معبر رفح ... والمقلوبة !



الحكي عن معبر رفح كان ومازال وسيظل .. حديث ذو شجون لأي مواطن فلسطيني ساكن في قطاع غزة

الاسبوع الماضي نزل خبر انفتاح المعبر عالبحري بين قطاع غزة ومصر.. وانعملت زيطة وهليلة وحفلة تطبيل وتزمير .. وصارت الناس تفكر انو خلص الامور رح تصير فلة شمعة منورة .. وبالرغم من انه عندي تعليقات كتير على هادي النقطة تحديدا .. معظمها تعليقات مشككة في حدوث أي تغيير فعلي على المعبر .. إلا اني رح أؤجل هادا الحديث شوية .. لأنو اليوم صارت تطورات مهمة

....

الناس الي كانت متابعة أخبار معبر رفح اليوم عارفين انو كان مسكر وانو صارت دوشة كبيرة هناك بسبب أعمال ترميم بوابة المعبر .. وحتى هادي اللحظة مش معروف لو رح يكون بكرة مفتوح ولا لأ (وغالبا رح يكون مغلق وبذكّركم)

أما الناس الي كانت متابعاني من الصبح تحديدا على تويتر وعلى صفحة المدونة في الفيسبوك .. معاهم خبر انو أعمال الترميم هادي كانت على وشك أنو تحرمنا اليوم بالبيت من أكلة مقلوبة مزبّطة من ايدين الست الوالدة



القصة بدأت بأنو والدي كان سافر على مصر وقضى فيها كم يوم في رحلة عمل .. وكان على أساس انو راجع اليوم على غزة .. فا تقريبا الساعة 1 ونص قاعدين في أمان الله في البيت وكلو بيجهز نفسه .. وإذ يطلع خبر عاجل انو تم اغلاق معبر رفح من الجانب المصري بشكل مفاجئ لأسباب "فنية" ! .. حكينا معه عالجوال .. وقال انو فعلا المعبر مسكّر وانو هو وصحابه راجعين عالعريش ويمكن يباتوا هناك ..

طبعا لكم أن تتخيلوا .. كل التجهيزات الي كانت شغالة في الدار استعدادا لرجعة بابا بالسلامة اتوقفت .. بما فيها تجهيز طبخة المقلوبة الي كانت ماما بدأت فيها فعليا .. فا كتبت على تويتر : أعمال ترميم في بوابة المعبر ضيّعت علينا أكلة المقلوبة اليوم !


طبعا هادا كان نوع من الدعابة .. يعني ابسط مشكلة بالحياة بالنسبة الي انو تتأجل طبخة المقلوبة .. بس فعلا صارت ضجة كبيرة وحالة غضب من هادا الاغلاق المفاجئ للمعبر .. والمشكلة مش في عملية الترميم بحد ذاتها (مع انو كان ممكن تنعمل يوم الجمعة مثلا) .. المشكلة كانت بعدم تبليغ الناس او حتى المسئولين في الجانب الفلسطيني من المعبر انو رح يتم اغلاقه

يعني مثلا والدي كان بامكانه "ماديا" بعد ما وصل للمعبر انو ياخد مواصلة تانية ويرجع تاني عالعريش ويحجز بفندق ويجهز حاله للبيات في غرفة محترمة .. بس ناس تانية ماكانش عندها هادا الخيار .. وكان خيارهم الوحيد هو القعدة على الرصيف لغاية ما ينفتح المعبر!

