The Secret - حياتك من صُـنع أفكارك



كتاب The Secret .. صدر في 2006 وكان من اكتر الكتب مبيعا في هاديك السنة .. وتمت ترجمته لأكتر من لغة .. وحكت عنه اوبرا وينفري في البرنامج تبعها كتير .. والي مهتم يعرف تفاصيل عن الكتاب نفسه هاي صفحته في الويكيبيديا

انعمل من نص الكتاب فيلم وثائقي .. وبجد كان من اهم الافلام الوثائقية الي شفتها بحياتي.. وممكن أعتبر انه غيّر شغلات أساسية بطريقة تفكيري وسلوكي بالحياة العادية ..

فكرة انك انت المسئول عن الايجابيات والسلبيات الي بتصير بحياتك .. على حسب الطريقة الي انت معود حالك على التفكير فيها, لو كنت طول الوقت متشائم ومتوقع الاسوأ .. ودايما مستني مصيبة تصير بحياتك .. غالبا مفش اشي تاني رح يصير بحياتك غير المصايب .. والعكس صحيح .. كُن جميلا ترى الوجود جميلا - إيليا أبو ماضي

هلأ فيه ناس ممكن تعترض تماما على الحكي هادا .. على اساس انو بيتعارض مع القضاء والقدر وانو فيه قوة أكبر منا هي الي بتتحكم بمصائرنا .. وأنا مش ضد هادي المبادئ وبآمن فيها .. بس بدي احكي مقولة موجودة بديننا أساسا: تفاءلوا خيراً .. تجدوه! وفيه حديث قدسي بيقول: انا عند ظن عبدي بي .. فليظن عبدي بي ماشاء

قبل هيك نصحت ناس كتير من أصدقائي انهم يشوفوا الفيلم وفيه بعضهم استفادوا منه .. وبتخيل انو كان لازم انقل النصيحة هادي على المدونة كمان

هادا رابط لـ تحميل فيلم (السر) مترجم بالعربي .. واللي اشتغل عالترجمة عامل مجهود عظيم ومدخّل اضافات من مقولات وأمثال ومبادئ اسلامية في الترجمة .. حتى ما يكون فيه تعارض بين إيمانك بالله .. واقتناعك بالمبدأ الي بحكيه الفيلم : أنت طريقة تفكيرك هي الي بتجيب المواقف الايجابية أو السلبية بحياتك


بستنى تعليقاتكم ..


* هذه التدوينة هي جزء من حملة التدوين اليومي لشهر يونيو 2011