الشعب يريد .. إنهاء 2011



سنة 2011 مش ناوية تجيبها لبر ... بأول تدوينة بالسنة لما كتبت عن تونس كنت مستغربة من كمية الأحداث الي صارت بأول 12 يوم من 2011 .. ما كنتش عارفة وقتها أنه مافش يوم واحد في 2011 كان خالي من الأحداث .. حتى هذا اليوم !

خلال الفترة الماضية , كل ما كان بيصير حدث مهم يستدعي تدوينة معتبرة .. كنت بتأخر أو بكسّل .. ولما يفوت الأوان كنت بقول لحالي : يلا مش مهم ! أنا كدة كدة هاعمل تدوينة تلخص أحداث العام زي عادتي في السنوات الماضية 2010, 2009, 2008 و 2007.

كل سنة كنت أبدا بالتجهيز لتدوينة الحصاد من بداية ديسمبر .. لكن السنة هادي لازم أبدأ أشتغل عليها عشان يادوب أقدر أنتهي منها بالوقت المناسب !

ولسه باقي تقريبا شهرين وعشر أيام على نهاية السنة .. والله وحده يعلم ايش متخبي فيهم

*******

وفي سياق آخر متصل منفصل, التدوينة هادي الهدف منها نشر بعض العبارات او التغريدات التي قلتها في حسابي على موقع تويتر مؤخرا .. نوعا ما تعبّر هذه التغريدات عن ردود أفعالي الشخصية والسريعة على أحداث الفترة الماضية ..

ترتيب العبارات ليس له أي مغزى الا الترتيب الزمني من الأقدم الى الأحدث..

- ليس من الصواب أن ننبهر أو نهلّل لأي شخصية سياسية في العالم! لكنه شئ جيد أن ترى أحدهم يؤدي دوره تجاه بلاده كما ينبغي, من حين لأخر! - بمناسبة زيارة أردوجان لمصر

- أن تكون مقتنعا تمام الاقتناع بفكرة ما .. يراها كل من حولك خطئا فادحا يستحق الشفقة وربما العلاج !

- اي حاكم نزيه .. لو قعد فترة طويلة اكثر مما ينبغي له رح يقلب ديكتاتور .. لأنو كرسي الحكم بيخرب الناس والنفوس.

- عندما ترغب في شئ ما, فإن الكون بأسره يطاوعك على القيام بتحقيق رغبتك" - باولو كويلو ... كم أرغب بتصديق هذه المقولة !

- بعد مروري بتجربة سرقة صورتي على بروفايل تاني في الفيسبوك .. صرت بفكر أغيّر الكارير تبعي من مهندسة ... لموديلز!

- منهم لله خبراء اللطم والشحتفة الي مفهمين العالم بره ان غزة فيها مجاعة .. انا بزعل كتير لما الاقي ناس لليوم مش عارفين اديش غزة حلوة ‎:(‏

- واحدة من حسنات خطوة الامم المتحدة انو الناس رجعت تحكي عن اللاجئين والقدس والحدود بعد ما كان اخر همهم الكوبونات والمصاري والمشي جمب الحيط

- تعميم على مساجد "الضفة" بالتكبير من مآذن الجوامع بعد انتهاء ابو مازن من القاء كلمته, ومساجد غزة؟ غالبا تم تعميم الحسبنة !

- تعليقي على خطوة التوجه للأمم المتحدة يتلخص في أغنية سيد درويش: اهو ده الي صار وادي اللي كان ! ملكش حق تلوم عليا .. تلوم عليا ازاي يا سيدنا ؟ وخير بلادنا مهوش في ايدنا؟ قلي عن اشياء تفيدنا وبعدها ابقى لوم عليا !

- تم الاتفاق مع دار ليلى للكتب على نشر النسخة الورقية من كتاب الـ 100 تدوينة بمشاركة 84 مدون ومدونة عربية.

- بيقولو ان الواحد لازم يشتغل عشان يجيب مصاري .. بس مين قال انو لازم تكون تعيس وانت بتشتغل ؟؟؟؟

- واذا كان الاردن انضم لمجلس التعاوني الخليجي, ومصر على وشَك .. طب "الهوا" الي بين مصر والاردن مش من حقه ينضم كمان ؟ حتى جغرافيا ما بنفعش الاردن ومصر يكونوا مع دول الخليج واحنا لأ ! لسه مش عارفة احدد تعريف كلمة "احنا" بس ما علينا.