وبقي الحال كما هو عليه والأخبار التي لا تسر أحداَ لغاية الساعة 3 العصر تقريبا .. اتصل فينا مرة تانية وقال انه وصلتهم معلومة انو المعبر رجع انفتح (!) وانه صار داخل عالجانب المصري من المعبر (محدش حتى الآن كان فاهم ليش انفتح فجأة زي ما سكّر فجأة)

المهم عشان ما ازودش عليكو برم فاضي .. بمجرد ما عرفت هادي المعلومة كتبتها طبعا على تويتر وعلى الفيسبوك .. والنكتة انو أغلب الردود من الناس كانت بتخص المقلوبة :D



(اكبس على الصور للتكبير)

بس يا سادة .. الساعة 5 تقريبا كان والدي وصل الدار بالسلامة وأكلنا مقلوبة وبامية والحمد لله

وتوتة توتة فرغت الحدوتة

الي عرفته بعد هيك لما استجوبته .. انه الناس الي كان بدها تدخل لغزة دخلت .. بس الي كانوا بدهم يطلعوا ما عرفوش يطلعوا .. بمعنى ان المرور عبر معبر رفح كان مفتوح باتجاه قطاع غزة فقط ومغلق لمن يريد الخروج نحو الأراضي  المصرية .. وبعدين عبور الناس كان مشيا على الاقدام في المنطقة الجاري فيها ترميم البوابة .. بدال ما يكون باستخدام الباصات
النقطة التانية انو موضوع الترميم كله على بعضه مش منطقي ! وتحيا نظرية المؤامرة بصراحة .. الحكاية وارد يكون فيها إنّ كبيرة ..

عموما كله هيبان .. والى أن ألقاكم (بكرة يمكن) عشان افضفض أكتر عن خرافة فتح معبر رفح ..


* هذه التدوينة هي جزء من حملة التدوين اليومي لشهر يونيو 2011


تحديث/ فيديو شرح لوصفة المقلوبة



معبر رفح ... والمقلوبة ! معبر رفح ... والمقلوبة ! تمت مراجعته من قبل علا من غزة في يونيو 04, 2011 تقييم: 5

هناك 18 تعليقًا:

  1. والله يا علا كتير ناس رابطة حصار غزة ومشاكل غزة كلها بالمعبر، فتح قفل فتح قفل
    وهنا تكمن المصيبة الكبرى، المعبر هو جزء من المشكلة صحة بس ماهواش كل المشكلة، انا كزا مرة اسمع كلام من ناس حوالين المصالحة والحوار كالتالي: " هُما بس يفتحولنا المعبر وبكفي"، بصيرش هادا الكلام لازم الكل يعرف والفلسطينية قبل غيرهم انو قضيتكم يا جماعة مش بس معابر برية وبحرية وشوية مواد تموين دخلت او انحجزت فى الشمس 3 سنين لا القصة قصة فقر وبطالة وعدم سيادة قانون وجهل و ارض بتضيع وفلوس منهوبة وشهدا واسرى وحقوق ضايعة ، والدنيا فوقاني تحتاني مقلــــــوبة ..

    ردحذف
  2. ممم...أعتقد أن موضوع "خرافة" فتح المعبر لايخلو من كثير من الصحة للأسف..!!..أو على الأقل, الموضوع بدا بجد و صدق.. ثم بدا يرجع تاني هالايام لسابق عهدو...أكيد يا علا لا يخفى عليكي وعلى كتير من الشباب هنا أنو في أخبار متواترة عن ضغوطات شديدة وجهت للمجلس العسكري بعد قرار المعبر إياه..!!!.. بعض الاخبار وصلت لانو اوباما شخصيا ضالع في الموضوع..!!..الاكيد انو مفش دخان من غير نار..خصوصا انو اكتر من وكالة اعلامية نقلت اخبار مشابهة..لكن ييجي السؤال الكبير هنا.."هل المجلس العسكري والحكومة المصرية المؤقتة بهذا الغباء السياسي والهشاشة انهم يتراجعوا عن وعودهم العلنية بالنسبة للمعبر بهذه السرعة؟؟!!!!.مع علمهم لتعطش شعبهم قبل شعبنا لخبر متل هيك..انا اراهن انو لو الموقف حصل بالظبط بكل حذافيره مع مبارك والحكومة البائدة "اللي هيا بالمناسبة اغبى حكومة في اخر 5000 سنة من عمر مصر!!!" ماكانوش حيعملوا هيك أبدا..!!!!...اكيد كانو بدهاء مبارك المعتاد فتحوا المعبر شهرين تلاتة وبعدين مش حيغلبوا يفركشوا الموضوع(بخبر عن تفجير كنيسة هنا وللا اكم من طن متفجرات وللا مخدرات هناك بغزازوة وهميين متورطين..وطبعا حيسكرو المهبر او يزيدو تعسفهم عليه بعد ما يكونو استفادو اعلاميا وسياسيا ونيموا ناسهم والاعلام..!!!...اللي بيطمني بالموضوع اني مش متخيل الحكومة المصرية تروح تصدر قرار تاريخي بالنسبة للمعبر زي اللي اصدرتو يوم الخميس 26-5 وبعد اقل من اسبوع تروح تتراجع عنو وهي متأكدة انو حيكون فيه بدل العين ألف بدها تتابع سير عمل وتطبيق القرار..!!!!...اكيد الموضوع فيه ابعاد تانية خافية علينا..:))..والله يستر..انا سفري باخر 8 و الحالة مش محتاجة بهدلة ومرمطة عالمعابر زي اللي شفناها في اخر 3 سنين..اللــــه يستر!!!..:)))
    بالمناسبة حمدالله على سلامة الوالد..آنسكم...وصحة وهنا عالمقلوبة..;)

