافكار .. وبعدين من خلال النوتات الي كانت بتتركها احيانا .. عن هواجس الغربة .. وتقلبات المشاعر تحت المطر .. وتأرجح الحالة النفسية ما بين السعادة والاكتئاب عشرات المرات في اليوم الواحد .. انو فيه حالة غريبة من التشابه بيناتنا

يمكن لأنو كل واحدة كانت بتعيش في ظروف متشابهة .. فا هادا نتج عنه مشاعر متشابهة .. لكن عندي درجة من اليقين انو الموضوع اكبر من هيك بيني وبين هديل!

مؤخرا .. تم قبول هديل لمنحة دكتوراه في الولايات المتحدة .. واكاد ازعم انها مرت بنفس الحالة البهلوانية الي مريت فيها من عدة شهور عشان توصل للقرار المناسب .. لكنها كانت اجدع مني وقررت اكمال دراستها في امريكا :)

هديل بردو قررت انها تبدأ مدونتها الجديدة .. وانها تنطلق من عالم الفيسبوك الى عالم التدوين .. واعتقد انو اللعبة هادي رح تستهويها وانها رح تبدع فيها اكتر بكتير من ما اي حد بقدر يتخيل!



أقدم لكم أيها السيدات والسادة