ثقافة المفاصلة

السلام عليكم يا جماعة الخير

هو مزبوط انو اليوم المفروض اكمل الجزء التاني من "تاجيني ولا تغديني" بس هو الظروف والافكار الي بتيجي فجأة صعب تتأجل ,, وانتو عارفين طبعا

القصة انو يلوح في الافق القريب (حلووووة) فرح (او عُـرُس بالغزاوي) ابن خالتي ان شاء الله الاسبوع الجاي

بقالي شهر بترجى في ماما اننا ننزل السوق علشان ما نزنق حالنا على اخر اسبوع ,, لكن على مييين ,, انتو عارفين المرأة العاملة وقتها مش ملكها ,, يوم تروح من المدرسة تعبانة , و يوم انا ارجع من الجامعة تعبانة ,, ويوم اروح الاقيها متأخرة في الطبيخ ,, ويوم نسمع ان في اشتباكات في شارع السوق ف نخاف ننزل ,, وهكذا كذلك لحد ما هووب ,, العرس يوم الثلاثا الجاي ولا انا ولا ماما ولا اختي شاريين

ماااا علينا

بس فعلا نزلة السوق حاجة متعبة جدا ومهلكة للاعصاب والجيوب والرجلين

يعني اولا بتتغلب تلاقي المقاس او الشكل اللي انت او انتي عايزاه ,, يعني كتير بيكون في بالي ستايل او موديل معين شايفاه في مجلة او في التلفزيون ,كدة يعني ,, لكن ما بلاقيش !! كل السوق نفس الاشي !!

زائد انو الاختيار كوم والمفاصلة كوم تاااني خااالص

والمفاصلة بلغة الغزازوة هي ان الراجل يطلب سعر معين وانت وشطارتك تنزل السعر !! ممكن احيانا ينزل السعر للنص او الربع ,, حسب طولة بالك وشطارتك فعلا انك تطلع باقل نسبة من الخسائر لك والارباح المسروقة للبايع

انا اكتر حاجة بتتعبني في نزلة السوق هي المفاصلة ,, ولما بكون مع ماما طبعا بسيبها تقرر وتحدد مع الراجل , لكن دايما بتحكيلي التعليمات كالتالي:

1- احنا نقيس الشغلة ,, لاقيناها مناسبة وتمام ,, نطلع من غرفة القياس واحنا مكشرين ومتأففين واقول اني مش مقتنعة مية في المية - علشان الراجل ما يفكرني ملزقة في الهدمة يعني ولا مش ملاقية غيرها - او اطلع فيها اي عيوب - شوية ضيق شوية طويل بدو توسيع ,, حاجات كدة يعني

2- اي سعر يطلبه الراجل ننزل احنا النص مرة واحدة ,, طبعا الراجل حيزبهلّ ويجيله حالة من المش عارفة ايه ويقول لا ما بينفع يا مدام ,, ويبدأ هو ينزل سعره واحنا نرفع سعرنا لحد ما يوافقو الاتنين

3- في حالة لو الراجل تنّح على سعر وماما لسه شايفاه كتير ,, تبدأ تقول خلص انت حر بنرجع مرة تانية ,, افهم انها اشارة التقهقر الى الخطوط الخلفية ,, يبقى خلص احنا زعلانين وحردانين وبطّلنا نشتري ,, يروح الراجل يرجع في كلامه وينادينا ويحكي خلص الي بدكم ياه واللي تقولو عليه ,, طبعا هو حد لاقي زباين هالايام ,, محدش بيشتري الا المضطر

المشكلة ,, انو غالبا حتى لو طبقنا هالتعليمات كويس ,, ممكن تلاقي نفس الحاجة في مكان تاني هي هي وسعرها اقل
او ممكن واحدة تانية اشترت حاجة شبيهة من نفس المحل ,, لكن طلعت اشطر منك وقدرت تاخدها بسعر اقل

وين المشكلة لو كانت الحاجة مكتوب عليها سعرها وخلص !! والواحد يا يعجبه يا ما يعجبهوش,, يعني مش غلط ان التاجر يربح بس الحكاية مش استكساب ومش نصب ! لأن الواحد فعلا بيحس بالغباء لما يعرف انو التاجر ضحك عليه او "غـَلـَبه" بالسعر

يعني في البلاد المحترمة نظام البيع كدة ,,

بس هي للأسف اصبحت ثقافة عامة في بيع كل شي ,, فى الخضار والفاكهة والعفش والبلاط والكتب ,, حتى المهور بيفاصلو فيها ,, تخيل مثلا لو العريس جاي يطلب بنت عمه المهر ينزل النص ! فعلا بتحصل

وحتى في السياسة ,, يعني اليهود ماشيين بنظام المفاصلة على اراضينا ,, خدو ارض ال67 , لأ خدو سبتمبر 2000 ,, لأ لأ انتو خدو غزة وخلص كفاية عليكو ,,

والمثل الاشهر في الموضوع ,, عمنا فؤاد المهندس :خد سوسو لأ خد نادية

وعلى دا الحال

يا جماعة ادعولي اتوفق بكرة في السوق والاقي حاجة محترمة اروح فيها العرس واشتريها بسعر مناسب ما استغبيش نفسي عليه بعد كدة


اما فعلا ,, العروسة للعريس والجري للمتاعيس


سلام