    ردحذف
  3. يارب ما يطلعوش زي ما انا ظنا فيهم ويفتحوه انهارده
    عشان انا كمان بصراحه حاسه انهم هيكونوا قافلينوا انهارده.
    مع انى كنت متفائله أوى فى الأول وبقول مش مشكله هما فتحوه دلوقت للأفراد شويه وهتمر منه البضايع بس نصبر ...بس أحبطونى منهم بعملتهم ديه.


    وخصوصا حكاية الأصلاحات بلدى وعارفها بأه لما تحب تصلح ... أحنا محطات المترو بتتصلح عندنا من 9 شهور هما اه ما قفلوهاش .. بس 9 شهور مكسرين المحطات ومش لاقين كراسي نأعد عليها نستنى المترو...واللى يغيظ ان لما أوباما كان جاى مصر يقول الخطاب جامعة القاهرة ديه وما حولهابقت بتلمع فى أسبوع واحد

    مش عارفه بعد كده كل اللى مستنى حد يرجع من مصر لغزه استقبلوه بمقلوبه واحنا من جانبنا هنستقبلكم بالكشرى :) أو تعلمنى المقلوبه بأه ...يمكن تكون هى اللى بتفتح المعبر :)

    ردحذف
  4. قصة جميلة والمهم إن معبر رفح مفتوح وبالهناء والعافية

    ردحذف
  5. المهم في الاخر .. اكلتم المقلوبة !!

    ردحذف
  6. عندي وجهة نظر بتشبه وجهة نظر الأخل الفاضل
    ahmed k. abou-foul
    اختصر عليا كتير حكي بخصوص المعبر
    وأنا بضيف على ذلك انو ممكن فتح المعبر يتعثر كتير الأيام الجاية وممكن يتسكر - وارد برضو- لغاية ما يصير اتفاق تام وكامل على صيغتو مع وجود كل الأطراف المعنية (فتح - حماس - الأوروبيين)
    وبالهنا في المقلوبة
    ملاحظة: بحبش البامية :D

    ردحذف
  7. على فكرة أنا خليت الوالدة تعملي مقلوبة بعد زن طويل لأنو صراحة بعد ما شفت الصورة ماقدرتش أقاوم:D

    و ألف حمدالله على سلامة الوالد :)

    ردحذف
  8. إحنا لو بدنا نقيسها حنلاقي معبر حارمنا من كل حاجة ... إذا مرة معبر رفح حرمني من أعز جزمة بلبسها .. فتح فجأة و عشان ألحقولبست شبشب هع و حملت الشنط و ركض عالمعبر

    ردحذف
  9. انا شايف انو الموضع كان سببه وجود بعض التردد المصري في الثبات على القرار اللي اتخذوه في فتح المعبر..
    مشكلة مصر الان انها يجب ان تتخذ قرارات شجاعة و تثبت على هذه القرارات..هذا ان ارادت ان تعود كدولة مستقلة لها وزنها و حضورها..اما ان تحاول ان تمسك العصا من المنتصف...فهذا لن يجدي
    ياسر

