فلســــطين > غــزة



كان ياما كان في قديم الزمان وسالف العصر والأوان

أيام ما كنت في بروكسل .. في أكتوبر 2009

صار معايا موقف غريب .. في محل ملابس طلع صاحبه باكستاني

كنت بدور على حاجة اجيبها هدية لأختي .. والراجل بيحاول يساعدني .. وفتح معايا حوار انتي من وين وايش بتعملي هنا والكلام هادا

فا انا على سؤال انتي من وين .. جاوبته: I'm from Palestine

وبيّنت عليه علامات انو ما عرفهاش .. قاللي حاجة زي : ايش الاسم الغريب هادا ؟ وين بتطلع البلد هادي؟

قلتله: Palestine ... the Middle East .. you know!

وهو أبداَ مش عارف ..

وانا ماسكة حالي بديش احكيله "احنا البلد الي عاملة مشاكل مع اسرائيل" :S

بعدين قلتله: طيب.. Gaza, do u know Gaza؟

طبعا احنا كنا لسه طالعين من حرب كانت عاملة شنة ورنة في العالم .. بروكسل كلها كانت تطلع مظاهرات ضد الافترا تبع اسرائيل

فا الراجل وشه تهلل !! وقاللي: اااااه .. Sure I know Gaza!

قلتله: بــــس ! عاد غزة هادي .. موجودة جوة فلسطين !

------

بس خلاص ! هادا هو الموقف الي صار معايا .. وبحكيه للناس من ضمن الطرائف الي صارت معايا في بروكسل
ويمكن يكون موقف مضحك .. بس لما افكر فيها بشكل عميق بنرفز ..

يعني غزة صارت اشهر من فلسطين! المدينة صارت أشهر من البلد ؟!!

احنا فعلا وصلنا لهادي المرحلة ... تقسيم المقسّم وتجزئ المجزّأ .. ناس كتير اختزلت قضية فلسطين في حصار غزة وحرب غزة واعادة اعمار غزة .. حتى فيه ناس كتير عالفيسبوك وتويتر كانوا عاملين دعوات للزحف الى "غزة" في ذكرى النكبة :S

يا عمي اسمها فلسطــــين !!

وانا على فكرة فلسطيـــنية .. مش غزاوية !!

وبالانجليزي

... I'm a Palestinian living in Gaza , I'm not Gazan !!

الي بدي احكيه بالنهاية انو كلنا للأسف وقعنا في هادا الغلط .. وبيوم من الايام قلصنا المعادلة تبعت القضية الفلسطينية الى فلسطين = غزة .. وحتى وانا بدور على صورة مناسبة لهادي التدوينة لقيت كاريكاتير بيقول "غزة عاصمة المقاومة العربية" ... نعم ؟؟

محدش يفهمني غلط .. انا بحب غزة كتير .. ومش ضد انو العالم يتعاطف معها .. بس فيه ناس كتير عنا ماشيين على نظام "أنا بس الي ماكل هوا .. محدش يتعاطف مع حد غيري!" وكأنو محدش غيره بيعاني

لأ يا جماعة كل مدينة في فلسطين عندها معاناتها الخاصة .. ومحدش ماكل هوا أكتر من حد .. كلنا زي بعض .. وكلنا صحاب قضية واحدة ..

ولو سألتوني عن أكتر حاجة بتمناها بعد المصالحة .... انو يرجع جواب سؤال انت من وين؟
 بدال انا غزاوي او انا ضفاوي او انا مقدسي او انا 48 ... انه يصير أنا من فلســـطين 


* هذه التدوينة هي جزء من حملة التدوين اليومي لشهر يونيو 2011