يُـعزّ من يشاء



اليوم وانا بسمع تعليقات الناس في غزة والحزنانين على مبارك وهو في قفص الإتهام .. وبيقولوا "يا حرااام" أو "ارحموا عزيز قوم ذل" .... اتذكرت مقولة لمريد البرغوثي في كتابه "رأيت رام الله":

من السهل طمس الحقيقة بحيلة لغوية بسيطة: إبدأ حكايتك من "ثانيا"!
أهمل الحديث عما جرى "أولا"..
ويكفي أن تبدأ حكايتك من "ثانيا" حتى ينقلب العالم.
 
ابدأ حكايتك من "ثانيا", تصبح سهام الهنود الحمر هي المجرمة الأصلية, وبنادق البيض هي الضحية الكاملة.. 
يكفي أن تبدأ حكابتك من "ثانيا" حتى يصبح غضب السود على الرجل الأبيض هو الفعل الوحشيّ.. 
يكفي أن تبدأ حكايتك من "ثانيا" حتى يصبح غاندي هو المسئول عن مآسي البريطانيين! 
يكفي أن تبدأ حكايتك من "ثانيا" حتى يصبح الفيتنامي المحروق هو الذي أساء لإنسانية النابالم..

يكفي أن تبدأ حكايتك من "ثانيا" حتى تصبح ستي أم عطا هي المجرمة وارييل شارون هو ضحيتها!

واحنا شعب سريع النسيان ... عنجد !

نسينا " أولا " ايش عمل مبارك ونظام مبارك عشان يصير فيه هيك " ثانيا "

مش رح احكي عن اي حاجة عملها مبارك ضد شعبه هو ولا ضد مصر .. بيكفي نتذكر ايش عمل ضدنا احنا كفلسطينيين .. وايش كان دور الحكومة والنظام المصري في العدوان غزة .. وفي الحصار .. وفي معاملتنا على معبر رفح

بيكفي نتذكر الترحيل والبهدلة والبيات على الارض بس عشان انت فلسطيني من غزة ولازم تتبهدل

حزنانين عليه كتير عشانه راجل كبير ؟؟

فينا الخير والله ..

ما احنا دايما متعودين ننظلم وننذل وننقصف ونموت وتنهد بيوتنا .. وما نقدرش نقول للمجرم تعال هنا عشان نحاسبك ..

أقصى ما بنقدر نعمله أنه نرفع ايدينا ونقول حسبي الله ونعم الوكيل

بس الي صار اليوم لازم يخلي كل واحد فينا يفكر منيح .. واللي لقى حاله حزنان وصعبان عليه مبارك عنجد لازم يفكر منيح منيح .. لأنو ربنا شرّع المحاسبة ورد المظالم والحكم على المجرم في الدنيا قبل الآخرة ..
وإلا كان سبنا المجرمين من غير محاسبة وتركنا حسابهم ليوم القيامة .. وخلص !

مش ربنا هو الي شرّع الثواب والعقاب والقانون!!

الموضوع مش تشفي ولا شماتة .. بس المحاكمة هدفها الاهم هو تأكيد مبدأ العدالة وعشان يعرف كل ظالم انه رح يتحاسب بيوم من الأيام


قال الله تعالى: "قُلْ اللَّهُمَّ مَالِكَ الْمُلْكِ تُؤْتِي الْمُلْكَ مَنْ تَشَاءُ وَتَنْزِعُ الْمُلْكَ مِمَّنْ تَشَاءُ, وَتُعِزُّ مَنْ تَشَاءُ وَتُذِلُّ مَنْ تَشَاءُ , بِيَدِكَ الْخَيْرُ إِنَّكَ عَلَى كُلِّ شَيْءٍ قَدِيرٌ "