    ردحذف
  10. الحكاية فيها مليون إن
    و المجلس العسكري إستجاب للضغوط الأمريكية و الإسرائيلية للعمل بالضوابط الخانقة للمعبر كما كان
    و لكنه لن يعلن ذلك بل سيتبجح بأن المعبر مفتوح
    فتح المعبر و سياسة نبيل العربي الإستقلالية المحترمة من أهم اسباب نقله لثلاجة جامعة الدول العربية
    و حتشوفي الوزير اللي بعده حيكون مثل أبو الغيط

    ردحذف
  11. و شوقتيني آكل المقلوبة دي
    شكلها حلو في الصورة و أنا مش عارف هي تركيبها ايه و بتتعمل إزاي ؟
    ممكن وصفة لها أديها لزوجتي و هي تضبطها

    ردحذف
  12. رندة
    بالله تاخدي كوبي بيست من تعليقك هادا وتحطيه بتدوينة عندك .. بحكي جد !

    احمد
    لفتت نظري نقطة المكر والدهاء والحنكة (الخ الخ الخ) تبعت نظام مبارك .. معلش بس دايما الفبركات كانت تبقى مكشوفة ! انت عارف مثلا التحقيقات الي طلّعت حماس هي السبب عن تفجير كنيسة الاسكندرية الكل كان شايفها مقدمة لحرب جديدة ع غزة وع حماس
    بس صارت الثورة واتغيرت المسائل
    وهلأ بدا ينتشر كلام عن انو فيه خلاف جديد بين حماس ومصر بسبب قوائم الممنوعين وهو الي سبب اغلاق المعبر
    للاسف احنا صرنا متعودييييين دااااايما على نحاسة المعبر .. بنمرض لو كانت اموره ماشية من غير مشاكل !!

    MMS
    بتعرفي .. جزء كبير من زعلي على تسكير المعبر .. كان سببه خيبة أمل المصريين في قرار الفتح .. انا كنت ملاحظة احساس الفخر بالانجاز على تويتر اللي للاسف ما لحقوش ينبسطوا عليه

    مممم المقلوبة هي الي بتفتح المعبر ؟؟
    والله ممكن .. ما كل حاجة عندنا مقلوبة ههههههه

    كريمة
    الله يعافيكي واهلا وسهلا فيكي على المدونة
    بس عزيزتي .. المعبر حاليا مغلق !

    وجع البنفسج
    ههههههه اه والله كانت زاكية :D

    محمود
    والله جماعتنا قال عندهم مطالب !
    اما نشوف اخرتها

    تامر
    طب صحتين ههههههه الزن بيكون منيح احيانا وبيجيب نتائج مبهرة :D

    جولاني
    ع فكرة توي دخلت مدونتك لاول مرة وعجبتني كتير .. (المفروض اتركلك هادا الكومنت عندك ههه)
    بتعرف تقريبا كل واحد بعرفه الو قصة شكل مع المعبر .. لو حدا اهتم بالموضوع ممكن يجمع كتاب عن القصص والحداويت المرتبطة بالمعبر .. وكتير منها بتكون مواقف ساخرة وكوميدية اساسا

    ياسر
    والله الموضوع مش مبين ايش سببه هل هو ضغط خارجي ولا جماعتنا اسمالله عليهم بيتشرّطوا .. الله اعلم !

    مهندس
    انتو كلكم زعلانين على نبيل العربي .. انا عارفة
    بس زي ابو الغيط مافي نوهائيا !!الله لا يقدر ويجي واحد تاني من نقس الفصيلة !