- بعد شهر من انقسام التوقيت ... القارة الغزاوية والقارة الضفاوية واخيييرا رجعوا ماشيين على ساعة واحدة ... نقيم الأفراح مثلا !؟

- شعور حلو بعد لقاء مع مدير برنامج الأمم المتحدة الانمائي في فلسطين. بوجود مجموعة فعالة من نشطاء تويتر في غزة. فعلا فلسطين مليانة شباب رائعين .. وبإبداعهم بلدنا رح تصير أحسن.

- لن اتنازل عن نظرتي الايجابية للحياة .. وتفاؤلي بأن القادم سيكون أفضل .. بالرغم من كل الأسباب التي تدفعني إلى الإيمان بعكس ذلك !

- عندي مشكلة مع عنوان معرض الكتاب .. لازم يعني يكونله عنوان "فلسطين تقرأ رغم الحصار" ؟؟ بردو الحصار ؟ بنفعش "معرض الكتاب" وخلص !؟؟

- مقال يلخص حياة الراحل ستيف جوبز .. كتبه أستاذي المدون أحمد شقير عندما استقال جوبز من منصبه في شركة أبل

- ملخص الردود بشأن الترحم على ستيف جوبز :هناك من يظن أن كل المسلمين يستحقون الرحمة (حتى القتلة واللصوص) وكل الآخرين لا يستحقونها (حتى العباقرة) - مريد البرغوثي

- زي ما فيه ناس عاملة الحصار في غزة "سبوبة" .. فيه ناس عاملة حكم حماس في غزة "سبوبة" .. في الحالتين ماشي نظام الـ اهئ اهئ

- المفروض أفرح عشان ألف أسير رح يشوفوا ضوْ الحرية بعد طول عتمة الإعتقال ... ولا أزعل عشان نسبة 1:1000 ؟؟

- مجرد سؤال برئ : هو احنا بنفعش ندعو لتأسيس حزب جديد في فلسطين ؟؟ احنا يعني الناس الي مش فتح ولا حماس .. بنفعش ؟

- عندي مشكلة في فهم اشعار محمد درويش!

- أكثر ما أسعدني يوم الإفراج عن الأسرى .. أن فلسطين كلها كانت تحتفل .. فرحتنا كانت غير منقسمة, غير مجزأة .. كل فلسطين كانت في عيد.

- تخيلوا شعور أحد الأسرى الذي انتقل من الأسر بين اربع جدران لعشرات السنين, ثم صعد على مسرح الكتيبة وأمامه آلاف الناس يهتفون له! أنا في مكانه سأعاني من الصدمة !

- ماما انتبهت فجأة على صوت الرصاص المنهمر في الخارج .. قالت ايش هادا الظاهر فيه اشتباك .. قلتلها لأ هادول ناس بيحتفلوا !

- يعني القذافي طلع كل هادا الوقت متخبي في مسقط رأسه ؟؟ ياربي عالذكاء

- الله يرحم البوعزيزي ويحيي ثورة تُونس .. أم الثورات والانتصارات العربية.

- انيس منصور توفى .. وبرنامج يسري فودة وقف... هو فش يوم واحد طبيعي في السنة العجيبة هادي؟؟؟

- بعد عدة أيام على عودة الأسرى المحررين .. الكل مجمع على احتياج الكثير منهم للتأهيل النفسي المكثف ..

- نصيحة لكل حد مهتم بإكمال دراساته العليا .. ادرس في مجال مختلف عن شهادة البكالوريوس .. واختر برنامج لا تزيد مدته عن عام واحد.

- نفسي لو بنفع .. أعمل إعادة لآخر خمس سنين من عمري.


وأختم هذه التدوينة بعبارة أعجبتني للكاتب الراحل أنيس منصور - أحد المبدعين الذين انتهت حياتهم في 2011:

 يارب اعطني قلبا قويا يحتمل اخطائي‏,‏ وقلبا أقوى لأحمل اخطاء الآخرين‏,‏ وقلبا مؤمنا فألقي بكل هذه الهموم عليك‏.