تيدكس رام الله - ممكن الفلسطيني يكون مُبدع؟

بـتدوينة سابقة حكيت بشكل مختصر عن تجربة تنظيم وحضور مؤتمر تيدكس رام الله في غزة والي صار بـ16 ابريل الماضي .. (يرجى مراجعة تلك التدوينة لمعرفة تعريف تيدكس وتيدكس رام الله) .. حكيت فيها عن اديش الفلسطينيين قادرين على التميز والابداع والسخرية من الواقع .. مهما كان أليم وفش زيه بأي مكان بالعالم

اليوم بدي احط اول فيديو من ضمن المتحدثين لأنو بنفعش ما احكيش عنه.. وهو ينظري كان احسن المتحدثين بتيدكس رام الله

المهندس خالد السبعاوي .. فلسطيني لاجئ من غزة .. عاش وتعلم في كندا .. ودرس علم اسمه Geothermal Technology .. والعم جوجل ترجمها "تكنولوجيا الطاقة الحرارية الأرضية"

وهو باختصار علم بيساعد على توليد الطاقة القابلة للتدفئة او للتبريد بدون الحاجة لاستخدام الوقود

من خلال هادا التعريف يمكن تفكّروا انو الحديث تبع السبعاوي رح يكون ممل ومكلكع وعلمي بحت .. بس بدي اخد من وقتكم شوية عشان تشوفوا الفيديو بنفسكم وبوعدكم انو اشي مذهل ..
من أول المقدمة العبقرية .. لما خالد بيقلد فيها جندي اسرائيلي بيسأله Vat is za purpose of your visit to Israel؟
لغاية ما بيجاوب على مقدم الحفل بآخر الفقرة لما سأله عن سبب دراسته للهندسة

أسيبكم مع الفيديو

TEDxRamallah - Khaled Al Sabawi

Keeping Palestine Cool: A Different Kind of Underground Movement

فيما يلي رح أعدد -من وجهة نظري- أهم الأفكار الي طرحها خالد السبعاوي خلال الحديث
.. واللي فعلا بتمنى انها تنتشر كما هو الهدف من مؤتمرات TED أساسا

1- في 2:17 بيطرح السبعاوي تساؤل او فكرة اتربى عليها خلال وجوده هو وأسرته بالخارج.. وبوجهها لكل المغتربين الفلسطينيين .. بيقولك: اذا كان ولاد فلسطين الي كانوا محظوظين وحصلوا على تعليم وشهادات وخبرات مميزة من كل مكان بالعالم .. اذا كان هما ما رجعوش عشان يساعدوا وضع البلد انو يتحسن .. يعني مين الي رح يساعدها !؟

2- في 2:53 معلومة خطيرة عن فلسطين .. بيقولك انو الكثافة السكانية في بلدنا هي الأكبر حالياَ مقارنة مع البلدان المجاورة .. وبالرغم من هيك بيدفع المواطن الفلسطيني أضعاف نظيره في الشرق الاوسط وشمال افريقيا مقابل الكهربا والوقود

3- التعريف تبع نظام الطاقة الحرارية الأرضية بيشرحلك اياه بالصور عند 5:47 كما تم تطبيقه فعلا في مدينة رام الله.. وهو اشي عنجد واو !!

4- بحكيلك بردو وبيجيب السيرة خلال حديثه بطريقة عبقرية في 12:22 .. لخطورة اعتماد السوق المحلي على الدعم الخارجي .. وهادي مأساة انا وغيري كتير بنعاني منها في غزة .. انتشار المؤسسات الغير حكومية المعروفة بالـ NGO's وهامش الراواتب المرتفع فيها بتضعف قدرة القطاع الخاص على استقطاب الكوادر والكفاءات تحديدا بسبب عدم قدرتهم على المنافسة المادية وتوفير الرواتب العالية ..
وهادي النقطة تحديدا عاملالي أزمة .. ومش عارفة كيف رح احلها مع نفسي!

5- خالد السبعاوي وفريقه قاعدين بينفذوا فكرة الطاقة الحرارية الارضية على اوسع نطاق في جامعة مأدبة في الأردن .. وتعرفنا معاه على "شوية" من الصعوبات الي واجهها فريقه بسبب الشبكة المتداخلة والمتعددة الألوان الموجودة في معظم بلادنا العربية .. والي اسمها "البيروقراطية" .. تفتكروا كان لازم ياخد تصريح من أكم جهة عشان يقدر يبدأ بتنفيذ المشروع؟ هو بحكيلكم عند 13:40

6- الحدث تبع تيدكس رام الله كان قبل الاعلان او التلميح حتى عن اتفاق المصالحة بين فتح وحماس .. والاحساس بالأسى كان مالينا كلنا  لما عرض علينا هادي الصورة .. فلسطين هي الكيان الوحيد الي لسه ما صارش دولة .. ومع ذلك فيه حكومتين ماشاء الله

7- اخر نقطة جديرة بالتفكير العميق لكل واحد على عتبة انو يقرر هو ايش بدو يدرس بعد الثانوية العامة.. في 17:05 بيجاوب خالد على سؤال جميل أبو وردة عند ما سأله عن سبب دراسته للهندسة وكيف كانت نصيحة والده.


بجد انا فخورة بهيك نماذج مشرقة في بلدنا .. بالله ما انتو كمان فخورين ؟!

وهادي فرصة منيحة .. عشان بالمرة اعرض عليكم تقرير الحدث الي صار في غزة لنقل فعالية تيدكس رام الله على الهواء مباشرةَ :)

TedxRamallah Live-Streaming Event in Gaza event

انا الي واقفة بقلب الصفحات عند 2:23 ^_^


* هذه التدوينة هي جزء من حملة التدوين اليومي لشهر يونيو 2011