    اما بالنسبة للمقلوبة :D
    هي مكوناتها الاساسية رز ولحمة وبتنجان مقلي .. تفتكر لازم اعمل تدوينة تانية عن طريقة طبخ المقلوبة ؟؟ :D
    لو لقيت الوصفة مكتوبة في منتدى طبيخ كويس هابعتلك الرابط ان شاء الله .. هي سهلة كتير وممكن المدام تعملها وتطلع زاكية :)))

    ردحذف
  13. iam from morocco and i like your notes Ola
    keep working
    sara :)

    ردحذف
  14. i tried to contact you on your gmail adress, but in vain because i had no response from you
    i 've started reading what you post on this blog since last summer...every line reveals what Media hides about Palestinians...it's a blog from palestine ..written by a palestinian hand, reporting a palestinian reality...we don't need foreign reporters to tell us what kind of pain gazzans are living in.we do need you guys to do such job .
    i have no words that may describe how much iam proud of you..
    I want you Ola to write about children like Firass Almadloum ; those who are dying deprived from getting out of gaza for medical care.
    best wishes
    sara

    ردحذف
  15. ممم..لا يا علا..صدقيني..الفبركات مش دايما كانت مبينة وواضحة..!!!..مشكلة الشعب المصري انو شعب عاطفي"حبتين" زيداة عن اللزوم..!!..ولو استثنينا الاخوان "اللي قبل الثورة ما كان الهم حول ولا قوة" والشريحة الرفيعة جدا من المثقفين والمتنورين والسياسين بيتبقى الك "غالبية" من المجتمع كانت تصدق متل هاي الشغلات..!!!!..انا كنت هناك وشفت وعاينت بنفسي رد فعل الناس على احداث مقتل الجنود المصريين في رفح..!!..واحداث الـ"الارهابيين" اللي تهربو من الانفاق مشان عملية تفجيرات الأزهر..ودهب..!!!. .والله كمان يا علا موضوع مسئوليتنا على تفجير الكنيسة في الاسكندرية..!!..الناس العادية ما صدقت و سمعت موضوع الفلسطينيين..!!. .صدقت على طوووول..!!..الموضوع نفسي أولا وأخيرا..الناس اكيد أكيد حتتريح لفكرة انو المشكلة مش من عندنهم..!!.ما في عندنا "فتنة طائفية"..!!..ونظرية "الأصابع الخارجيةالمشبوهة" هاي اللي بنسمعها دايما عند اي كارثة تحصل بمصر ساهمت في الموضوع..!!..على بلاطة هيك كان الناس مفكرين.."احنا زي فلة وشمعة منورة كمان ومش احنا اللي فجرنا الكنيسة !!..أكيد الموساد..هو اللي بيهدف لعمل فتنة"..ولمن طلعلهم العادلي بخطبته العصماء ما كذبهوش....لأن نظريتهم طلعت صحيحة...شيلي الموساد بس وحطي حماس ..!!..هي فارقة عند أي حد؟؟!!!!.. الصراحة انا مش حلومهم على هيك...."تلبيس" الموضوع لمين ما كان حتى لو الجن الأزرق كان أهون عليهم انهم يقبلوا فكرة وجود فتنة طائفية في البلد وصلت لشفا حرب دينية وتفجير كنايس..!!!..هادا رد فعل طبيعي..!!..:))

    ردحذف
  16. و اتضح في الآخر إن العادلي نفسه هو اللي مفجرها

    ردحذف
  17. هههه تدوينة تمس القلب والمعدة فى نفس الوقت

    واخيرا عملت تدوينة تحاكى المقلوبة
    اسمها نهج الطناجر!
    http://sabelmodawna.blogspot.com/2012/04/blog-post_10.html

    ردحذف
  18. السلام عليكم، أريد إبلاغ أي شخص يقرأ هذا ويهتم بالحصول على قرض من شركة موثوقة، يرجى الاتصال بهذه الشركة وإبلاغها بالتفاصيل التي سأدرجها أدناه واتبع كل ما يُطلب منك القيام به وسوف تحصل عليه قرضك لأنني حصلت على قرضي منهم ولهذا السبب أفعل ذلك أيضًا لمساعدة أي شخص في حاجة ماسة إلى قرض. تواصل معهم عبر البريد الإلكتروني: (contact@sunshinefinser.com) أو WhatsApp: +919233561861

    فاطمة.

    ردحذف