غـــزّة الحلوة - فيلم وثائقي


بدي اعرض عليكم اليوم فيلم وثائقي رائع من انتاج Media Town .. للتعريف عن مدينة الغزة بوجهها الحلو المشرق والصامد في نفس الوقت .. بس بطريقة مبهرة للغاية .. يعني انا الي عايشة في غزة حسيت انه ورجاني مدينتي بشكل جديد ..

بالزبط زي لما تكون حد محتاج ياخدك من ايديك .. ويفتّح لك عينيك .. ويورجيك صورة عمرك ما شفتها .. ولو انها موجودة قدامك طول الليل والنهار

غــزّة الحــلوة .. الي بغير عليها كتير لما حد يكون متصورها مدينة مسكينة وغلبانة .. وبصراحة هي مش هيك .. وبجد الله يسامح كل حد عامل شغلته وعملته الولولة واللطم والشحدة على حس هادي البلد..

بديش احكي اكتر من هيك ... ولو عجبكم الفيلم .. استنوا فيلم تاني اسمه "غزة تعيش" بردو من انتاج ميديا تاون .. رح يذاع على قناة الجزيرة يوم الخميس 9 يونيو 2011 الساعة الرابعة مساء ان شاء الله.




عنجد حـــلوة يا بلدي !


* هذه التدوينة هي جزء من حملة التدوين اليومي لشهر يونيو 2011

غـــزّة الحلوة - فيلم وثائقي غـــزّة الحلوة - فيلم وثائقي تمت مراجعته من قبل علا من غزة في يونيو 06, 2011 تقييم: 5

هناك 9 تعليقات:

  1. شفتو اول امبارح، بتعرفي اخدت نفس عميق بس خلص الفيلم
    بلدنا حلوة وحتى كمان حلوة بحصارها، عالحلوة والمرة حلوة ..

    ردحذف
  2. كلمة حلوةو كلمتين حلوة يا بلدي ,,, جميل جدا

    ردحذف
  3. وأنــــــا شفتو عاليوتيوب قبل كم من يوم
    وطبعاُ غزة مو حلوة وبس، غزة عظيمة، عظمتها بأهلها :)

    ردحذف
  4. يااااه عليكي يا غزة...مهما الواحد راح وإجا ماراح يشوف أحلى منك ...:))..والعجيب إنو غزة بيبان حلاها لمن تكون تحت الضغط..!!..بتشوف الناس وصبرهم وتحملهم على البلاوي اللي بيعانوا منها يوميا والابداع اللي بيعملوه رغم كل الظلم اللي بنعيش فيه....!!..أمنية حياتي..إني مهما اتغربت ورحت عشت برة عند الأجانب...إني أرجع وأعيش و أموت وأندفن هنا في بلدي ..يارب تتحقق وما تغيرنا الدنيا!!!.

    بالنسبة يا علا لموضوع الـ"شحاذين" على أعتاب جراحنا وعوراتنا ..هادا موضوع ياما استفزني في الماضي ولا زال..بقوللهم ..يا ناس يا محترمين..في فرق ما بين الدعوة لقضيتك والتعريف فيها و تبيين آثار الاحتلال علينا لجلب الدعم والتعاطف وما بين أننا نصور للناس انا عايشين حياة قذرة لا ترضاها الحيوانات حتى ونتربح بدموع الفقراء وأهالي الشهداء ونشحذ اللقمة حتى مِن مَن لا يكترث ..!!!..يا عالم احنا رفضنا الاحتلال مشان رافضين العيشة تحت "الذل" والظلم..!!..مش مشان مصاري ولا أكل ولا كهربا ولا ولا ولا..!!!..فمش منطقي في سبيل الغاية هاي نروح نذل حالنا للي بيسوى واللي ما بيسوى..!!!...والله مرّة ممرضة في المستشفى اللي درست فيه في مصر سألتني سؤال شلني وصدمني..بتقوللي "هو فيه بغزة مستشفيات ومدارس وشوارع ومحلات زينا كدة؟؟!!!..دايما بنشوفكو في التلفزيون فقرا وبتعيطو وبيوتكو مهدمة..!!!!!!. انا الصراحة انصدمت من غباءها أولا ومن اللبس والصورة المشوهة اللي نشرناها للعالم بغباءنا احنا ثانيا..!!!!!..وللعلم..انا متأكد أنو لو عملنا دراسة حنلاقي انو على الاقل 50% من العرب عندهم الصورة هاي أو جزء منها..!!..بيندهشوا لما يشوفو فلسطينيين من الداخل بيضحكو وبيحبو الحياة والفرح وحالتهم المادية كويسة وعايشين زي ما هما نفسهم عايشين ويمكن أحسن كمان..!!!..
    معلش على الإطالة..بس الموضوعين هدول بالذات ياما عانيت منهم وسرقني الكلام...!!!..:)))

