الانفلونزا .. اجدد حكاوي غزة

يا جماعة والله ما هو معقول هادا الكلام


كتير بطيئة انا بالكتابة


ليش هيك ؟؟؟


هلأ هادي التدوينة عاملة زي الخبر العاجل لما بيقطع المسلسل بالنص كدة


في قصص عم بتصير حاليا في غزة اهم من مسلسل العودة تبعي هادا الي مش راضي يخلص هههههه عموما هي هالحلقة الي فاضلة فيه .. مش مشكلة بنكملها بعدين

هلأ فش اشي صار شاغل الناس الا سيرة انفلونزا الخنازير ..

حالة من الرعب كدة مسيطرة على الناس.. الشوارع فاضية .. والناس مضبوبة في بيوتها .. روحنا اليوم على مطعم نتغدى ولقيناه فااااضي علما انو اليوم الجمعة وعادةً بيكون فش فيه وَسَع من كُتر الناس

وانا بيني وبينكم مستغربة من هالشعب!! مش فاهمة كيف يعني حتة انفلونزا لا راحت ولا اجت وتعمل في الناس كل هادي البلبلة .. شفنا حاجات اخطر من هادي ولا اهتمينا يعني


هو مزبوط الاخبار الرسمية ما بطمن .. انما يعني مش لهالدرجة الاشي خطير يعني .. خاصة لما بنعرف انو كل الوفيات كانو بيعانو من مشاكل صحية من البداية .. واصلا لو مرضوا بانفلونزا عادية كان ماتو بردو

هي الاخبار عن الانفلونزا بدأت تنتشر مع عودة الحجاج .. علما انو الاصابات والوفيات ما فش منهم حجاج اساسا .. فا احنا مش عارفين هل الاصابات هادي مثلا انتقلت للاشخاص العاديين من حجاج؟ ولا اصلا كان فيه اصابات من زمان و"جماعتنا" هما الي ما اعلنوش عنها قبل هييييييك ؟؟

وبعدين قصة الينسون هادي عنجد اشي بيضحك

صار الكل يقول والله سمعنا الينسون هادا بشفى من الانفلونزا .. ويادوب الخبر انتشر .. وبظرف يومين بالعدد ارتفع سعر الينسون وتضاعف بدرجة مخيفة مش ممكن تتخيلوها ... يعني كان الكيلو بـ 12 شيكل مثلا .. ويامين يشتريه .. هلأ وصل سعر الكيلو لـ 200 و 260 شيكل بظرف يومين !!!


الشغلة التانية الي صارت موضة .. الا وهي لبس الكمامات ... بالمدارس هلأ بتلاقي الولاد الصغار كل واحد لابس كمامة وصارت لعبتهم .. وبنفس الوقت بتلاقي اولاد جايبين معاهم من بيوتهم صابونة ومنشفة وكل شوية رايحين جايين يغسلوا ايديهم .. هادا اشي كويس يعني .. منيح استفدنا شوية نظافة مش غلط


الخوف انو الشتا جاي وفيه عالم كتير بستحملوش الانفلونزا العادية اصلا .. وغزة بالنهاية صغيرة و لو لا سمح الله اتطور الموضوع وتحول لوباء الله اعلم عن مدى جهوزية المستشفيات عنا .. الله اعلم فيه ادوية ومصل ولا لأ .. مش بعيد ساعتها يتحول العلاج لشغلة سياسية وحزبية كمان .. ويصير متوفر لناس وناس ..  فش اشي بعيد على هالبلد ..

ساعتها بيكون عنجد راحت علييينا :D


المهم .. هي حكاية وماشية .. والناس لقت حدوتة تتسلى فيها .. وقلت لازم يكون معاكو خبر باللي بيصير


خدو بالكو من حالكو وكل واحد يقوم يغسل ايديه بمية وصابون بسررررعة

نهاية النشرة