راجعـــــين







من الصبح قاعدة بدندن



راجعين يا هوا


على دار الهوا


راجعيــــن



688 يوم عدّو


من غير حضنك يا امي


راجعة والشوق ماليني


لترابك يا غزة


لبحرك ولهواكي


لحلوك ولمرك


لسماكي ولأرضك


راجعة بعد التعب والنجاح

بعد الدموع والافراح

بعد الوحدة والاصحاب

بعد المطر والشمس

راجعـــة


بحلّفك يا غزة تستنيني

مش هاتأخر عليكي

بعترف انو خلف المواعيد من طبعي

لكن بوعدك .. هالمرة مش هاتأخر

بس اوعي تعزبيني وانا داخلة
زي ما عزبتيني وانا طالعة

استقبليني منيح الله بخليكي

استنيني بحضنك الدافي

هناك .. على باب المعبر




لسه صوت فيروز بيدندن بوداني



انا صار لازم ودّعكم وخبركم عني


انا كل القصة لو منكم ما كنت بغنّي


ودايما في الاخر .. فيه اخر


وفيه وقت فراق


عمري ما رح انسى

بروكسل

احلى ايام من عمري مرت عليا بهادا البلد

هالمدينة استضافتني وكانت لطيفة معي

ما بنسى تقلب جوها المجنون

فصول السنة الاربعة بتعيشهم بنفس اليوم

ما بنسى غرابة الصيف والمغرب عالساعة 10 المسا

او حبات التلج و لمسة برودتهم على وجهي

ما بنسى الجامعة .. الي صار الي بكل ركن فيها ذكرى

ولا بنسى احلى ناس

عشنا مع بعض عالحلوة والمرة

بيننا عٍشرة وعيش وملح ومواقف وذكريات لا يمكن تنمحى

ولو فيه اشي بدي ازعل عنجد اني بدي اتركو

رح يكون اني هاترك جمعتكم

ووجودي بوسطكم

ولو فيه اشي واحد كسبتو من هالسنتين الي مروا

رح يكون اني اتشرفت بمعرفتكم



بكرة برجع بوقف معكم


اذا مش بكرة .. البعده اكيد


انتو احكوني وانا بسمعكم


حتى لولا الصوت بعيد


هادا حال الدنيا

بتجمعنا مع ناس .. وبعدين بتفرقنا

بس زي ما بقولو مصير الحي يتلاقى

والارض مدوّرة


بروكسل .. بوصيكي ما تنسيني

بزحمة هالشوارع .. واختلاف وجوه سكانك

بحلّفك تخليلي مكان

هناك .. عند الاوتوميوم

او عند بيّاع الوافل تاع دبروكير

او على هاداك الكرسي الخشبي

بحلّفك .. بس تخليلي مكان


علا .. من بروكسل .. وإلى غزة




راجعـــــين راجعـــــين تمت مراجعته من قبل علا من غزة في أكتوبر 27, 2009 تقييم: 5

هناك 18 تعليقًا:

  1. توصلي بالسلامه ياقمر

    ردحذف
  2. بالتأكيد غزة تنتظر شوقاً لرؤياكي بعدما حققتي حلمك

    ان شاء الله بترجعي بالسلامة يارب
    وتصير رجلتك هي ذكرى جميلة تقصينها على من حولك
    وعقبال ما تكتبي بالمدونة وانتي هون بتراب غزة الحبيبة


    المعبر بيفتح خميس وجمعه هههههه

    ردحذف
  3. تدوينتك كادت تبكيني

    ردحذف
  4. عجبني انك ذكرتي حتي بتاع الوافل في الدابركير :)
    قطعتي قلبي حرام عليكي... ان شاء الله حنشوفك تاني علي خير...في بروكسل و في القاهرة و الله اعلم فين كمان :)
    توصلي بالسلامة و ربنا يهون عليكي الرحلة بإذنه و بأمره...
    kisses for u and the family :)

    ردحذف
  5. olaaa.. men brux ela a7la gaza 3na el ardna w a7babna fi gaza el somoodd,,, ma tesi eno elak as7ab hon fi brx.w f falestine.. dayman ttahkarena w a7na akeed ra7 nethakarek,,,allah am3ki wela 3adra te7maki kaman,,,amir

    ردحذف
  6. أزال المؤلف هذا التعليق.