    ردحذف
  5. لكي لا يقال ان الشعب الياباني وحده الذي ينهض من المحنة ويعيد بناء وطنه..مرة تلو المرة.
    لكن ابداً لم يكن هذا الشئ بغريب عن الشعب الفلسطيني.
    حتى اننا كنا نقول هنا عندنا شوفوا غزة وحدها
    والامية المنعدمة فيها رغم المعاناة والاحتلال الصهيوني.
    ولطالما سمعنا وشوفنا في وسائل الاعلام عن اختراعات من غزة وافكار جديدة ومبدعة ماشاء الله..
    الله يحفظ غزة والشعب الفلسطيني وكل فلسطين الحبيبة.

    ردحذف
  6. رندة
    بتعرفي .. انا كل مرة بشوف الفيلم بقشعر وبدمع على اخر لقطات .. البنا والتعمير والمشهد تبع كرات السلة والطباق في السما .. والله غزة ناسها كمان حلوين ولو انو مرات ما بيبين عليهم :P

    جولاني وامتياز ونيفين وكريمة
    الاغنية مناسبة صح ؟!

    احمد
    يا عمي انت لازم تفتح لك مدونة !
    عجبتني كتييييير جملتك:يا عالم احنا رفضنا الاحتلال مشان رافضين العيشة تحت "الذل" والظلم..!!..مش مشان مصاري ولا أكل ولا كهربا ولا ولا ولا..!!!..فمش منطقي في سبيل الغاية هاي نروح نذل حالنا للي بيسوى واللي ما بيسوى
    بس بتعرف هما معذورين على الصورة الي بيفكروا فيها وقت ما تيجي سيرة غزة .. احنا ماشالله احب ما علينا اللطم والشحتفة اهئ اهئ
    رح احط بيوم من الايام صور المطاعم والمنتزهات والاماكن السياحية .. عشان نشوف الازبهلال على اصوله :D

    لاتي
    عزيزتي شكرا الك على تعليقك اللطيف هادا .... عنجد هيك بتحكو عنا وهيك فكرتكم عنا ؟
    الله يجبر بخاطرك!
    ع فكرة انا اصل عيلتي من المغرب :D

    تحياتي

    ردحذف
  7. هههه...مدونة مرة واحدة!..:))..رغم انو في براسي مليون شغلة حابب احكيها بس والله انتي عارفة المدونات بدها تفرغ وفضاوة..!!..مش هلأ وقتها على الاقل..:)..بعدين ما شالله عليكو انتو..قايمين بالواجب وزيادة..:)
    صح..المشكلة اني اكتشفت صورتين متناقضتين تماما لإلنا في عيون العرب..!!..بعض العرب وخصوصا اللي الهم ارتباط بدول الخليج (اشتغلوا ..انولدوا ..عاشوا)بالخليج عندهم تصور انو الفلسطينيين هدولا أغنى وأترف الشعوب..!!!!...سمعتها كتيييير عالعبارة من مصريين انولدوا وعاشوا بالخليج واحتكوا بفلسطينية الخارج..وبغض النظر عن الاسباب اللي خلت صورة متل هيك تطلع إلا انو في صورة تانية نقيضة عند الجزء الاخر من العرب..اللي هيا انو احنا فقرا شحاتين كلنا يا اما شهدا او جرحى او مشردين لاجئين..!!..والصورتين طبعا مغلوطتين..:))
    حطيها الصور حطيها..:))..والله فعلا لتشوفي الازبهلال والصدمة على اصولها..ههههه..:))

    ردحذف