    ردحذف
  7. I got so touched from this blog ya Ola , Rabbena yewassalek belsalam w dayman ma3a ahlek w as7abek & all ur beloved ones isA :)

    ردحذف
  8. ترجعي بالسلامة
    حاسة فرحتك
    وبادعيلك دايما بالنجاح والتوفيق

    ردحذف
  9. حلمت، سافرت، حققت حلمها، رجعِت
    يا الله !

    ما أقرب اليوم بالأمس، لا أذكر أنه مرّ وقت طويل يا علا عندما دخلت مدوّنتك لأول مرّة لأقرأ أول تدوينة كانت حينها عن سفرك بالقريب!

    كلّ الورود،
    للعائدين منتصين ..
    (F)

    ردحذف
  10. ترجعي بالسلامة ,,

    كل التحية والتربيكات لك
    وان شاء الله المرة الجاية ترجعي بشهادة الدكتوراة

    ردحذف
  11. إن شاء الله راجعين وغصبا عن المعتدي ..

    ففلسطين هي .. أرض العرب وأرض الإسلام وأرض الأمة.

    بارك الله فيك ونفع بك الأمة الإسلامية العربية.

    ردحذف
  12. ها يا علا
    مستنية اقرا اول تدوينة ليكي من ارض الوطن :)
    كيف الحياه؟ وكيف اهلك؟ وكيف احساسك تجاه التغيرات في البلد و البيت و حتي في نفسك؟؟؟
    انا مشتاقة اعرف...
    ربنا يطمنا عليكي و نشوفك عن قريب ان شاء الله
    Judy is sending u a big hug ;)

    ردحذف
  13. توصلي بالسلامة إن شاء الله

    ويارب ماتتعذبي وانتي داخلة غزة الحبيبة .. وتكوني ضيفة خفيفة على معبر رفح اللي بالأسف بينتسب لبلدي

    سلام لكل أهل غزة الأحرار ..والله معكم

    أحمد- مصر

    ردحذف
  14. السلام عليكم
    يابنت غزة يا بنت الابطال
    يا ملتقى الثقفات
    راجعين طالم فى العمر بقي
    ترجعى با السلامة الى وطنك الحبيب
    ولا تنسى ان ترسلى السلام من مصر الى كل عالى وعزيز

    ردحذف
  15. اسراء
    الله يسلمك :)) انا وصلت خلاص والحمد لله


    حازم
    انا فتت يوم أحد :)
    فعلا من يوم ما اجيت وانا بروي قصص ما بتنتهي ..
    الله يسلمك :)


    مها
    وانتي تعليقك خلاني ابتسم :)


    آيات
    والله وحشتوني جدااااا
    طبعا تبع الوافل صار من المعالم تبعت بروكسل ;)
    سلامة قبلك .. انا بس كنت بتكلم باحساس عالي شوية على غير العادة :p



    امير
    وصلت سلاماتك لغزة :)) ان شالله بيوم من ذات الايام بتيجو كلكو وبتسلمو عليها شخصيا :)) احلى صحبة واهل كمان .. ربنا يجمعنا معاكم على خير ان شاء الله ..


    سارة
    تسلميلي يارب :))


    posy cat
    الله يسلمك


    بثينة
    وانا واصلني احساسك :)
    وبكون سعيدة لو كان لي نصيب من دعواتك :))


    متشرد
    والله عليا ما مروا بسرعة ابدا .. حاسة كأنهم دهر ..
    لكن مزبوط انو الرجوع بعد تحقيق الحلم هو شعور لا يوصف
    تحياتي:)


    ادهم
    الله يسلمك ويبارك فيك :))


    الشجرة الام
    بشكرك على كلماتك
    فلسطين بتستنى اليوم الي بترجع فيه
    واحنا كمان
    تحياتي :)


    يا ايات والله بدي اكتب صارلي كم يوم
    ربنا يسهل كدة وهاقولك على كل شي ;)


    utopia seeker
    الله يسلمك يا احمد :)
    لأ الحمد لله مصر كانت كريمة معايا في الدخول وهابقى اقول التفاصيل :) معبر رفح ما كان سهل .. بس المهم عدينا منه
    ألف شكر :)


    محمد عناني
    والله زمان :))
    الله يسلمك .. وغزة كمان بتبعت السلامات :)
    تحياتي

    ردحذف
  16. ولاية فلسطين التعليمية

    أكبر تجمع تعليمي لطلبة الجامعات الفلسطينية
    ( معرفة ثقافية .. خدمة طلابية )

    زورونا على الرابط التالي :

    www.S5Z5.com

    ردحذف
  17. حمد الله ع سلامتك انتي كمان
    كيف شايفة غزة بعد هالغيبة

    ردحذف